အမျိုးသားတံခွန်စိုက် (ဝန်ကြီးဌာနပေါင်းစုံ) ပြေးခုန်ပစ်ပြိုင်ပွဲတွင် ပြည်ထဲရေးနှင့် ရန်ကုန်မြို့တော် စည်ပင်သာယာရေး ကော်မတီအသင်း တံခွန်စိုက်ဆုဖလား ဆွတ်ခူး

၂၈ ဖေဖော်ဝါရီ

(၆၄) ကြိမ်မြောက် အမျိုးသားတံခွန်စိုက် (ဝန်ကြီးဌာနပေါင်းစုံ) ပြေးခုန်ပစ်ပြိုင်ပွဲ နောက်ဆုံးနေ့နှင့် ဆုပေးပွဲအခမ်းအနားကို ယနေ့နံနက်ပိုင်းက နေပြည်တော်ရှိ ဝဏ္ဏသိဒ္ဓိဘောလုံးကွင်း၌ ကျင်းပရာ ပြည်ထဲရေးနှင့် ရန်ကုန်မြို့တော်စည်ပင်သာယာရေးကော်မတီအသင်းတို့ တံခွန်စိုက်ဆုဖလားများ ဆွတ်ခူးရရှိခဲ့သည်။

ပြိုင်ပွဲအပြီးတွင် အမျိုးသမီးတံခွန်စိုက်ဆုကို ပြည်ထဲရေး၊ အမျိုးသားတံခွန်စိုက်ဆုကို ရန်ကုန်မြို့တော်စည်ပင်သာယာရေးကော်မတီအသင်း၊ အမျိုးသား+အမျိုးသမီး စုပေါင်းတံခွန်စိုက် ဆုကိုပြည်ထဲရေး အသင်းတို့က ရရှိခဲ့သည်။

အမျိုးသမီးပြိုင်ပွဲတွင် ပြည်ထဲရေးအသင်းက ၁၄၇ မှတ်ဖြင့် ပထမ၊ ကာကွယ်ရေးအသင်းက ၁၃၈ မှတ်ဖြင့် ဒုတိယ၊ ဆောက်လုပ်ရေးအသင်းက ၅၁ ဒသမ ၅ မှတ်ဖြင့် တတိယ၊အမျိုးသားပြိုင်ပွဲတွင် ရန်ကုန်မြို့တော်စည်ပင်သာယာရေးကော်မတီအသင်းက ၁၃၅ မှတ်ဖြင့် ပထမ၊ ပြည်ထဲရေးအသင်းက ၁၀၄ မှတ်ဖြင့် ဒုတိယ၊ ကာကွယ်ရေးအသင်းက ၈၅ မှတ်ဖြင့် တတိယ၊ အမျိုးသား+အမျိုးသမီးစုပေါင်းပြိုင်ပွဲတွင် ပြည်ထဲရေးအသင်းက ၂၄၄ မှတ်ဖြင့် ပထမ၊ ကာကွယ်ရေးအသင်းက ၂၂၃ မှတ်ဖြင့် ဒုတိယ၊ ရန်ကုန်မြို့တော်စည်ပင်သာယာရေးကော်မတီအသင်းက ၁၃၇ မှတ်ဖြင့် တတိယတို့ ရရှိခဲ့သည်။ပြိုင်ပွဲအပြီးတွင် ဆုချီးမြင့်ပွဲ ဆက်လက်ကျင်းပရာ အမျိုးသမီးပြိုင်ပွဲတွင် ဗိုလ်စွဲခဲ့သည့် ပြည်ထဲရေးအသင်း၊ အမျိုးသားပြိုင်ပွဲတွင် ဗိုလ်စွဲခဲ့သည့် ရန်ကုန်မြို့တော်စည်ပင်သာယာရေးကော်မတီအသင်း၊ အမျိုးသား+အမျိုးသမီးပြိုင်ပွဲတွင် ဗိုလ်စွဲခဲ့သည့် ပြည်ထဲရေးအသင်း၊ ပြိုင်ပွဲအမျိုးအစားအလိုက် ဆုရခဲ့သည့်ကစားသမားများအား ကျန်းမာရေးနှင့် အားကစားဝန်ကြီးဌာန ဒုတိယဝန်ကြီး ဒေါက်တာမြလေးစိန်၊ အားကစားနှင့် ကာယပညာဦးစီးဌာန ညွှန်ကြားရေးမှူးချုပ် ဦးမျိုးလှိုင်၊ မြန်မာနိုင်ငံ ပြေးခုန်ပစ်အဖွဲ့ချုပ် ဥက္ကဋ္ဌ ဦးရှိန်ဝင်းနှင့် တာဝန်ရှိသူများက ဆုများပေးအပ်ချီးမြင့်သည်။

သတင်း-ရဲရင့်ရှိုင်း
ဓာတ်ပုံ-ကိုကိုစိုးညွန့်