နေပြည်တော် ဇူလိုင် ၁၄

မန္တလေးတိုင်းဒေသကြီး၊ အမရပူရမြို့နယ်၌ ကိုဗစ်-၁၉ ရောဂါကူးစက်ပြန့်ပွားမှု ကာကွယ် ထိန်းချုပ်ရေးလုပ်ငန်းများ ဆောင်ရွက်ရန်အတွက် ပညာပေးဟောပြောခြင်း၊ အထောက်အကူပစ္စည်းများ လိုက်လံဝေငှခြင်း ဆောင်ရွက်နေသည့် တာဝန်သိပြည်သူများအား နိုင်ငံတော်တည်ငြိမ်အေးချမ်းမှုကို မလိုလားသည့် အကြမ်းဖက်သမားများက ယနေ့နံနက်ပိုင်းတွင် ဆင်ခြင်တုံတရားမဲ့စွာဖြင့် လက်နက်ငယ်ဖြင့် ပစ်ခတ်သတ်ဖြတ်ခဲ့သည့် ဖြစ်စဉ်ဖြစ်ပွားခဲ့သည်။

ဖြစ်စဉ်မှာ မန္တလေးတိုင်းဒေသကြီး၊ အမရပူရမြို့နယ်၊ မြစ်ငယ်မြို့၌ ကိုဗစ်-၁၉ ရောဂါကူးစက်ပြန့်ပွားမှုအား ကာကွယ်၊ ထိန်းချုပ်ရေးလုပ်ငန်းများ ဆောင်ရွက်ရန်အတွက် တာဝန်သိပြည်သူများဖြစ်သည့် ဒေါ်သက်သက်ချို အပါအဝင် ပြည်သူ ၇ ဦးတို့သည် အဆိုပါမြို့ဈေးအဝင်လမ်း၌ ကိုဗစ်-၁၉ ရောဂါများနှင့်ပတ်သက်၍ ပညာပေးဟောပြောခြင်း၊ Mask နှင့် Hand Gel များ ဝေငှခြင်းများ ဆောင်ရွက်နေစဉ် တည်ငြိမ်အေးချမ်းမှုကို မလိုလားသည့် အဖျက်အမှောင့်လုပ်ငန်းများ ဆောင်ရွက်နေသည့် အကြမ်းဖက်အမျိုးသား ၂ ဦးက ဆိုင်ကယ်တစ်စီးဖြင့် ရောက်ရှိလာပြီး (စိစစ်ဆဲ) သေနတ်ဖြင့် ၉ ချက်ခန့် ပစ်ခတ်ထွက်ပြေးသွားခဲ့ကြောင်း သိရှိရသည်။

အဆိုပါပစ်ခတ်မှုကြောင့် ဒေါ်သက်သက်ချိုတွင် ဦးခေါင်းထိမှန်ဒဏ်ရာဖြင့် အဆိုပါနေရာ၌ပင် သေဆုံးခဲ့ပြီး အမျိုးသား ၃ ဦးတွင် လက်နက်ငယ် ထိမှန်ဒဏ်ရာများ ရရှိခဲ့သဖြင့် ဒဏ်ရာရရှိသူများအား မန္တလေးမြို့ အထွေထွေရောဂါကု ပြည်သူ့ဆေးရုံကြီးသို့ ဆေးကုသမှု ခံယူစေလျက်ရှိကြောင်းနှင့် ဖြစ်စဉ်တွင် ပြစ်မှုကျူးလွန်သူများအား အမြန်ဆုံးဖမ်းဆီးရမိရေး လုံခြုံရေးတပ်ဖွဲ့ဝင်များက လိုက်လံရှာဖွေလျက်ရှိကြောင်းနှင့် ထိရောက်စွာ အရေးယူ ဆောင်ရွက်သွားမည်ဖြစ်ကြောင်း သတင်းရရှိသည်။

ပြန်/ဆက်