အမေရိကန်ပြည်ထောင်စု၏ ဂျပန်နိုင်ငံနှင့် ကုန်သွယ်မှုလိုငွေမှာ များပြားလွန်းကြောင်း၊ အမေရိကန်ပြည်ထောင်စုအနေဖြင့် ကုန်ထုတ်လုပ်မှုကို တိုးမြှင့်ရမည်ဖြစ်ကြောင်း အမေရိကန်သမ္မတ ဒေါ်နယ်ထရန့်က ပြောကြားသည်။
ယမန်နေ့က အိမ်ဖြူတော်တွင် စီးပွားရေးလုပ်ငန်းရှင်များနှင့်ပြုလုပ်သည့် အလုပ်အကိုင်ပြဿနာများအကြောင်း ဆွေးနွေးသည့် အစည်းအဝေးတစ်ခုအတွင်း ထရန့်က ပြောကြားခဲ့ခြင်းဖြစ်သည်။
ကုမ္ပဏီများစွာ အမေရိကန်ပြည်ထောင်စုသို့ ဝင်ရောက်လုပ်ကိုင်လျက်ရှိကြောင်း၊ ဂျပန်ဝန်ကြီးချုပ် ရှင်ဇိုအာ ဘေးနှင့်တွေ့ဆုံစဉ် အမေရိကန်ပြည်ထောင်စုသို့ စက်ရုံ ၇ ရုံကျော် လာရောက်ဖွင့်လှစ်ရန် ပြောကြားခဲ့ကြောင်း ထရန့်က ပြောကြားသည်။ ထရန့်က အသေးစိတ်ကိုမူ ရှင်းပြခြင်း မရှိခဲ့ပေ။
၂၀၁၈ခုနှစ်အတွင်း အမေရိကန်နိုင်ငံ၏ ဂျပန်နိုင်ငံနှင့် ကုန်သွယ်မှုလိုငွေပြမှုမှာ စုစုပေါင်းမှာ အမေရိကန်ဒေါ်လာ ၆၇ ဒသမ ၆ ဘီလီယံရှိပြီး ယမန်နှစ်ကထက် အနည်းငယ်လျော့နည်းသွားကြောင်း အမေရိကန်ပြည်ထောင်စုရှိ အချက်အလက်များက ဖော်ပြခဲ့သည်။
တတ်နိုင်သမျှ အမြန်ဆုံး ဂျပန်နိုင်ငံနှင့် နှစ်နိုင်ငံကုန်သွယ်ရေးဆွေးနွေးပွဲစတင်ရန် အမေရိကန်အစိုးရက မျှော်လင့်လျက်ရှိသည်။ အမေရိကန်နိုင်ငံ၏ ဘဏ္ဍာရေးလိုငွေပြမှုကို လျော့ချရန်အတွက် ဂျပန်နိုင်ငံထံမှ မော်တော်ကားနှင့် အခြားကုန်ပစ္စည်းတင်သွင်းမှုများ အမေရိကန်က လျော့ချလိုသည်။
ကိုးကား-အန်အိတ်ချ်ကေ
ဘာသာပြန်-မေဇော်ထက်
