၇ ဖေဖော်ဝါရီ

ဗင်နီဇွဲလားနိုင်ငံရေးနဲ့ပတ်သတ်ပြီး ဥရောပ ၈ နိုင်ငံနဲ့ လက်တင်အမေရိကားနိုင်ငံ ၅ နိုင်ငံတို့ ဥရုဂွေးနိုင်ငံမြို့တော်မှာ ဒီကနေ့ ကြာသပတေးနေ့မှာ တွေ့ဆုံဆွေးနွေးဖို့ ရှိပါတယ်။ 

ဗင်နီဇွဲလားအတိုက်ခံခေါင်းဆောင် စင်ပြိုင်သမ္မတ ဂွိုက်ဒို စီစဉ်ထားတဲ့ အကူအညီပစ္စည်းတွေကို သမ္မတ မာဒူရိုကိ်ု ထောက်ခံတဲ့ ဗင်နီဇွဲလား စစ်တပ်က နိုင်ငံတွင်းဝင်မရအောင် နယ်စပ်ဂိတ်တွေ ပိတ်ထားပါတယ်။ 

ကိုလံဘီယာ ရေဒီယိုနဲ့ မေးမြန်းခန်းမှာ ဂွိုက်ဒို က ဗင်နီဇွဲလားစစ်တပ်ဟာ လူသားတွေအပေါ်မှာ တစ်ဆံခြည်မျှ  စာနာမှုမရှိတဲ့ အာဏာရှင်စနစ် ကိုရွေးမလား၊ အခြေခံဥပဒေကို ရွေးမလား ဆုံးဖြတ်ရမယ့် အခြေအနေမှာရှိတယ်လို့ ပြောဆိုလိုက်ပါတယ်။ 

အကူအညီပစ္စည်းတွေ တင်ဆောင်ထားတဲ့ ကားတွေက ဗင်နီဇွဲလားနဲ့ ကိုလံဘီယာနယ်စပ်ကို ပြီးခဲ့တဲ့ အင်္ဂါနေ့က ရောက်ရှိစဉ် ဗင်နီဇွဲလားစစ်တပ်က နယ်စပ်ကို ပိတ်လိုက်ခြင်းဖြစ်ပါတယ်။ ဒီလိုလုပ်ဆောင်မှုနဲ့ ပတ်သတ်ပြီး အမေရိကန်နိုင်ငံခြားရေးဝန်ကြီး မိုက်ပွန်ပီယိုက “မာဒူရို ရဲ့ အမိန့်နဲ့ အကူအညီပစ္စည်းတွေကို ပိတ်ထားတာဖြစ်တယ်။ ဆာလောင်နေတဲ့ လူထုဆီကို အကူအညီတွေ ရောက်အောင် ဖွင့်ပေးလိုက်ပါ” လို့ တွစ်တာမှာ ရေးသားထားပါတယ်။ 

ဇန်နဝါရီ ၂၃ စင်ပြိုင်သမ္မတအဖြစ်ကြေငြာထားတဲ့  ဂွိုက်ဒိုကို အမေရိကန်၊ ဗြိတိန်၊ ကနေဒါ၊ ဘရာဇီးနိုင်ငံတွေအပါအဝင် နိုင်ငံပေါင်း ၄၀ ကျော်က ထောက်ခံထားပါတယ်။ 

မာဒူရိုအစိုးရကို ရုရှား၊ တရုတ်၊ တူရကီ၊ ကျူးဘားနဲ့ အီရန်နိုင်ငံတွေ ထောက်ခံနေတာကို တွေ့ရပါတယ်။ 

MDN
ကိုးကား - AFP