နေပြည်တော်၊ ဖေဖော်ဝါရီ ၈
(၆၂)ကြိမ်မြောက် တောင်သူနည်းပညာဆွေးနွေးပွဲကို ယနေ့နံနက်ပိုင်းက နေပြည်တော် ဇေယျာသီရိမြို့နယ်ရှိ စိုက်ပျိုးရေးသုတေသနဦးစီးဌာန နဝရတ်ခန်းမ၌ ကျင်းပပြုလုပ်သည်။
ဆွေးနွေးပွဲသို့ စိုက်ပျိုးရေး မွေးမြူးရေးနှင့် ဆည်မြောင်းဝန်ကြီးဌာန ဒုတိယဝန်ကြီး ဒေါက်တာတင်ထွဋ်နှင့် ဌာနဆိုင်ရာတာဝန်ရှိသူများ၊ သုတေသီများနှင့် လယ်ဝေးမြို့နယ်မှ တောင်သူများ တက်ရောက်ကြပြီး တိုင်းဒေသကြီး၊ ပြည်နယ်အသီးသီးမှ စိုက်ပျိုးရေးပညာရှင် ၂၅၀ နှင့် တောင်သူဦးရေ ၃၀၀တို့ က အွန်လိုင်းစနစ်ဖြင့် ( Zoon Point ၁၀၀) မှ ပါဝင်တက်ရောက်ဆွေးနွေးကြသည်။
ဆွေးနွေးပွဲတွင် ဒုတိယဝန်ကြီးက စိုက်ပျိုးရေးကဏ္ဍ ဖွံ့ဖြိုးတိုးတက်ရေးအတွက် ပြောင်းလဲလာသည့် ရာသီဥတုအခြေအနေများနှင့် မမျှော်မှန်းနိုင်သည့် စိန်ခေါ်မှုများကို ရင်ဆိုင်နိုင်ရေးအတွက် သင့်လျော်သည့် စိုက်နည်းစနစ်များ အသုံးပြုစိုက်ပျိုးနိုင်ရေးသည် အရေးကြီးပါကြောင်း၊ ဥပမာနေဖြင့် ရေကြီးခြင်း၊ ရေလိုအပ်ခြင်းတို့အား ချိန်ညှိနိုင်ရန်အတွက် ဘောင်ကြီးတင်စနစ် အသုံးပြုစိုက်ပျိုးရန် တွန်းအားပေးဆောင်ရွက်လျက်ရှိသကဲ့သို့ နေပြည်တော်ကောင်စီနယ်မြေအတွင်း ရေကြီးနစ်မြုပ်ခဲ့သည့် လယ်ကွက်များတွင် ထယ်ရေးမဲ့ စိုက်ပျိုးသည့်စနစ်အား သုတေသနပြု သရုပ်ပြစိုက်ပျိုးပြသထားရာ မျက်မြင်အဖြေအရ ပဲယင်း၊ ပြောင်း၊ နေကြာ၊ ပဲပိစပ် သီးနှံများ အောင်မြင်ဖြစ်ထွန်းပြီး ပဲယင်းသီးနှံက အောင်မြင်မှု အများဆုံး တွေ့ရှိရကြောင်းနှင့် တောင်သူများအနေဖြင့်လည်း အားလုံး ပူးပေါင်းပါဝင် ဆောင်ရွက်စေလိုကြောင်း ပြောကြားသည်။
ထို့နောက် မကွေးတိုင်းဒေသကြီး ဒုတိယတိုင်းဦးစီးမှူး ဦးငွေဆန်း က မကွေးတိုင်းဒေသကြီး၏ ဆီထွက်သီးနှံ စိုက်ပျိုးထုတ်လုပ်မှု အခြေအနေနှင့် မိုးကြိုနှမ်း (နွေနှမ်း) သီးနှံ စိုက်ပျိုးထုတ်လုပ်မှု တိုးတက်မြင့်မားရေး ကြိုးပမ်းဆောင်ရွက်မှုများကို တင်ပြဆွေးနွေးသည်။
ဆက်လက်၍ ဆွေးနွေးပွဲတက်ရောက်လာကြသူများ၏ မေးမြန်းချက်များအပေါ် ဒုတိယဝန်ကြီး က သီးနှံရိတ်သိန်းချိန် အလေအလွင့်နည်းအောင် ရိတ်သိမ်းကြရန်နှင့် သီးနှံများ ရောင်းချရာတွင် စုပေါင်းရောင်းချသည့် အလေ့အကျင့်ကို ကျင့်သုံးကြရန် ဖြည့်စွက်ဆွေးနွေးခဲ့ကြောင်း သိရသည်။
သတင်းစဉ်
