နေပြည်တော် မတ် ၄
ပို့ဆောင်ရေးနှင့် ဆက်သွယ်ရေးဝန်ကြီးဌာန ဒုတိယဝန်ကြီး ဦးအောင်ကျော်ထွန်းသည် ဧရာဝတီတိုင်းဒေသကြီး လမ်းပန်းဆက်သွယ်ရေးဝန်ကြီး ဦးနေမျိုးအောင်၊ ရေအရင်းအမြစ်နှင့် မြစ်ချောင်းများ ဖွံ့ဖြိုးတိုးတက်ရေးဦးစီးဌာန ညွှန်ကြားရေးမှူးချုပ် ဦးဝင်းလှိုင်၊ တာဝန်ရှိသူများနှင့်အတူ မတ် ၃ ရက်က ဧရာဝတီတိုင်းဒေသကြီး ဟိုင်းကြီးကျွန်းမြို့သို့ ရောက်ရှိပြီး ၂၀၂၃-၂၀၂၄ ဘဏ္ဍာနှစ် ပြည်ထောင်စု ငွေလုံးငွေရင်းရန်ပုံငွေဖြင့် ရေအရင်းအမြစ်နှင့် မြစ်ချောင်းများ ဖွံ့ဖြိုးတိုးတက်ရေး ဦးစီးဌာနမှ ဆောင်ရွက်လျက်ရှိသော ဟိုင်းကြီးကျွန်းမြို့ အဝင်ရေလမ်း အလျား ၇၄၅ မီတာ၊ ပျမ်းမျှအကျယ် ၁၂၀ မီတာနှင့် အနက် ရေစစ်မျဉ်းအောက် ၇ မီတာ စုစုပေါင်း ၃၉၈၉၂၀ ကုဗမီတာ သောင်တူးဖော်ခြင်းလုပ်ငန်းနှင့် ဧရာဝတီတိုင်း ဒေသကြီး အစိုးရအဖွဲ့ ရန်ပုံငွေဖြင့် ဆောင်ရွက်လျက်ရှိသော နုန်းတားကျောက်စီလှိုင်းကာ အလျား ပေ ၅၀၀ တည်ဆောက်ခြင်း လုပ်ငန်း ဆောင်ရွက်နေမှု အခြေအနေများကို ကြည့်ရှုစစ်ဆေးရာ တာဝန်ရှိသူများက လုပ်ငန်းပြီးစီးမှုနှင့် ဆက်လက်ဆောင် ရွက်မည့် အစီအစဉ်များကို ရှင်းလင်းတင်ပြခဲ့ကြသည်။
ထို့နောက် ဒုတိယဝန်ကြီးက “သောင်တူးသင်္ဘောကြီးဖြင့် ဟိုင်းကြီးကျွန်းမြို့ အဝင်ရေလမ်း သောင်တူးဖော်နေမှုသည် ဒေသခံပြည်သူများအတွက် ရေလမ်းကုန်စည်ပို့ဆောင်မှု လုံခြုံချောမွေ့ရုံ သာမက ရေယာဉ်ကြီးများ ၂၄ နာရီ ဝင်ထွက်နိုင်သဖြင့် များစွာအကျိုးရှိသော လုပ်ငန်းဖြစ်ကြောင်း၊ သောင်တူးဖော်ရာတွင် သတ်မှတ်တူးလိုင်း အကျယ်၊ အနက် ရရှိစေရေး ဂရုပြုဆောင်ရွက်ကြရန်နှင့် သောင်တူးသင်္ဘောကြီးများသည် တန်ဖိုးကြီးမားသည့်အတွက် ကိုယ်တွယ်မောင်းနှင်သူများအနေဖြင့် သတ်မှတ်ထားသော Procedure များနှင့်အညီ စနစ်တကျထိန်းသိမ်း ကိုင်တွယ်မောင်းနှင်ရန်လိုကြောင်း၊ မီးဘေးအန္တရာယ် မဖြစ်စေရေး သင်္ဘောသားတိုင်း အထူးအလေးထား ဂရုပြုရန်၊ သက်ဆိုင်ရာကဏ္ဍအလိုက် ကျွမ်းကျင်ဝန်ထမ်းများ ခါးဆက်မပြတ်စေရေး တာဝန်ရှိသူအဆင့်ဆင့်က စီမံဆောင်ရွက်ရန်” မှာကြားသည်။
ယင်းနောက် ဒုတိယဝန်ကြီးနှင့်အဖွဲ့သည် ဧရာဝတီတိုင်းဒေသကြီး၊ ဟိုင်းကြီးကျွန်းမြို့ရှိ မဟာမကုဋရံသီဆံတော်ရှင် မြတ်မော်တင်စေတီတော်မြတ်ကြီးသို့ သွားရောက်ဖူးမြော်ပြီး စေတီတော်ရင်ပြင်တော် တိုးချဲ့ခြင်းအတွက် အလှူတော်ငွေများကို ပို့ဆောင်ရေးနှင့် ဆက်သွယ်ရေးဝန်ကြီးဌာန ဝန်ထမ်းမိသားစုများ၏ ကိုယ်စား ဘုရားဂေါပကနှင့် တာဝန်ရှိသူများထံ ပေးအပ်လှူဒါန်းခဲ့သည်။
သတင်းစဉ်
