ဆင်ပေါင်ဝဲ    ၂၆    အောက်တိုဘာ 

မကွေးတိုင်းဒေသကြီး၊ သရက်ခရိုင်၊ ဆင်ပေါင်ဝဲမြို့နယ်အတွင်းရှိ ကျောင်းသားကျောင်း သူများအား သွားလာရေးလွယ် ကူစေရန်ရည်ရွယ်၍ Lesswalk Organization မှ စက်ဘီးများ ပေးအပ်လှူဒါန်းပွဲကို ယနေ့နံနက်  ၁၀ နာ ရီက ဆင်ပေါင်ဝဲမြို့ အခြေခံပညာအထက်တန်း ကျောင်း၊ ရန်အောင်မြေခန်းမ၌ ကျင်းပပြုလုပ်ခဲ့သည်။

ရှေးဦးစွာ စက်ဘီပေးအပ် လှူဒါန်းပွဲတွင် မြို့နယ်အုပ်ချုပ်‌ရေးမှူး ဦးကျော်စိုးလင်းက အ ဖွင့်အမှာစကား‌ ပြောကြားရာတွင် ခြေလျင်ဖြင့်‌ ကျောင်းပညာသင်ကြားနေသော ကျောင်းသား/ကျောင်းသူလေးများ ပညာသင်ကြားရာတွင် အခက်အခဲများမရှိစေရန် နှင့် ကျောင်းစာကို ပိုလုပ်နိုင်စေရန် လှူဒါန်းပေးခြင်းဖြစ်ကြောင်းပြောကြားပြီး Lesswalk  Organization  Founder ကိုယ်စား ဒေါ်အေးအေးစိုးက စက်ဘီးလှူဒါန်းရခြင်း ရည်ရွယ် ချက်များကို ရှင်းလင်းပြောကြားသည်။

ဆက်လက်၍ ‌ ကျောင်းအုပ်ဆရာမကြီး ဒေါ်မြင့်မြင့်မော်က ကျောင်းသား/ကျောင်းသူများ ကိုယ်စား ကျေးဇူးတင်စကား ပြန်လည်ပြောကြားပြီး ဆရာမကြီးက စက်ဘီးလှူဒါန်းပေးပါသော Lesswalk  Organization အား ဂုဏ်ပြုလွှာပြန်လည်ပေးအပ်ကာ ကျောင်းသား/ကျောင်းသူ(၁၃၄)ဦးအား တာဝန်ရှိသူများက  စက်ဘီး (၁၃၄)စီး ကိုပေးအပ်လှူဒါန်းခဲ့ကြောင်း သိရသည်။

နေခြည်(ဆင်ပေါင်ဝဲ)