ဆလုံ(မော်ကင်း)လူမျိုးများ၏ ရိုးရာဓလေ့၊ အကအလှများနှင့် အစားအစာများကို မြိတ်မြို့တွင် ကျင်းပသည့် ပြည်ထောင်စုနေ့ အထိမ်းအမှတ် ရိုးရာယဉ်ကျေးမှု အကအလှဖျော်ဖြေပွဲနှင့် ဈေးရောင်းပွဲတွင် ထည့်သွင်းကျင်းပ

မြိတ် ၁၃ ဖေဖော်ဝါရီ

တနင်္သာရီတိုင်းဒေသကြီးရှိ ဆလုံ(မော်ကင်း)လူမျိုးများ၏ ရိုးရာဓလေ့နှင့် အစားအစာများကို ဖေဖော်ဝါရီလ (၁၂)ရက် ညပိုင်း၌ Myeik Seaview Mall တွင် ကျင်းပသည့် ပြည်ထောင်စုနေ့အထိမ်းအမှတ် ရိုးရာယဉ်ကျေးမှု အကအလှဖျော်ဖြေပွဲနှင့် ဈေးရောင်းပွဲတွင် ထည့်သွင်းပြသပေးခဲ့ကြောင်း သိရသည်။

“ အဓိကကတော့ ဆလုံ(မော်ကင်း)လူမျိုးတွေရဲ့ ရိုးရာဓလေ့ ဝတ်စားဆင်ယင်မှု အစားအစာတွေကို ပြည်သူလူထု သိရှိစေရန် စားသောက်ဆိုင်လုပ်ငန်းရှင်များအသင်းနှင့် FFI တို့ပူးပေါင်း၍ စီစဉ် ဖြစ်တာပါ။ မြိတ်မြို့မှာ ပထမဦးဆုံး ကျင်းပတာဖြစ်ပါတယ်။ ယခင်က မကြုံလက်ကျေးရွာမှာ မော်ကင်း ပြတိုက်ငယ် ကျင်းပတာတော့ ကြားဖူးပါတယ်။ ဆလုံလူမျိုးများကိုယ်တိုင် ရိုးရာကိုဖော်ထုတ်တာ တန င်္သာရီတိုင်းမှာ ပထမဆုံးဖြစ်ပါတယ်” ဟု FFI မှ ဒေါ်မူယာအေး က ပြောသည်။

ဆလုံ (မော်ကင်း)လူမျိုးများ၏ ရိုးရာဓလေ့ပြခန်းနှင့် အစားအစာများကို ဆလုံလူမျိုးများမှ ရိုးရာ ဝတ်စား ဆင်ယင်ကာ ပြသရောင်းချလျက်ရှိရာ ဈေးရောင်းပွဲတော်လာရောက်ကြသည့် ပြည်သူများ၊ နိုင်ငံခြားသားများက စိတ်ဝင်တစား ကြည့်ရှုလေ့လာကြပြီး ဆလုံလူမျိုးများ၏ ရိုးရာဓလေ့ထုံးတမ်းများ၊ နေထိုင်မှုပုံစံများကို မေးမြန်း ကြကြောင်း သိရသည်။

ပြည်ထောင်စုနေ့ အထိမ်းအမှတ် ရိုးရာယဉ်ကျေးမှု အကအလှဖျော်ဖြေပွဲနှင့် ဈေးရောင်းပွဲတော်ကို တိုင်းဒေသကြီး လွှတ်တော်ကိုယ်စားလှယ် ဦးဖြိုးဝင်းထွန်း ၊ စည်ပင်သာယာရေးကော်မတီ ဥက္ကဋ္ဌ ဦးမြတ်ကိုကိုနှင့် တာဝန်ရှိသူများက ဖဲကြိုးဖြတ်ဖွင့်လှစ်ခဲ့ကြသည်။ အဆိုပါပွဲတော်ကို မြိတ်ခရိုင် စားသောက်ဆိုင် လုပ်ငန်းရှင်များ အသင်းမှ ကြီးမှူးကျင်းပခဲ့ခြင်းဖြစ်သည်။

ရိုးရာယဉ်ကျေးမှု အကအလှဖျော်ဖြေပွဲတွင် ပြည်ထောင်စုနေ့ညပိုင်း၌ ပြည်ထောင်စုတေး သီချင်းများဖြင့် ကျောင်းသား/သူများက တေးသရုပ်ဖော် ကပြဖျော်ဖြေခြင်း၊ ဆလုံလူမျိုးများ၏ ရိုးရာ အကအလှများဖြင့် ဖျော်ဖြေတင်ဆက်ခဲ့ကြရာ ကျိတ်ကျိတ်တိုး စည်ကားခဲ့သည်။ ထို့အတူ ဗိုလ်ချုပ် မွေးနေ့ ညပိုင်းတွင်လည်း ပြည်ထောင်စု တေးသီချင်းများဖြင့် ကျောင်းသား/သူများက ဆက်လက် ဖျော်ဖြေသွားမည်ဖြစ်ကြောင်း သိရသည်။

ဈေးရောင်းပွဲတော်တွင် ဆိုင်ခန်းပေါင်း(၆၅)ခန်းဖြင့် ပြသရောင်းချလျက်ရှိပြီး ၎င်းဆိုင်ခန်းများ တွင် ရိုးရာအစားအစာများ၊ ဒေသအစားအစာများ၊ တိုင်းရင်းသားဝတ်စုံများနှင့် အဝတ်အထည်များ၊ အသုံးအဆောင် ပစ္စည်းများကို ဖေဖော်ဝါရီလ (၁၃)ရက်နေ့ ညအထိ ရောင်းချပေးလျက်ရှိသည်။

ခိုင်ထူး (မြိတ်ပြန်/ဆက်)