ရွှေဘို      ၂၉     စက်တင်ဘာ

စစ်ကိုင်းတိုင်းဒေသကြီး၊ ရွှေဘိုမြို့တွင် စစ်ကိုင်းတိုင်းဒေသကြီးအစိုးရအဖွဲ့နှင့် Globan Biz Link Co;ld တို့ BOT စနစ်ဖြင့်ဆောင်ရွက်မည့် စစ်ကိုင်းတိုင်းဒေသကြီး၏ ပထမဆုံးပြည်သူများအတွက် ဒေသဖွံ့ဖြိုးရေးစီမံကိန်း     (Mixed-use Development) ပန္နက်တင်မင်္ဂလာအခမ်းအနားကို အမှတ်(၁၀)ရပ်ကွက်၊ ဂေါက်ကွင်းလမ်းရှိ အဆိုပါ စီမံကိန်းနေရာမဏ္ဍပ်တွင် ယနေ့နံနက် ၈ နာရီက ကျင်းပပြုလုပ်သည်။

ရှေးဦးစွာ ရွှေဘိုခရိုင်စီမံခန့်ခွဲမှုကော်မတီဥက္ကဌ ဦးကိုကိုအောင်က အဆိုပါစီမံကိန်းကို အမှတ် ၁၀ ရပ်ကွက် ကွင်းအမှတ် (၂၈၁၀)၊ တပ်မြို့တောင်ကွင်းရှိ မြေကွက်အမှတ် (၄/၈၆၄)မြေဧရိယာ(၁၅.၂)ဧကပေါ်တွင် ဆောင်ရွက်ရန် တင်ဒါဖိတ်ခေါ်ရာ Globan Biz Link Co;ld တစ်ခုတည်းသာ လျှောက်လွှာတင်သွင်းခဲ့သည်။ အဆိုပါကုမ္ပဏီကို BOT စနစ်ဖြင့် လုပ်ငန်းအပ်နှံရေးအတွက် ယခုနှစ် ဇူလိုင် ၁၂ ရက်တွင် တိုင်းဒေသကြီးအစိုးရအဖွဲ့ကိုယ်စား တိုင်းဒေသကြီးစည်ပင်သာယာရေးအဖွဲ့နှင့် ကုမ္ပဏီတို့ စာချုပ်ချုပ်ဆိုခဲ့သည်။

အဆိုပါစာချုပ်တွင် ကုမ္ပဏီမှ Shop House၊ Shopping Mall၊ Hotel နှင့် လူနေ အိမ်များဆောက်လုပ်မည်ဖြစ်ပြီး စာချုပ်သက်တမ်းကာလအား (၃၅+၁၀+၁၀) နှစ် သတ်မှတ်ရန်၊ ဆိုင်ခန်းနှင့် ဟိုတယ်များ ဆောက်လုပ်မည့် မြေနေရာ ၇ ဧက အတွက် မြေငှားရမ်းခအား တစ်နှစ်လျှင် ၂၇၅ သိန်းနှုန်းဖြင့် ၅ နှစ် လျှင် တစ်ကြိမ် (၁၀) ရာခိုင်နှုန်းထက်မများသော အတိုး၊ အလျော့ပြုလုပ်ပြင်ဆင်သတ်မှတ်ရန်၊ ကုမ္ပဏီမှဆိုင်ခန်းရှင် များအပေါ် ငှားရမ်းခ၏ ၃ ရာခိုင်နှုန်းအား ကောက်ခံ၍ ရွှေဘိုမြို့နယ်စည်ပင်သာယာရေးကော်မတီသို့ ပေးသွင်းစေရန်၊ တည်ဆောက်ရေးကာလအား ၃ နှစ်သတ်မှတ်ရန်၊ ကျန်မြေ ၈.၂ ဧက ပေါ်တွင် လူနေအိမ်များဆောက်လုပ်ခြင်းလုပ်ငန်း နှင့်ပတ်သက်၍ ကုမ္ပဏီနှင့် စည်ပင် အကျိုးတူရပိုင်ခွင့်အား ကုမ္ပဏီက ၇၅ ရာခိုင်နှုန်းနှင့် စည်ပင်က ၂၅ ရာခိုင်နှုန်း သတ်မှတ်ရန် ၊ စည်ပင်သာယာရေးကော်မတီသို့ ပေးချေရမည့် ၂၅ ရာခိုင်နှုန်းကို အရစ်ကျစနစ်ဖြင့် ၃ နှစ်ခွဲ၍ ပေးသွင်း ရန်နှင့် စီမံကိန်းကာလတတိယနှစ်တွင် ၃၀ ရာခိုင်နှုန်းအားလည်းကောင်း၊ စတုတ္ထနှှစ်တွင် ၃၀ ရာခိုင်နှုန်းအား လည်းကောင်း၊ ပဉ္စမနှစ်တွင် ကျန် ၄၀ ရာခိုင်နှုန်းအားလည်းကောင်း ပေးချေရန်နှင့် CSR လုပ်ငန်းများအား သက်ဆိုင် ရာဒေသတွင် ၂ ရာခိုင်နှုန်းထက်မနည်းဆောင်ရွက်ပေးရန် စသည့် အချက်များကို ထည့်သွင်းချုပ်ဆိုခဲ့သည်။

ထို့နောက် ငှားရမ်းသည့်ကာလကုန်ဆုံးသွားပါကလည်း BOT စနစ်ဖြစ်သည့်အတွက် မြေနှင့်အဆောက် အဦအားလုံးကို ကုမ္ပဏီမှ အစိုးရသို့ ပြန်လည်လွှဲပြောင်းပေးရမည်ဖြစ်သည့်အတွက် ကုမ္ပဏီက ရင်းနှီးမြှုပ်နှံပေး ထားသော အဆိုပါမြေနှင့် အဆောက်အဦများကို အစိုးရမှ လိုအပ်သလို ဆက်လက်စီမံခန့်ခွဲနိုင်မည်ဖြစ်ကြောင်း ပြောကြားခဲ့သည်။ ဆက်လက်၍ Globan Biz Link Co;ld ဥက္ကဌ ဦးဇော်မင်းထွန်းက ကုမ္ပဏီမှ ဆောင်ရွက်မည့် ဆောက်လုပ်ရေးလုပ်ငန်းစဉ်များကို ရှင်းလင်းတင်ပြခဲ့ပြီး မင်္ဂလာအချိန်တော်တွင် စစ်ကိုင်းတိုင်းဒေသကြီးဝန်ကြီးချုပ် ဒေါက်တာမြင့်နိုင်၊ တိုင်းအစိုးရအဖွဲ့ဝန်ကြီးများ၊ ရန်ကုန်တိုင်းဒေသကြီးအမျိုးသားလွှတ်တော်ကိုယ်စားလှယ် ဦးကျော်ထွေး ၊ ရွှေဘိုခရိုင်စီမံခန့်ခွဲမှုကော်မတီဥက္ကဌ ဦးကိုကိုအောင်နှင့် တာဝန်ရှိသူများမှ ပန္နက်ရိုက်ဆောင်ရွက်ခဲ့ ကြောင်းသိရသည်။

ထွန်းမြင့်အောင်(ရွှေဘို)