ပြင်ဦးလွင် ၁၆   ဒီဇင်ဘာ 

မန္တလေးတိုင်းဒေသကြီး၊ ပြင်ဦးလွင်မြို့ရှိ အမျိုးသားကန်တော်ကြီးဥယျာဉ်၏ (၁၄) ကြိမ်မြောက် ပန်းပွဲတော် ဖွင့်ပွဲကို  ဒီဇင်ဘာ  ၁၅ ရက်  နံနက်  ၁၀  နာရီက အမျိုးသားကန်တော်ကြီးဥယျာဉ်အတွင်းရှိ ရင်ပြင်တော်၌ ကျင်းပပြုလုပ်ရာ တိုင်းဒေသကြီးလွှတ်တော် ဒုတိယဥက္ကဋ္ဌနှင့် လွှတ်တော် ကိုယ်စား လှယ်များ၊  (Htoo  Group Of  Companies ) မှ တာဝန်ရှိသူများ ၊ခရိုင်/မြို့နယ်အဆင့် ဌာနဆိုင်ရာ အကြီးအကဲများ၊ လူမှုရေးအသင်းအဖွဲ့များ၊ ဒေသခံပြည်သူများနှင့် ခရီးသွားပြည်သူများ တက်ရောက်ကြသည်။

ရှေးဦးစွာ  အမျိုးသားကန်တော်ကြီးဥယျာဉ် ( ပြင်ဦးလွင်)၏  (၁၄) ကြိမ်မြောက် ပန်းပွဲတော် ဖွင့်ပွဲ အခမ်းအနားကို မီးရှူးမီးပန်းများဖြင့် ပစ်ဖောက်လွှတ်တင်ကာ စတင်ဖွင့်လှစ်ပြီး တိုင်းဒေသကြီး -လွှတ်တော် ဒုတိယ ဥက္ကဋ္ဌ  ဒေါက်တာခင်မောင်ဌေးက (၁၄) ကြိမ်မြောက် ပန်းပွဲတော် ကျင်းပရခြင်း ရည်ရွယ်ချက်ကို ရှင်းလင်းပြောကြားပြီး (Htoo  Group Of  Companies ) မှ တာဝန်ရှိသူတစ်ဦးက အမျိုးသား ကန်တော်ကြီးဥယျာဉ် ( ပြင်ဦးလွင် ) ၏ (၁၄) ကြိမ်မြောက် ပန်းပွဲတော်အား ယခင်နှစ်များနှင့် မတူအောင်  ပန်းအလှဆင်နည်းပညာများ၊ ပန်းစိုက်ပျိုးနည်းပညာများ ၊ ပန်းမျိုးများအကြောင်းကို အသေးစိတ် ရှင်းလင်း ပြောကြားခဲ့သည်။

ဆက်လက်ပြီး  အမျိုးသားကန်တော်ကြီးဥယျာဉ် (ပြင်ဦးလွင်) ၏ (၁၄) ကြိမ်မြောက် ပန်းပွဲတော် ဖွင့်ပွဲ အမှတ်တရ စုပေါင်း မှတ်တမ်းတင် ဓါတ်ပုံရိုက်ကူးပြီး ပန်းအလှဆင် အကများဖြင့် အဖွဲ့လိုက် ကပြဖျော်ဖြေကြပြီး နိုင်ငံကျော်တေးသံရှင်များက ပွဲတော်လာ ပရိတ်သတ်များအား ဧည့်ခံဖျော်ဖြေ ခဲ့ကြောင်း သိရသည်။ 

ဇော်မျိုးထိုက် (ခရိုင်၊ ပြန်/ဆက်)