ဂျီနီဗာ နိုဝင်ဘာ ၉
ဟေတီနိုင်ငံတွင် ဆက်တိုက်ဖြစ်ပေါ်နေသော ပဋိပက္ခများကြောင့် လူသားချင်းစာနာ ထောက်ထားမှုဆိုင်ရာ အကျပ်အတည်းမှာ ဆက်လက်ဆိုးရွားလျက်ရှိကြောင်း ကုလသမဂ္ဂပြောရေးဆိုခွင့်ရှိသူက နိုဝင်ဘာ ၈ ရက်တွင် ပြုလုပ်သော နေ့စဉ်သတင်းစာရှင်းလင်းပွဲ၌ ပြောသည်။
ကုလသမဂ္ဂ လူ့အခွင့်အရေး ၏ထုတ်ပြန်ချက်အရ ဟေတီနိုင်ငံ၌ ယခုနှစ်ဇန်နဝါရီလနှင့် စက်တင်ဘာလကြားတွင် လူပေါင်း ၄၉၀၀ နီးပါးသေဆုံးမှုဖြစ်ပွားကြောင်း၊ ထို့ပြင် လူပေါင်း ၇၀၀၀၀၀ ကျော် မှာလည်း ပြည်တွင်းနေရပ်စွန့်ခွာ ထွက်ပြေးကြရကြောင်းနှင့် ထက်ဝက်ကျော်မှာ ကလေးငယ်များဖြစ်ကြောင်း သိရသည်။
စားရေရိက္ခာ မလုံလောက်မှု ဆက်လက်မြင့်မားလျက်ရှိပြီး နိုင်ငံ့လူဦးရေ၏ ထက်ဝက်ကျော်ဖြစ်သည့် လူပေါင်း ၅ ဒသမ ၄သန်းခန့်မှာ ဆာလောင်မွတ်သိပ်မှုဘေးနှင့် ကြုံတွေ့နေရသည်ဟု ဆိုသည်။ ဟေတီနိုင်ငံဆိုင်ရာ ကုလသမဂ္ဂ ဌာနေနှင့် လူသားချင်းစာနာထောက်ထားမှုဆိုင်ရာ ညှိနှိုင်းရေးမှူး ရစ်ချတ်ဆန်သည် ဟေတီနိုင်ငံ၏ အခြေအနေမှာ အလွန် ဆိုးရွားလျက်ရှိကြောင်း ယခုသီတင်းပတ်အစောပိုင်းတွင် သတိပေးထားသည်။
ကုလသမဂ္ဂနှင့် မိတ်ဖက်အဖွဲ့အစည်းများသည် ဟေတီနိုင်ငံအတွင်း လူသားချင်းစာနာ ထောက်ထားမှုဆိုင်ရာ အကူအညီများ ဆက်လက်ပံ့ပိုးပေးလျက်ရှိသည်။
ယခုနှစ် ပထမနှစ်ဝက်အတွင်း လူပေါင်း ၁ ဒသမ ၉ သန်းနီးပါးကို စားရေရိက္ခာနှင့် ငွေသားအပါအဝင် လူသားချင်း စာနာထောက်ထားမှု အကူအညီများပေးအပ်ခဲ့ကြောင်း သိရသည်။
လူသားချင်း စာနာထောက်ထားမှုဆိုင်ရာ အကျပ်အတည်း ဆိုးရွားလျက်ရှိသော ဟေတီနိုင်ငံ ၌ မြင့်မားလာသော လိုအပ်ချက်များကို ဖြည့်ဆည်းပေးနိုင်ရန် ထောက်ပံ့ကူညီမှုများစွာ လိုအပ်လျက်ရှိသည်။
ဆင်ဟွာ
