ကျောက်တန်း  ၁၇ ဇူလိုင်

(၇၂) နှစ်မြောက် အာဇာနည်နေ့ အထိမ်းအမှတ် ဓာတ်ပုံပြပွဲနှင့်ရုပ်သံပြပွဲ၊ စာအုပ်ဈေးရောင်းပွဲတော်ကို ရန်ကုန် တောင်ပိုင်းခရိုင်၊ကျောက်တန်းမြို့နယ် အီလက်ထရောနစ် စာကြည့်တိုက်ခန်းမရှေ့၌ ယနေ့နံနက် ၉ နာရီအချိန်က ကျင်းပခဲ့သည်။

အဆိုပါ (၇၂) နှစ်မြောက်အာဇာနည်နေ့ အထိမ်းအမှတ် ဓာတ်ပုံပြပွဲနှင်ရုပ်သံပြပွဲ၊ ဈေးရောင်းပွဲတော်တွင် အမှတ်(၁) တိုင်းဒေသကြီးလွှတ်တော်ကိုယ်စားလှယ်၊ မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်အုပ်ချုပ်ရေးမှူး၊ အီလက်ထရောနစ် စာကြည့်တိုက်ဥက္ကဌတို့က ဖဲကြိုးဖြတ်ဖွင့်လှစ်ပေးခဲ့သည်။

ဆက်လက်ပြီး စာကြည့်တိုက်ခန်းမအတွင်း ပြသထားသော အာဇာနည်ခေါင်းဆောင်များ၏ နိုင်ငံရေး လှုပ်ရှားမှုသမိုင်းမှတ်တမ်းများ၊ အာဇာနည်ခေါင်းဆောင်များ၏ အတ္ထုပ္ပတ္တိများ၊ အာဇာနည် ခေါင်းဆောင်များ၏ ဈာပနအခမ်းအနားကျင်းပနေသည့် ရုပ်သံပြသနေရာသို့ လှည့်လည်ကြည့်ရှုခဲ့ကြသည်။

အခမ်းအနားတွင် မြို့ပေါ်ရှိ ကျောင်းသား/သူများ၊ ဆရာ/ဆရာမများ၊ NGO အသင်းအဖွဲ့များ၊ ပြည်သူများက ခန်းမအတွင်း အာဇာနည်ခေါင်းဆောင်ကြီးများ၏ဓာတ်ပုံများ၊ ရုပ်သံများ ဝေဝေဆာဆာ ပြသထားသည်။

အဆိုပါ ပြပွဲကို ဇူလိုင်လ ၁၇ ရက်မှ ၁၉ ရက်အထိ နံနက် ၈ နာရီမှ ညနေ ၅ နာရီအထိ သုံးရက်တိုင်တိုင် ပြသသွားမည်ဖြစ်ကြောင်း၊ အာဇာနည် ခေါင်းဆောင်ကြီးများ၏ မြန်မာ့လွတ်လပ်ရေး ကာလတစ်လျှောက် ကြိုးပမ်းခဲ့ကြပုံများအား ယနေ့ လူငယ်လူရွယ်လေးများ သိရှိအတုယူ တတ်စေရန် ရည်ရွယ်၍ ပြပွဲနှင့် စာအုပ်ဈေးရောင်းပွဲတော် ကျင်းပပေးခြင်းဖြစ်ကြောင်း အီလက်ထရောနစ် စာကြည့်တိုက် ဥက္ကဌ ဦးမြင့်ငွေက ပြောသည်။

နန်းအေးခိုင်(ရန်ကုန်)