မြစ်သား ၆ ဖေဖော်ဝါရီ
မန္တလေးတိုင်းဒေသကြီး၊ မြစ်သားမြို့ ရွှေမုဌောဘုရားကြီး၏ (၁၂၉) ကြိမ်မြောက် တပို့တွဲ (နှမ်းမနဲ)ပွဲတော်ကြီးအား စည်ကားသိုက်မြိုက်စေရေးနှင့် ကျောင်းသားလူငယ်များ စာဖတ်ရှိန် မြှင့်တင်ရေးအတွက် ရည်ရွယ်၍ ရွှေမုဌောဘုရားဂေါပကအဖွဲ့၊ ပြန်ကြားရေးနှင့်ပြည်သူ့ဆက်ဆံရေး ဦးစီးဌာန၊ ပညာရေးဦးစီးဌာနတို့ ပူးပေါင်းကျင်းပသော လူငယ်စာပေပွဲတော်နှင့် စာအုပ်ဈေးရောင်း ပွဲတော်ဖွင့်ပွဲ အခမ်းအနားကို ယနေ့နံနက် ၉ နာရီက ရွှေမုဌောဘုရားကွင်း၌ ကျင်းပပြုလုပ်ရာ အမှတ်(၁)တိုင်းဒေသကြီးလွှတ်တော်ကိုယ်စားလှယ် ဦးမင်းအောင်၊ မြို့နယ်အုပ်ချုပ်ရေးမှူး ဦးအောင်မိုး၊ မြို့နယ်ပညာရေးမှူး ဒေါ်မြင့်မြင့်သိန်း၊ ရွှေမုဌောဘုရားဂေါပကအဖွဲ့ဉက္ကဌ ဦးတင်ဦးတို့က တက်ရောက် အမှာစကားပြောကြားကြပြီး အခမ်းအနား အားဖဲကြိုးဖြတ်ဖွင့်လှစ်ပေးကြသည်။
ဆက်လက်၍ အခမ်းအနားတက်ရောက်လာကြသူများက ခင်းကျင်းပြသထားသော စာအုပ် ဈေးရောင်းပွဲတော်ရှိ စာအုပ်ဆိုင်များအား လှည့်လည်ကြည့်ရှုအားပေးခဲ့ကြသည်။
ထို့နောက် ရွှေမုဌောဘုရားဓမ္မာရုံ(အပေါ်ထပ်)တွင် လူငယ်စာပေပွဲတော်အဖြစ် မူကြိုအဆင့် ကဗျာရွတ်ဆိုပြိုင်ပွဲ၊ မူလတန်းအဆင့်ပုံပြင်ပြောပြိုင်ပွဲ၊ အလယ်တန်းအဆင့် စကားပုံဆက်ပြိုင်ပွဲ၊ မူ/လယ်အဆင့် စိတ်ကြိုက်ပန်းချီပြိုင်ပွဲ၊ အထက်တန်းအဆင့် ကျပန်းစကားပြောပြိုင်ပွဲများကို ဖေဖော်ဝါရီ ၆ ရက်မှ ၈ ရက်အထိ ကျင်းပပြုလုပ်ပေးသွားမည်ဖြစ်သည်။
အဆိုပါ ပြိုင်ပွဲသို့ မြစ်သားမြို့ပေါ်ရှိ ကျောင်းများမှ ကျောင်းသား/ကျောင်းသူ (၁၅၈) ဦးတို့က ဝင်ရောက်ယှဉ်ပြိုင်သွားကြမည်ဖြစ်ပြီး ဆုရရှိသော ကျောင်းသား ကျောင်းသူများကို ဖေဖော်ဝါရီ ၈ ရက် မွန်းလွဲ ၁ နာရီတွင် ဆုများပေးအပ်ချီးမြှင့်ပေးသွားမည်ဖြစ်ကြောင်း သိရှိရသည်။
ဆုမွန်(မြစ်သားပြန်/ဆက်)
