အဟုန်ပြင်းစွာရိုက်ခတ် ကိုရိုနာဗိုင်းရပ်စ်

ကိုရင်သြ - ရေးသားသည်

ကြော့ကြမ်း ဟူသရမ်းလှသည့် ကိုဗစ်ရောဂါပိုးက ကမ္ဘာ့ တစ်ခွင် ပြဲပြဲစင်အောင် ကူးလူးသွားလာနေချိန်တွင် အခြေခံအဆောက်အအုံခိုင်ခံ့ရေးအတွက် ကမ္ဘာ့နိုင်ငံများ အချင်းချင်း ပူးပေါင်းဆောင်ရွက်ကြ၊ ကုထုံးသစ်များနှင့် ကာကွယ်ဆေးသစ်များ ဖော်ထုတ်နိုင်ရေးတို့အတွက် လက်တွဲကြိုးပမ်းကြခြင်းမှာ “အရှုံးထဲမှ အမြတ်"၊ "အဆိုး “ထဲမှ အကောင်း” ဟူ၍ ကျွန်ုပ်တို့ ယူဆနိုင်ကြပေလိမ့်မည်။ သို့ဖြစ်စေကာမူ နိုင်ငံများအတွင်း ပူးပေါင်းဆောင်ရွက် နေကြချိန်မှာပင် နိုင်ငံအချင်းအချင်း ကျန်းမာရေးပြဿနာ များ လိမ်ယှက်ကြကာ နင်ပဲငဆ ပြောကြရသည့်အခြေ အနေ ရှုပ်ထွေးမှုတို့ကိုလည်း ကျွန်ုပ်တို့ တွေ့မြင်နိုင်ကြ ပေလိမ့်မည်။

ကိုရိုနာဗိုင်းရပ်စ်ရောဂါ တိုက်ဖျက်ရေးလုပ်ငန်းကို အချိန်ကာလကြာမြင့်စွာ ခက်ခက်ခဲခဲဆောင်ရွက်ရလိမ့် မည်ဟု ဟောကိန်းထုတ်ထားသူတစ်ဦးမှာ အမေရိကန်ရောဂါထိန်းချုပ်ရေးနှင့် တားဆီးကာကွယ်ရေးဌာန (စီဒီစီ) အကြီးအကဲဟောင်း ဒေါက်တာတမ်ဖရက်ဒမ် ဆိုသူ ဖြစ်သည်။

သေဆုံးရဖွယ်

ကိုဗစ်-၁၉ ကူးစက်ရောဂါအပေါ် တုံ့ပြန်ရေးတွင် ကြီးမားသော တိုးတက်အောင်မြင်မှု မရရှိပါက မေလကုန် ထက်နောက်မကျဘဲ လူပေါင်း ၁၀ဝ၀ဝ၀ အထိ သေဆုံးရ ဖွယ်ရှိနေသည်။ ကိုရိုနာဗိုင်းရပ်စ်ရောဂါပိုး ရှိသူနှင့် ထိတွေ့ဆက်ဆံခဲ့ဖူးသူများကို ရှာဖွေဖော်ထုတ်နိုင်ရေး အတွက်လည်းကောင်း၊ ပြည်သူ့ကျန်းမာရေးဝန်ဆောင်မှု လုပ်ငန်းစွမ်းပကား မြင့်မားစေရေးအတွက်လည်းကောင်း ရန်ပုံငွေ တိုးမြှင့်ရရှိရန် လိုအပ်နေသည်ဟု သူက ထောက်ပြ ပြောဆိုသည်။

အမေရိကန်ပြည်ထောင်စု၏ ကူးစက်ရောဂါ တိုက်ဖျက်ရေးလုပ်ငန်းကျွမ်းကျင်ပညာရှင် ဒေါက်တာ အန်ထော်နီဖူစီ သည် လာမည့်ရက်သတ္တပတ်တွင် အထက် လွှတ်တော်(ဆီးနိတ်)၌ ကိုဗစ်-၁၉ အရေး သက်သေထွက် ဆိုရန်ရှိနေသော်လည်း သမ္မတဒေါ်နယ်ထရမ့်၏ တားမြစ် ပိတ်ပင်ချက်ကြောင့် ဒီမိုကရက် ဦးဆောင်သော အောက် လွှတ်တော်ရှေ့မှောက်သို့ ရောက်နိုင်လိမ့်မည် မဟုတ်ချေ။ ဖူစီသည် အိမ်ဖြူတော်၏ ကပ်ရောဂါတိုက်ဖျက်ရေး အထူးလုပ်ငန်းအဖွဲ့၏ ခေါင်းဆောင်လည်းဖြစ်သည်။

ကျန်းမာရေးအရ ခြေချုပ်ချခြင်း အစီအမံများကို ငြင်းဆန်ရာမှ ကပ်ရောဂါကြောင့် သေဆုံးရမှုနှုန်းအရ အမေရိကန်ထက် သာလွန်သောနိုင်ငံမှာ ဆွီဒင်နိုင်ငံဖြစ် သည်ဟု အမေရိကန် ဂျွန်ဟော့ပ်ကင်းတက္ကသိုလ်၏ လေ့လာချက်စစ်တမ်းအရ သိရှိရသည်။

စကင်ဒီနေဗီးယားအရပ်ရှိ ဆွီဒင်နိုင်ငံတွင် ကိုဗစ်၁၉ ရောဂါပိုးကြောင့် သေဆုံးသူ ၃၀၄၀ ရှိရာ လူတစ်သန်း လျှင် ၂၉၇ဒသမ၁၆ ဦးနှုန်း သေဆုံးမှုရှိသည်ဟု ဆို၏။

အမေရိကန်တွင်မူ ကပ်ရောဂါပိုးကြောင့် ၇၄၂၃၉ ဦး သေဆုံးခဲ့ရသဖြင့် လူတစ်သန်းလျှင် ၂၆ ဒသမ ၃၃ ဦးနှုန်း သေဆုံးမှုရှိပေသည်။ စာသင်ကျောင်းအများစု၊ ကုန်ပဒေသာဆိုင်အများစု၊ စားသောက်ဆိုင်အများစုကို ဆက်လက်ဖွင့်လှစ်ထားခဲ့ခြင်းကြောင့် ဆွီဒင်သည် အမေ ရိကန်ထက် ကပ်ရောဂါကြောင့် သေဆုံးမှုနှုန်း ပိုတိုးရခြင်း ဖြစ်ကြောင်း ကျန်းမာရေးပါရဂူများက ထောက်ပြကြ လေသည်။

ကမ္ဘာ့ကပ်ရောဂါဘေးဆိုး တိုက်ဖျက်ရေးလုပ်ငန်းတွင် ရှေ့တန်းမှ ပါဝင်လျက်ရှိကြသော သူနာပြုဆရာမ များ ရောဂါသည်များကို ပြုစုစောင့်ရှောက်ရင်း အသက်ဆုံးရှုံးရသော ဖြစ်ရပ်များမှာ ကြေကွဲဝမ်းနည်းဖွယ်ရာ ဖြစ်လင့် ကစား သူတို့အတွက် လူသားအားလုံးက ဂုဏ်ပြု ထိုက်လှပေသည်။

ရောဂါပိုးကူးစက်ခံရသူဦးရေ ၁၀ဝ၀ဝ ကိုကျော်လွန် သွားခဲ့ပြီဖြစ်သော ဘရာဇီးလ်နိုင်ငံရှိ စောပေါ်လိုမြို့၌ ကျန်းမာရေးဝန်ထမ်း ၁၃ ဦးထက်မနည်း ကိုဗစ်ပိုးကြောင့် သေဆုံးခဲ့ကြရသည်။ ယင်းမြို့ တွင် ကျန်းမာရေးလုပ်သား ၇၁၃ ဦးထက်မနည်း ရောဂါကူးစက်ခံခဲ့ရကာ လုပ်ငန်းခွင် အခြေအနေတိုးတက်အောင် အစိုးရအဖွဲ့က ဆောင်ရွက်ပေး ရန် ကျန်းမာရေးဝန်ထမ်းများက ဆန္ဒပြတောင်းဆိုခဲ့ကြသည်။

ရုရှားနိုင်ငံ၏ ကိုဗစ်-၁၉ ကပ်ရောဂါတိုက်ဖျက်ရေး လုပ်ငန်းတွင် ပါဝင်ကူညီသည့်အနေဖြင့် အသက်ရှူ အထောက်အကူပြုစက်များကို ထောက်ပံ့ပေးမည်ဟု အမေ ရိကန်သမ္မတ ဒေါ်နယ်ထရမ့်က မေ ၇ ရက်တွင် ကမ်းလှမ်းခဲ့သည်။

ကိုရိုနာဗိုင်းရပ်စ်ကူးစက်ရောဂါ၏ ဗဟိုချက်အဖြစ် အမေရိကန် ဆက်လက်ရပ်တည်နေစဉ်မှာပင် ဝေဒနာသည် များ၏ အသက်ကို ကယ်တင်ရာတွင် အရေးကြီးလှသော အသက်ရှူ အထောက်အကူပြုစက်များကို ရုရှားထံပို့ပေး မည်ဟု သမ္မတထရမ့်က ပြောကြားခဲ့ခြင်းဖြစ်သည်။

ရတက်မအေး

အမေရိကန်ပြည်တွင်းတွင် ကပ်ရောဂါဘေးကြောင့် ရတက်မအေးဖြစ်ကြရ၊ အသက်ရှူ အထောက်အကူပြုစက် များအပါအဝင် ကုသရေးအထောက်အကူပြုပစ္စည်း အရပ် ရပ် ထောက်ပံ့ပေးရန် အမေရိကန်ပြည်နယ် အုပ်ချုပ်ရေးမှူး များက သမ္မတထံ မကြာမီက တင်ပြခဲ့ခြင်းကို ပစ်ပယ်ကာ မဟာဗျူဟာအရ ပြိုင်ဘက်ဖြစ်သော ရုရှားနိုင်ငံအား အကူအညီပေးရန် သမ္မတထရမ့်က ကမ်းလှမ်းခဲ့ခြင်း ဖြစ်သည်။

ကိုဗစ်ရောဂါကုသရေး၌ အရေးအပါဆုံးဆေးရုံများတွင် ခုတင်များ အလုံအလောက်မရှိခြင်း၊ ကုသရေး အထောက် အကူပြု စက်ကိရိယာများ ပြည့်စုံမှုမရှိခြင်း၊ လူနာဦးရေနှင့် ကျန်းမာရေးဝန်ထမ်းဦးရေ အချိုးအဆ မျှတ မှုမရှိခြင်းတို့မှာ လူသားတို့၏ ဆုတ်ယုတ်မှုများပင်ဖြစ်သည်။

ပီရူးနိုင်ငံ၌ ကိုဗစ်ဝေဒနာသည်များအတွက် အောက်စီ ဂျင်ဘူးများ ပြတ်လပ်လျက်ရှိပြီး မှောင်ခိုဈေးကွက်တွင် အောက်စီဂျင်ဆလင်ဒါဘူး တစ်ဘူးလျှင် ဒေါ်လာ ၁၀ဝ၀ အထက်တွင်ရှိနေသည်ဆိုသော သတင်းတစ်ပုဒ်မှာ အရင်း အမြစ်ချို့ငဲ့သောနိုင်ငံများ၌ ကပ်ရောဂါတိုက်ဖျက်ရေး စစ်ပွဲတွင် လူသားတို့၏ ဆုတ်ယုတ်မှု တစ်ရပ်ဖြစ်သည်။

ကမ္ဘာ့ကပ်ရောဂါကြောင့် နိုင်ငံတကာတွင် စီးပွားရေး ထိခိုက်ရမှုကို ထင်ဟပ်နေသော သာဓကများ ပိုမိုထင်ရှား ပေါ်လွင်လာနေချိန်တွင် အစိုးရအဖွဲ့အသီးသီးက မိမိတို့၏ နိုင်ငံအလိုက် စီးပွားရေးထိခိုက်မှု သက်သာ လျော့ပါးရေး အစီအစဉ်များကို ချမှတ်ဆောင်ရွက်နေကြပေပြီ၊ ရှောင်လွှဲ၍ မရနိုင်သော စီးပွားရေးထိခိုက်မှုမှ သက်သာစေရန်နှင့် စီးပွားရေး မြန်မြန်ဆန်ဆန် ပြန်လည်နာလန်ထူလာရေးအတွက် ကြိုးပမ်းကြရမည် ဖြစ်သကဲ့သို့ ကပ်ရောဂါအပေါ် အပြီးတိုင်ထိန်းချုပ်နိုင်ရန် ပြည်သူအားလုံး၏ လက်တွဲညီညီ ပါဝင်ဆောင်ရွက်မှုဖြင့် ရှေ့ဆက်ကြရပေမည်။

စီးပွားရေးထိုင်းမှိုင်းနေသော ကာလတစ်ရပ်ကို ကမ္ဘာ တစ်ဝန်းရင်ဆိုင်နေရပြီး ဥရောပနှင့် အမေရိကန် ပြည်ထောင်စု က ကိုဗစ်ကြောင့် စီးပွားရေးအထိနာရသမျှအခြေအနေကို တဖွဲဖွဲ ထုတ်ပြန်လာကြသည်။

အကျပ်အတည်းဆုံး

ကပ်ရောဂါဘေးမှ ရှောင်လွှဲနိုင်ခြင်းမရှိသော ဥရောပနိုင်ငံကြီးတစ်နိုင်ငံမှာ ဂျာမနီနိုင်ငံဖြစ်ပြီး ယင်းနိုင်ငံ၏ စစ်ပြီးခေတ်လွန်ကာလ သမိုင်းကြောင်းတွင် အကျပ်အတည်း ဆုံးကာလတစ်ရပ်ကို ဖြတ်သန်းနေရကြောင်း ဝန်ကြီးချုပ် အိန်ဂျယ်လာ မာကဲလ်က မှတ်ချက်ပြုပြောကြားခဲ့သည်။

ဂျာမနီနိုင်ငံတွင် လွန်ခဲ့သည့် ရက်သတ္တပတ်မှစ၍ နိုင်ငံတစ်ဝန်းတွင် ဈေးဆိုင်ငယ်များကို ပြန်လည် ဖွင့်လှစ် ခဲ့သည်။ ဗောက်စ်ဂွန်ကုမ္ပဏီသည် ယင်း၏စက်ရုံများ အနက် စက်ရုံတစ်ရုံကို ပြန်လည် ဖွင့်လှစ်ခဲ့သည်။ သို့ရာတွင် ကပွဲရုံများနှင့် စားသောက်ဆိုင်များကိုမူ ဆက်လက် ပိတ်ထားရဆဲဖြစ်သည်။

ဂျာမနီနိုင်ငံတွင် ဖြေလျှော့မှုအချို့ ရှိခဲ့သည့်တိုင်အောင် ကပ်ရောဂါပိုးကူးစက်နှုန်းမှာ ဆက်လက်မြင့်တက်နေဆဲ ဖြစ်သည်။ ပြည်သူများ နေအိမ်အတွင်းနေထိုင်ရန်၊ တစ်ဦးနှင့်တစ်ဦး ခပ်ခွာခွာနေထိုင်ရန် ကျန်းမာရေးပါရဂူများက ဆက်လက်တိုက်တွန်းထားသည်။

ဂျာမနီနိုင်ငံသည် စီးပွားရေးအကျပ်အတည်း ဖြစ်လတ္တံ့အချိန်တွင် ထိခိုက်မှုလျှော့ချရန် ကျယ်ကျယ်ပြန့်ပြန့် အစီ အမံ အမျိုးမျိုးကို လျင်မြန်စွာ ဆောင်ရွက်ခဲ့သည်။ အမေရိကန်ပြည်ထောင်စုသည် ကနဦးတွင် တုံ့ဆိုင်း နေသော်လည်း နိုင်ငံသားများထံ တိုက်ရိုက်ငွေသား ထောက်ပံ့ခြင်းအပါအဝင် ဘက်စုံစီးပွားရေးနှိုးဆွမှု ပြုလုပ် ရန် စီစဉ်လျက်ရှိသည်။

ထိုင်း၊ အိန္ဒိယ၊ အင်ဒိုနီးရှားကဲ့သို့ စီးပွားရေး ထွန်းသစ်စနိုင်ငံများသည် စီးပွားရေးနှိုးဆွရေးအစီအမံ များကို စီစဉ်ဆောင်ရွက်နေသည်။ သို့သော် စီးပွားရေး ထွန်းသစ်စနိုင်ငံများနှင့် ဖွံ့ဖြိုးမှုအနည်းပါးဆုံးနိုင်ငံများသည် အသေးစားနှင့် အလတ်စားလုပ်ငန်းများ၊ ကိုယ်တိုင် လုပ်ငန်းရှင်အဖြစ် လုပ်ကိုင်ကြသောလုပ်ငန်းများနှင့် အလုပ်သမားများအတွက် ချမ်းသာသော နိုင်ငံများကဲ့သို့ လူမှုဖူလုံရေး လွှမ်းခြုံ အစီအမံဆောင်ရွက်ပေးနိုင်သည့် ဘဏ္ဍာရေးအနေအထား မရှိကြပါ။

ယင်းအစီအမံများနှင့်လက်ငင်းဆောင်ရွက်ပေးနိုင်ခြေ ရှိသည့် အခြားအစီအမံများသည် စီးပွားရေးကျဆင်းမှုကို ရပ်တန့်စေရန် လုံလောက်မှု ရှိ၊ မရှိမှာ အကျပ်အတည်းကြောင့် ထိခိုက်ပျက်စီးမှု အတိုင်းအတာအပေါ် မူတည် သည်။ ယခင်က ကပ်ရောဂါများ ဖြစ်ပွားပြီးသောအခါ စီးပွား ရေး ခေတ္တမျှ ရုတ်တရက်ကျဆင်းသော်လည်း လျင်မြန်စွာ ပြန်လည်ဖွံ့ဖြိုးလာမြဲဖြစ်သည်။ ကိုရိုနာအကျပ်အတည်းပြီး သောအခါ ဤသို့ဖြစ်မည် မဖြစ်မည်မှာ အကြောင်းအချက် အများအပြားပေါ်တွင် မူတည်သည်။ ကပ်ရောဂါ၏ ကာလကြာရှည်မှုသည်လည်း ယင်းအကြောင်းအချက်များအနက် တစ်ခုအပါအဝင်ဖြစ်သည်။

သို့ရာတွင် ပိုမို၍ စိုးရိမ်ပူပန်သင့်သော ကိစ္စရပ်မှာ ချည့်နဲ့နေသော ငွေကြေးစနစ်များအပေါ် ယခုအခါ ရိုက်ခတ် လျက်ရှိသည့် ထိခိုက်မှုများဖြစ်သည်။ စိုးရိမ်ပူပန်ဖွယ်ရာ ကာလရှည်ထိခိုက်မှုအလားအလာများ ပိုမို၍ အရှိန်မြင့် တက်နေသည်။

ကြွေးမြီ များပြား

အမေရိကန်လုပ်ငန်းစုများနှင့် အိမ်ထောင်စုများ သည် ကြွေးမြီ များပြားလွန်းနေသည်။ တရုတ်နိုင်ငံတွင် စည်းမျဉ်းထိန်းချုပ်မှုမှ ကင်းလွတ်နေသောဘဏ်များ၊ အိမ်ခြံမြေလုပ်ငန်းများ၊ နိုင်ငံပိုင်ကုမ္ပဏီများနှင့် ပြည်နယ် အစိုးရများသည် ကြွေးမြီဝန်ထုပ်ဝန်ပိုးအောက်တွင် ရုန်းကန်လျက်ရှိသည်။

ဥရောပဘဏ်များသည် ယခင် ဘဏ္ဍာရေး အကျပ်အတည်းမှ ပြန်လည်နာလန် မထူသေးပါ။ အီတလီ စီးပွားရေးပြိုလဲသွားပါက ယူရိုငွေကြေး အကျပ်အတည်း နောက်ထပ်တစ်ဖန် ဖြစ်ပေါ်လာနိုင်သည်။ ရင်းနှီးမြှုပ်နှံသူများသည် အာမခံချက်ရှိသော အစိုးရငွေချေး စာချုပ်များအား အများအပြားဝယ်ယူနေခြင်းကို ကြည့်ပါ က ဘဏ္ဍာရေးစနစ် ပြိုလဲသွားမည်ကို အထူးစိုးရိမ် ကြောင့်ကြမှု ရှိနေသည်။

ကိုရိုနာ အကျပ်အတည်းမှအစပြု၍ ကွင်းဆက် တုံ့ပြန်မှုများ ဖြစ်ပေါ်လာပြီး နောက်ဆုံး တစ်ကမ္ဘာလုံး ဘဏ္ဍာရေးအကျပ်အတည်း ဖြစ်လာနိုင်သည်။ ၂၀ဝ၈ ခုနှစ် ဘဏ္ဍာရေးအကျပ်အတည်းနှင့် မတူညီ သည့်အချက်မှာ ဤတစ်ကြိမ်တွင် ဗဟိုဘဏ်များလည်း မကယ်နိုင်သည့်အနေအထားဖြစ်သည်။

ယနေ့အထိ စီးပွားရေးအင်အားကြီးနိုင်ငံများအားလုံးတွင် အတိုးနှုန်းများမှာ သမိုင်းတစ်လျှောက် အနိမ့်ဆုံး အနေအထားအထိ လျှော့ချထားပြီးဖြစ်သည်။ သို့ဖြစ်၍ အမေရိကန်ပြည်ထောင်စု၏ ဗဟိုဘဏ်သည် ငွေသားရှား ပါးမှုကို ဖြေရှင်းပြီး ငွေဖော်နိုင်မှု (liquidity) တိုးမြင့်စေရန် ဈေးကွက်အတွင်း တိုက်ရိုက်ဝင်ရောက်၍ repo transactions ဟုခေါ်သော အစိုးရငွေချေးစာချုပ်များကို ပြန်လည်ရောင်းချပေးရန် သဘောတူညီချက်ဖြင့် ဝယ်ယူလျက်ရှိသည်။

ဥရောပဗဟိုဘဏ်အကြီးအကဲအဖြစ် မကြာသေးမီကမှ တာဝန်ယူခဲ့သော ခရစ်စတင်းလာဂါ့ဒ်သည် အကျပ် အတည်းကို ဥရောပအနေဖြင့် တုံ့ပြန်ရာတွင် ကနဦး၌ ယောင်ဝါးဝါးဖြစ်နေခဲ့ရာ ယူရိုအုပ်စုတစ်ခုလုံး စုစည်း ညီညွတ်မှုပြိုကွဲသွားနိုင်သည်ဟု ခန့်မှန်းတွေးဆချက်များ ပင် ပေါ်ပေါက်ခဲ့သည်။

သို့ရာတွင် ညှိနှိုင်းပေါင်းစပ်ကြားဝင်ဆောင်ရွက်ခြင်းဖြင့် စီးပွားရေးအင်အားကြီးနိုင်ငံများ၏ ဗဟိုဘဏ်များ အားလုံးသည် ယခုအခါ ဈေးကွက်အတွင်း အကြောက်လွန်ခြင်းမဖြစ်စေရန် ဝိုင်းဝန်းရပ်တည်မည်ဖြစ်ကြောင်း သန္နိဋ္ဌာန်ချ လက်တွေ့ဆောင်ရွက်ပြသပြီးဖြစ်သည်။

တိုက်ပွဲဝင်

ကမ္ဘာ့နိုင်ငံအသီးသီးသို့ ချင်းနင်းထိုးဖောက် ဝင်ရောက်တိုက်ခိုက်နေသော ကိုဗစ်-၁၉ ကူးစက်မြန် ရောဂါဘေးမှ ပြည်သူတို့ ကင်းဝေးရလေအောင် အစိုးရ အဖွဲ့များက ရသမျှအရင်းအမြစ်များကို အသုံးချကာ တိုက်ပွဲဝင်နေကြချိန်တွင် စက်ရုံ၊ အလုပ်ရုံများကို ယာယီ ဝိတ်ထားရခြင်း၊ ကုန်စည်ထောက်ပံ့ပို့ဆောင်ရေး ရပ်တန့် သွားခြင်း၊ တစ်ကမ္ဘာလုံးအတိုင်းအတာအရ “ဝယ်လိုအား” ကျဆင်းသွားခြင်း စသည့်အကြောင်း တရားများအရ နိုင်ငံ များမှာ စီးပွားရေးထိခိုက်ရလေသည်။

ဤရွေ့ဤမျှ ဤလောကကို ခြိမ်းခြောက်လှုပ်ခါနေသော ကိုရိုနာဗိုင်းရပ်စ်ပိုးကို အကြောင်းပြု၍ လူမှုရေး၊ စီးပွားရေးတို့အရဆုံးရှုံးနစ်နာမှုကြီးမားစွာဖြစ်ပေါ်လာနိုင် အံ့သောမျက်မှောက်အခြေအနေတွင် “ကိုရိုနာဗိုင်းရပ်စ်" ကို ကမ္ဘာ့ဘုံရန်သူအဖြစ် သတ်မှတ်ကြလျက် နိုင်ငံတကာတွင် အစွမ်းကုန်ချေမှုန်းတိုက်ဖျက်နေကြသည့် တိုင်အောင် ကမ္ဘာ့မဟာအင်အားကြီးနိုင်ငံများပင်မကျန် ကြိုတင် မခန့်မှန်းနိုင်ခဲ့သော ဆိုးကျိုးသက်ရောက် မှုများအား အံကြိတ်ခံနေကြရဆဲဖြစ်ပုံကို ကျွန်ုပ်တွေးတောမိရင်း “အဟုန်ပြင်း စွာရိုက်ခတ် ကိုရိုနာဗိုင်းရပ်စ်” ဟု ကျွန်ုပ် ကျူးရင့်မိပါသတည်း။