နေပြည်တော် မေ ၁၇
အုတ်ဖုတ်လုပ်ငန်းသို့ ခေါ်ဆောင်ကာ ကြွေးမြီဖြင့်နှောင်ဖွဲ့၍ အဓမ္မခိုင်းစေပြီး လုပ်အားခ ခေါင်းပုံဖြတ် ရယူခဲ့သူများကို လူကုန်ကူးမှုဖြင့် အလုပ်နှင့်ထောင်ဒဏ် (၁၀) နှစ်စီချမှတ်ခဲ့ကြောင်း မြန်မာနိုင်ငံရဲတပ်ဖွဲ့မှ သိရသည်။
တနင်္သာရီတိုင်းဒေသကြီး၊ ဘုတ်ပြင်းမြို့နယ်နေ မောင်စိုး၊ မြိတ်မြို့နယ်နေ ဒေါ်ကြည်သန်း နှင့် ဒေါ်မြင့်အေး တို့က မြိတ်မြို့နယ်နေ မောင်----၊ ၁၃နှစ်၊ ၁၁ လ အား ရှမ်းပြည် မီးသွေးလှေတွင် အလုပ်လုပ်ကိုင်ပါက ထိုင်းဘတ် ၂၀၀၀ ရရှိမည်ဟု ပြောဆိုစည်းရုံး၍ ဘုတ်ပြင်းမြို့နယ်၊ ရွှေဂဲညို ကျေးရွာ၊ ကဘင်းချောင်းဘေးရှိ မီးသွေးနှင့် အုတ်ဖုတ်လုပ်ငန်းသို့ ခေါ်ဆောင်ကာ ကြွေးမြီဖြင့်နှောင်ဖွဲ့၍ အဓမ္မအလုပ်ခိုင်းစေကာ ရရှိသော ငွေကြေးအကျိုးအမြတ်များကို ခေါင်းပုံဖြတ်ရယူခဲ့သဖြင့် မြိတ်မြို့မ ရဲစခန်း (ပ) ၁၈၂/၂၀၂၃၊ လူကုန်ကူးမှု တားဆီးနှိမ်နင်းရေး ဥပဒေပုဒ်မ-၃၅ဖြင့် အမှုရေးဖွင့်ခဲ့ပြီး မြိတ်ခရိုင်တရားရုံးသို့ တရားစွဲတင်ပို့ခဲ့ရာ မေ ၁၅ ရက်တွင် တရားခံ မောင်စိုး၊ ဒေါ်ကြည်သန်းနှင့် ဒေါ်မြင့်အေးတို့ကို လူကုန်ကူးမှုတားဆီး နှိမ်နင်းရေး ဥပဒေပုဒ်မ ၃၅ အရ အလုပ်နှင့်ထောင်ဒဏ် (၁၀)နှစ်စီ ချမှတ်ခဲ့ကြောင်း သိရသည်။
(သတင်းစဉ်)
