ဟိုင်းကြီးကျွန်း၊ ၂၉ ဒီဇင်ဘာ
ဧရာဝတီတိုင်းဒေသကြီး ဟိုင်းကြီးကျွန်းမြို့အတွင်းရှိ ကျေးရွာအုပ်စု (၆)စုအား အပေါ့စားအရေးပေါ် မီးသတ်စက်နှင့်ဆက်စပ်ပစ္စည်းများ ပေးအပ်ပွဲအခမ်းအနားကို ဒီဇင်ဘာ ၂၉ ရက် နံနက် ၈ နာရီက ဟိုင်းကြီးကျွန်းမြို့ အထွေထွေအုပ်ချုပ်ရေးဦးစီးဌာန အစည်းအဝေးခန်းမ၌ ကျင်းပပြုလုပ်ခဲ့ကြောင်း သိရသည်။
အဆိုပါပေးအပ်ပွဲကို ဧရာဝတီတိုင်းဒေသကြီး မီးသတ်ဦးစီးဌာန ဒုတိယညွှန်ကြားရေးမှူး ဦးသန်းထွန်းဦး နှင့် တာဝန်ရှိသူများ၊ မြို့နယ်အုပ်ချုပ်ရေးမှူး ဦးအောင်ကျော်ထွန်း၊ မြို့မီးသတ်စခန်းမှ တာဝန်ရှိသူများ၊ ကျေးရွာအုပ်စု ၆ ခုမှ ကျေးရွာအုပ်ချုပ်ရေးမှူးများ တက်ရောက်ကြသည်။
အခမ်းအနားတွင် မြို့အုပ်ချုပ်ရေးမှူးက အမှာစကားပြောကြားရာ အပေါ့စားအရေးပေါ်မီးသတ်စက်များ ရရှိအောင် ဆောင်ရွက်ခဲ့မှုနှင့် အခြားကျေးရွာများလည်း ရရှိအောင်ဆောင်ရွက်နေကြောင်း ရှင်းလင်း ဆွေးနွေးသည်။ ထို့နောက် တိုင်းဒေသကြီး မီးသတ်ဦးစီးဌာနမှ ဒုတိယညွှန်ကြားရေးမှူး ဦးသန်းထွန်းဦးက အပေါ့စားအရေးပေါ်မီးသတ်စက်အသုံးပြုပုံနှင့် မီးဘေးအန္တရာယ်ကြိုတင်ကာကွယ် ရေးလုပ်ငန်းများအား ရှင်းလင်းပြောကြားခဲ့သည်။
ဆက်လက်၍ ချောင်းဝကျေးရွာအုပ်စု၊ ပြင်ခရိုင်ကျေးရွာအုပ်စု၊ ဝါးကုန်းကျေးရွာအုပ်စု၊ အုတ်တွင်းကျေးရွာအုပ်စု၊ ဒီးဒူးကုန်းကျေးရွာအုပ်စုနှင့် သက်ကယ်သောင်ကျေးရွာအုပ်စုမှ အုပ်ချုပ်ရေးမှူးများအား အရေးပေါ်မီးသတ်စက်နှင့် ဆက်စပ်ပစ္စည်းများပေးအပ်ပြီး လိုအပ်သည် များရှိပါက တင်ပြရန်ပြောကြားခဲ့ပြီး ကျေးရွာအုပ်ချုပ်ရေးမှူးများကလည်း ကျေးဇူးတင်စကား ပြန်လည် ပြောကြားခဲ့ကြောင်း သိရသည်။
လှိုင်မျိုးအောင်(ပြန်/ဆက်)
