အင်းတော်ကြီး ၂၈ ဒီဇင်ဘာ
ကချင်ပြည်နယ်၊ မိုးညှင်းမြို့နယ်၊ အင်းတော်ကြီးဒေသ၊ ညောင်ထောက်ကျေးရွာ၊ အောက်ရွှေမှော်၌ မုန်ယိုကာစိတ်ရိုင်းဝင်ပြီး လွတ်မြောက်နေသည့် (၄၉)နှစ်အရွယ် အိမ်မွေးဆင်တစ်ကောင်အား မေ့ဆေးသေနတ်ဖြင့် ပစ်ခတ်ဖမ်းဆီးမည်ဖြစ်ကြောင်း မိုးညှင်းမြို့နယ် အုပ်ချုပ်ရေးဦးစီးဌာနမှ သိရသည်။
အောက်ရွှေမှော်ရွာမှ အောင်ဘုအမည်ရှိ အသက်(၄၉)နှစ်အရွယ် အဆိုပါ အိမ်မွေးဆင်အထီးသည် ပြီးခဲ့သည့်ရက်ပိုင်းက မုန်ယိုကာ စိတ်ရိုင်းဝင်ပြီး ဒေသခံ ရွှေကျင်လုပ်သားများအား နင်းသတ်ခြင်း၊ ရွှေမှော်ပတ်ဝန်းကျင်တွင် နေထိုင်သူများကို အန္တရာယ်ပေးခြင်းများ ပြုလုပ်နေရာ ဆင်ဦးစီးအပါအဝင် သုံးဦးသေဆုံးခဲ့ကြောင်း သိရသည်။
မုန်ယိုနေသည့်ဆင်အား စစ်ကိုင်းတိုင်းဒေသကြီး၊ ကောလင်းမြို့မှ ဆင်ဆရာဝန် ဒေါက်တာမျိုးမင်းအောင် ဦးစီးသည့် ဆင်ဖမ်းအဖွဲ့က ကွန်ဂျီဆင်သုံးကောင်၊ မေ့ဆေးသေနတ် နှစ်လက်ဖြင့် ဒေသခံတာဝန်ရှိသူများနှင့် ပူးပေါင်းကာ ဒီဇင်ဘာ ၂၉ ရက်မှစ၍ လိုက်လံဖမ်းဆီးမည်ဖြစ်ကြောင်း သိရသည်။
ဝင်းနိုင်(ကချင်မြေ)
