လော့စ်အိန်ဂျလိစ် ဖေဖော်ဝါရီ ၂၆
ကနဦးတွင် အန္တရာယ်ရှိနိုင်သည်ဟု သတ်မှတ်ထားသော ဂြိုဟ်သိမ် ၂၀၂၄ ဝိုင်အာရ် ၄ သည် ၂၀၃၂ ခုနှစ်နှင့် ယင်းနောက်ပိုင်းတွင် ကမ္ဘာကို အန္တရာယ်မပေးနိုင်တော့ကြောင်း နာဆာက အတည်ပြု ပြောကြားလိုက်သည်။
ဘောလုံးကွင်းတစ်ကွင်း အရွယ်အစားခန့်ရှိသော ကမ္ဘာနှင့် အနီးရှိ အဆိုပါဂြိုဟ်သိမ်ကို ယမန်နှစ် ဒီဇင်ဘာလတွင် ပထမဆုံးအကြိမ် တွေ့ရှိခဲ့ခြင်းဖြစ်သည်။ ကျွမ်းကျင်သူများသည် ယခင်က ကမ္ဘာကို ဂြိုဟ်သိမ်ဝင်တိုက်နိုင်ခြေ ၃ ရာခိုင်နှုန်းရှိသည်ဟု ခန့်မှန်းခဲ့ကြသော်လည်း ပြီးခဲ့သည့်သီတင်းပတ်တွင် ၀ ဒသမ ၂၈ ရာခိုင်နှုန်း သာ ရှိတော့သည်ဟု ဆိုသည်။
နာဆာ၏ နောက်ထပ်စောင့်ကြည့်လေ့လာဆန်းစစ်မှုများအရ ၂၀၃၂ ခုနှစ် ဒီဇင်ဘာ ၂၂ ရက်တွင် ဂြိုဟ်သိမ်၏သက်ရောက်မှု အလားအလာမှာ ၀ ဒသမ ၀၀၄ ရာခိုင်နှုန်းသာရှိတော့မည်ဖြစ်ကြောင်း ကမ္ဘာအနီး အရာဝတ္ထုလေ့လာရေးဆိုင်ရာ စင်တာက ပြောသည်။
သို့သော်လည်း လကို ရိုက်ခတ်နိုင်သည့် အလားအလာ ၁ ဒသမ ၇ ရာခိုင်နှုန်း ရှိနေသေးကြောင်း ဆိုသည်။ နာဆာသည် ဂြိုဟ်သိမ် ၂၀၂၄ ဝိုင်အာရ် ၄ နှင့်ပတ်သက်ပြီး စောင့်ကြည့်လေ့လာမှုများ ဆက်လက်လုပ်ဆောင်သွားမည်ဖြစ်သည်။
ဆင်ဟွာ
