၅ နိုဝင်ဘာ
ထရပ်အအေးကားတစ်စီးအတွင်း ပုန်းအောင်းလိုက်ပါလာသော တရားမဝင် ရွှေ့ပြောင်းလာသူ ၄၁ ဦးကို ဂရိရဲတပ်ဖွဲ့က ရှာဖွေတွေ့ရှိခဲ့သည်။
ယမန်နေ့က ဂရိနိုင်ငံမြောက်ပိုင်း ဟန်သီမြို့အနီး လမ်းမပေါ်တွင် ပုံမှန်စစ်ဆေးမှု ပြုလုပ်ရန် ထိုထရပ်ကားကို တာဝန်ရှိသူများက တားဆီးခဲ့သည်။
ထို ၄၁ ဦးအနက် ၃၉ ဦးမှာ အာဖဂန်လူမျိုးများဖြစ်ကြောင်းနှင့် တစ်ဦးမှာ အီရန်ဖြစ်ပြီး အခြားတစ်ဦးမှာ ဆီးရီးယားတို့ဖြစ်ကြောင်း Associated Press က သတင်းဖော်ပြထားသည်။
ယင်းထရပ်ကား၏ အအေးပေးစနစ်ကို ပိတ်ထားသော်လည်း ၎င်းတို့ထဲမှ အချို့မှာ အသက်ရှူကြပ်နေသဖြင့် ဆေးရုံသို့ ပို့ဆောင်ပေးခဲ့သည်ဟု သိရသည်။
အဆိုပါ ထရပ်ကားသည် တူရကီမှ ဂရိနယ်စပ်ကို ကျော်ဖြတ်သွားသည်ဟု ယုံကြည်ရသည်။ ဂျော်ဂျီယာနိုင်ငံသား ဖြစ်သော ထရပ်ကားမောင်းသမားကို ဖမ်းဆီးခဲ့သည်။
ကိုးကား-အန်အိတ်ချ်ကေ
ဘာသာပြန်-မြင့်မြင့်ချို
