ဂျပန်ဘာသာဆရာဖြစ်မွမ်းမံသင်တန်း ဖွင့်ပွဲအခမ်းအနားကျင်းပ

ရန်ကုန် ၇ ဒီဇင်ဘာ

မြန်မာနိုင်ငံတွင် ဂျပန်ဘာသာသင်ကြားသူများအား ပိုမိုထိရောက်သော သင်ကြားရေးနည်းလမ်းများကို သင်ကြားနိုင်ရန် မြန်မာဂျပန်ဘာသာ ဆရာ ဆရာမများ အတွက် ရည်ရွယ်၍ ဂျပန်ဖောင်ဒေးရှင်းနှင့် မြန်မာနိုင်ငံဂျပန် ဘာသာပညာရေး၏ အဓိကအခန်းကဏ္ဍမှပါဝင်သော ရန်ကုန်နိုင်ငံခြား ဘာသာတက္ကသိုလ်တို့ ပူးပေါင်းဖွင့်လှစ်သည့် ဂျပန်ဘာသာဆရာဖြစ် မွမ်းမံသင်တန်း (Training Program for Japanese-Language Teachers) ဖွင့်ပွဲအခမ်းအနားကို ယနေ့နံနက် ၁၁ နာရီခွဲတွင် ရန်ကုန်မြို့ ရန်ကုန်နိုင်ငံခြားဘာသာ တက္ကသိုလ်၌ ကျင်းပသည်။

ရှေးဦးစွာ ဂျပန်ဘာသာအထူးပြု ကျောင်းသား ကျောင်းသူများက ဂျပန်ရိုးရာအကများဖြင့် ဖျော်ဖြေ တင်ဆက်ကြသည်။

ယင်းနောက် ပညာရေးဝန်ကြီးဌာန ပြည်ထောင်စုဝန်ကြီး ဒေါက်တာမျိုးသိမ်းကြီးက မြန်မာနိုင်ငံမှ လူငယ်များအနေဖြင့် ဂျပန်ဘာသာကို သင်ယူလိုသူများစွာရှိပါကြောင်း၊ ပညာရေးဝန်ကြီးဌာနအနေဖြင့် ဂျပန်ဘာသာ ကို စိတ်ဝင်တစား သင်ယူလိုသည့် လူငယ်များကို ဖြည့်ဆည်းပေးသည့်အနေဖြင့် ယနေ့ဖွင့်လှစ်သည့် သင်တန်းသည် အရေးပါကြောင်း၊ ဂျပန်ဘာသာဌာနကို နိုင်ငံခြားဘာသာသိပ္ပံအမည်ဖြင့် ၁၉၆၄ ခုနှစ်ကတည်းက တည်ရှိခဲ့ပြီး ၁၉၉၇ ခုနှစ်တွင် ရန်ကုန်နိုင်ငံခြားဘာသာတက္ကသိုလ်အဖြစ် အဆင့်တိုးမြှင့်ဖွင့်လှစ်ခဲ့ပြီး ၂၀ဝ၀ ပြည့်နှစ်တွင် ဂျပန်ဘာသာ ရပ်ကို ဝိဇ္ဇာဘွဲ့ကြိုသင်တန်းအဖြစ် စတင်ဖွင့်လှစ်ခဲ့ပါကြောင်း၊ ရန်ကုန်နိုင်ငံခြားဘာသာ တက္ကသိုလ်နှင့် မန္တလေး နိုင်ငံခြားဘာသာတက္ကသိုလ်များတွင် ဂျပန်ဘာသာကို သင်ကြားပေးနေသည့် အခွင့်အလမ်းများရှိသကဲ့သို့ ၂၀၁၂ ခုနှစ်တွင် ပုဂ္ဂလိက ဂျပန်ဘာသာ သင်တန်းကျောင်း ၄၄ ကျောင်းမှ ၂၀၁၅ ခုနှစ်တွင် ၁၃၂ ကျောင်းအထိ တိုးတက်များပြားလာခဲ့ပါကြောင်း၊ ထို့ပြင် ပုဂ္ဂလိက ဂျပန်ဘာသာကျောင်းများတွင် ဆရာဦးရေသည် ၂၀၁၂ ခုနှစ် တွင် ၁၉၄ ဦးရှိခဲ့ပြီး ၂၀၁၅ ခုနှစ်တွင် ၅၂၄ ဦးအထိ များပြားလာခဲ့ပါကြောင်း၊ ဂျပန်ဘာသာအရည်အချင်းစစ် စာမေးပွဲကို ဖြေဆိုသူများသည် လွန်ခဲ့သည့် ၅ နှစ်ကထက် ၅၀ ရာခိုင်နှုန်းများပြားလာခဲ့သည်ကို တွေ့ရှိရမည်ဖြစ်ပါကြောင်းဖြင့် ပြောကြားသည်။

ဆက်လက်၍ ပြည်ထောင်စုဝန်ကြီးက ၂၀၁၇ ခုနှစ်တွင် ဂျပန်ဘာသာ အရည်အချင်းစစ် ဖြေဆိုသူ(၂၁၉၂၃) ဦး အထိရှိခဲ့ပြီး ကမ္ဘာ့အဆင့် ၆ အထိ ရှိသည်ဟု ဂျပန်ဖောင်ဒေးရှင်း၏ထုတ်ပြန်ချက်အရ သိရှိရပါကြောင်း၊ ယင်းသို့ တိုးတက်များပြားလာသည့် ကျောင်းသား ကျောင်းသူများ၏ လိုအပ်ချက်အရ ဖြည့်ဆည်းပေးရန် အရည်အချင်း ပြည့်မီသည့် ဂျပန်ဘာသာသင်ကြားပို့ချသည့် ဆရာ ဆရာမများကို မွေးထုတ်ပေးရန်ဖြစ်သည့်အတွက် ရန်ကုန် နိုင်ငံခြားဘာသာတက္ကသိုလ်နှင့် မန္တလေးနိုင်ငံခြားဘာသာတက္ကသိုလ်တို့က အဓိကဖြစ်ပါကြောင်း၊ ဂျပန်ဘာသာ ဆရာဖြစ်မွမ်းမံသင်တန်းဖွင့်လှစ်ရန် ဂျပန်ဖောင်ဒေးရှင်းနှင့် ပူးပေါင်းဆောင်ရွက်ခဲ့ပါကြောင်း၊ ရန်ကုန်နိုင်ငံခြားဘာသာ တက္ကသိုလ် ဂျပန်ဘာသာဌာနတွင် တာဝန်ထမ်းဆောင်လျက်ရှိသည့် ဆရာ ဆရာမ အများစုသည် ဂျပန်ဖောင်ဒေးရှင်း၏ ဆရာဖြစ်သင်တန်းကို တက်ရောက်အောင်မြင်ခဲ့ပြီး ဖြစ်ပါကြောင်း၊ ဂျပန်ဘာသာ ဆရာဖြစ်မွမ်းမံသင်တန်းကို ၂၀၁၈ ခုနှစ်တွင် မြန်မာနိုင်ငံ၊ အိန္ဒိယနိုင်ငံနှင့် ဗီယက်နမ်နိုင်ငံများတွင် ဖွင့်လှစ်ရန်စီစဉ်ထားပြီး ယခုဖွင့်လှစ်ခြင်းဖြစ်သည်ဟု သိရှိရပါကြောင်း၊ ထိုသို့ဖွင့်လှစ်နိုင်ခြင်းဖြင့် နှစ်နိုင်ငံချစ်ကြည်ရင်းနှီးမှု၊ ယဉ်ကျေးမှုပူးပေါင်းဖလှယ်မှုများအတွက် အရေးကြီးပါကြောင်း၊ ဂျပန်နိုင်ငံသည် နည်းပညာမြင့်မားသည့် နိုင်ငံဖြစ်ပါကြောင်း၊ ဂျပန်နိုင်ငံနှင့် ပူးပေါင်းဆောင်ရွက်ရာတွင် မိမိတို့နိုင်ငံအနေဖြင့် ကြိုးပမ်းအကောင်အထည်ဖော်ဆောင်ရွက်လျက်ရှိပြီး နှစ်နိုင်ငံ လူငယ်များ၏ အနာဂတ်များကို မြှင့်တင်ဆောင်ရွက်ရန် အရေးကြီးပါကြောင်းဖြင့် ပြောကြားသည်။

ထို့နောက် ဂျပန်သံရုံးမှ Chief of Mission ဖြစ်သူ Mr.Toru Maeda ရန်ကုန်နိုင်ငံခြားဘာသာတက္ကသိုလ် ပါမောက္ခချုပ် ဒေါက်တာကြည်ရွှင်နှင့် ဂျပန်ဖောင်ဒေးရှင်းမှ Executive Director Mr.Noriyuki Matsukawa တို့က နှုတ်ခွန်းဆက်စကား ပြောကြားသည်။

ယင်းနောက် သင်တန်းတွင် သင်ကြားပို့ချမည့် ရန်ကုန်နိုင်ငံခြားဘာသာတက္ကသိုလ်နှင့် ဂျပန်ဖောင်ဒေးရှင်းမှ ဆရာ ဆရာမများမှ မိတ်ဆက်စကားပြောကြားပြီး မှတ်တမ်းတင် ဓာတ်ပုံရိုက်ကူးကြသည်။

အဆိုပါ ဂျပန်ဘာသာဆရာဖြစ်မွမ်းမံသင်တန်း သင်တန်း ပထမနှစ်ဝက်ကို ၂၀၁၈ ခုနှစ် ဒီဇင်ဘာလမှ ၂၀၁၉ ခုနှစ် မတ်လအထိ လည်းကောင်း သင်တန်းဒုတိယနှစ်ဝက်ကို ၂၀၁၉ ခုနှစ် ဇွန်လမှ စက်တင်ဘာလအထိ လည်းကောင်း ဖွင့်လှစ်ပို့ချသွားမည်ဖြစ်ကြောင်း သိရသည်။

ဆက်လက်၍ ပြည်ထောင်စုဝန်ကြီးသည် မွန်းလွဲပိုင်းတွင် ရန်ကုန်နိုင်ငံခြားဘာသာတက္ကသိုလ်မှ ဘာသာ ရပ်ဆိုင်ရာ ပါမောက္ခ(ဌာနမှူး)များ၊ ဆရာ ဆရာမများ၊ ဝန်ထမ်းများနှင့်လည်းကောင်း၊ ရန်ကုန်တက္ကသိုလ် သိပ္ပံဘာသာရပ်ဌာနများမှ ဆရာ ဆရာမများနှင့် တွေ့ဆုံဆွေးနွေးခဲ့ကြောင်း သတင်းရရှိသည်။

(သတင်းစဉ်)