ကော့ကရိတ် သြဂုတ် ၇
ကရင်ပြည်နယ်၊ ကော့ကရိတ်မြို့နယ်တွင် သြဂုတ် ၁ ရက်မှစ၍ မိုးအဆက်မပြတ်ရွာသွန်းမှုကြောင့် ရေကြီးရေလျှံမှုဖြစ်ပွားပြီး မြေနိမ့်ပိုင်းရှိ စာသင်ကျောင်းများ သြဂုတ် ၂ ရက်မှစ၍ ယနေ့နံနက်အထိ စာသင်ကျောင်း (၄၁)ကျောင်းအား ယာယီပိတ်ထားကြောင်း သိရသည်။
ယာယီပိတ်ထားသော စာသင်ကျောင်းများမှာ ကော့ကရိတ်မြို့ပေါ်တွင် (၄)ကျောင်း၊ ကျုံဒိုးမမြို့ပေါ်တွင် (၄)ကျောင်းနှင့် ကျေးရွာများတွင် စာသင်ကျောင်း (၃၃)ကျောင်းတို့ဖြစ်ကြောင်း၊ အဆိုပါစာသင်ကျောင်းများမှ ပညာသင်ကြားလျက်ရှိသော ကျောင်းသား ကျောင်းသူ (၄၀၆၇)ဦးရှိပြီး ပညာသင်ကြားမှု နှောင့်နှေးမှုမရှိစေရေးအတွက် သက်ဆိုင်ရာတာဝန်ရှိသူများမှ ပူးပေါင်း၍ ဆောင်ရွက်လျက်ရှိကြောင်း သိရသည်။
ခင်မျိုးဝင်း(ခရိုင် ပြန်/ဆက်)
