နေပြည်တော် ဒီဇင်ဘာလ ၃၀
ကျန်းမာရေးဝန်ကြီးဌာနသည် ပြည်ထောင်စုနယ်မြေ၊ နေပြည်တော်နှင့် တိုင်းဒေသကြီး/ ပြည်နယ်များတွင် ကိုဗစ်-၁၉ ရောဂါကာကွယ်ဆေးကို ဦးတည်အုပ်စုများသတ်မှတ်၍ ဦးစားပေးအစီအစဉ်အလိုက် ကျေးလက်ဒေသများအထိ အားသွန်ခွန်စိုက် ကျယ်ပြန့်စွာ ထိုးနှံပေးလျက်ရှိသည်။
ထိုသို့ထိုးနှံပေးလျက်ရှိရာတွင် ကာကွယ်ဆေးများ ထပ်မံရောက်ရှိမှုအနေဖြင့် အိန္ဒိယ နိုင်ငံမှ ဝယ်ယူထားသည့် COVIDSHIELD အမှတ်တံဆိပ် ကိုဗစ်-၁၉ ရောဂါ ကာကွယ်ဆေး ဒုတိယအသုတ် ၆ ဒသမ ၇ သန်း dosesသည် ရန်ကုန်အပြည်ပြည်ဆိုင်ရာ လေဆိပ်သို့ ယမန်နေ့ ညပိုင်းတွင် ထပ်မံရောက်ရှိလာပြီဖြစ်ရာ စုစုပေါင်း ကာကွယ်ဆေး ၁၃ ဒသမ ၄ သန်း doses ရောက် ရှိပြီး ဖြစ်သည်။
အဆိုပါ ဒုတိယအသုတ်အဖြစ်ရောက်ရှိလာသည့် ရောဂါကာကွယ်ဆေး COVIDSHIELD အမှတ်တံဆိပ် ကာကွယ်ဆေး ၆ ဒသမ ၇ သန်း doses ကို ရန်ကုန်တိုင်း ဒေသကြီး ကုသရေးနှင့်ပြည်သူ့ ကျန်းမာရေး ဦးစီးဌာနမှူး ဦးဆောင်သည့်အဖွဲ့က လက်ခံရယူ သည်။
ကိုဗစ်-၁၉ ရောဂါကာကွယ်ဆေးထိုးနှံပြီးစီးမှုအနေဖြင့် ဒီဇင်ဘာ ၂၈ ရက်အထိ အသက် ၁၈ နှစ် နှင့်အထက်ရှိသူ ၁၃ ဒသမ ၇၈ သန်း ကို နှစ်ကြိမ်အပြည့် ထိုးနှံပေးခဲ့ပြီး ၅ ဒသမ ၃၇ သန်းကို တစ်ကြိမ် ထိုးနှံပေးခဲ့ပြီးဖြစ်သည်။
သို့ဖြစ်၍ ကိုဗစ်-၁၉ ရောဂါ ကာကွယ်ဆေး တစ်ကြိမ်နှင့်အထက် ထိုးနှံပြီးသည့် အသက် ၁၈ နှစ်နှင့်အထက်ရှိသူ စုစုပေါင်း ၁၉ ဒသမ ၁၅ သန်း ခန့်ရှိပြီ ဖြစ်သောကြောင့် ရည်မှန်း လူဦးရေအားလုံး၏ ၅၁ ရာခိုင်နှုန်းကျော်ကို ထိုးနှံပြီးစီးခဲ့ပြီးဖြစ်သည်။
ထို့ပြင် အခြေခံ ပညာကျောင်းများတွင်အသက် ၁၂ နှစ်နှင့် အထက်ရှိ အလယ်တန်း၊ အထက်တန်း ကျောင်းသား/ ကျောင်း သူများကို ကိုဗစ်-၁၉ရောဂါကာကွယ် ဆေးထိုးနှံပေး လျက်ရှိရာ ကျောင်းသား/ ကျောင်းသူ စုစုပေါင်း ၁ ဒသမ ၂၉ သန်းကို နှစ်ကြိမ်အပြည့် ထိုးနှံပေးခဲ့ပြီး ၁၈၈,၈၃၆ ဦးကို တစ်ကြိမ် ထိုးနှံပေးခဲ့ပြီး ဖြစ် ကြောင်း သိရသည်။
ကျန်းမာရေးဝန်ကြီးဌာနအနေဖြင့် ကိုဗစ်-၁၉ ရောဂါ ကာကွယ်ဆေးကို ဝယ်ယူခြင်းမှ ၄၄ ဒသမ ၄ သန်း နှင့် လှူဒါန်းမှုမှ ၁၁ ဒသမ ၉၆ သန်းခန့် စုစုပေါင်း ၅၆ ဒသမ ၃၆ သန်းခန့်ရရှိပြီးဖြစ်သည်။
၂၀၂၂ ခုနှစ်တွင်လည်း ကာကွယ်ဆေး လွှမ်းခြုံမှု ပိုမိုကောင်းမွန်အောင် သတ်မှတ် ဦးတည်အုပ်စုများအလိုက် ဆက်လက်ထိုးနှံပေးသွားမည် ဖြစ်ကြောင်း သိရသည်။
မိဘပြည်သူများအနေဖြင့် မိမိအတွက် ရရှိလာသည့် ကိုဗစ်-၁၉ ရောဂါ ကာကွယ်ဆေးကို မပျက်မကွက် အကြိမ်ပြည့် ထိုးနှံမှုခံယူခြင်း၊ ပထမအကြိမ်ကာကွယ်ဆေး ထိုးနှံမှုရရှိထားသူများ အနေဖြင့်လည်း ဒုတိယအကြိမ် ကာကွယ်ဆေးထိုးနှံမှုကို သတ်မှတ်ရက်တွင် (သို့မဟုတ်) အနီးဆုံး သတ်မှတ်ကာလ အတွင်းတွင် နီးစပ်ရာကာကွယ်ဆေးထိုး စုရပ်များသို့ သွားရောက်၍ ထိုးနှံမှုခံယူခြင်း နှင့် ကာကွယ်ဆေးထိုး လုပ်ငန်းများတွင် တက်ကြွစွာ ပူးပေါင်းပါဝင်ဆောင်ရွက်ကြပါရန် ကျန်းမာရေးဝန်ကြီးဌာနက တိုက်တွန်း နှိုးဆော်ထားသည်။
သတင်းစဉ်
