နေပြည်တော်  ၄  အောက်တိုဘာ 

ကျေးလက်လမ်းဖွံ့ဖြိုးရေးစီမံကိန်းအဆင့် - ၅ ဆောင်ရွက်နိုင်ရေးအတွက် ဆောက်လုပ်ရေး ဝန်ကြီးဌာန ကျေးလက်လမ်းဖွံ့ဖြိုးရေးဦးစီးဌာနနှင့် ဂျာမနီနိုင်ငံ  ဂျာမန်ဖွံ့ဖြိုးရေးဘဏ် တို့အကြား ထောက်ပံ့ရေးဆိုင်ရာ သဘောတူညီချက်  နှင့် သီးခြားသဘောတူညီချက်များအား လက်မှတ်ရေးထိုးခြင်း အခမ်းအနားကို ယနေ့နံနက် ၁၀ နာရီတွင် နေပြည်တော်ရှိ  အဆိုပါဝန်ကြီးရုံး အစည်းအဝေးခန်းမ၌ ကျင်းပသည်။

အခမ်းအနားတွင် ပြည်ထောင်စုဝန်ကြီးဦးဟန်ဇော်က လူမှုဘဝဖွံ့ဖြိုးတိုးတက်ရေးအတွက် ကျေးလက် လမ်းများဖွံ့ဖြိုးရေးသည် အရေးကြီးသော  အခန်းကဏ္ဍတွင်ပါဝင်ပြီး ကျေးလက်လမ်း ဖွံ့ဖြိုးရေးဦးစီးဌာနမှကျေးလက်လမ်း၊ တံတားများဖွံ့ဖြိုးတိုးတက်စေရန်အတွက် မဟာဗျူဟာများနှင့် ရည်မှန်းချက်များထားရှိဆောင်ရွက်လျက်ရှိကြောင်း၊ ကျေးလက်လမ်းများဖွံ့ဖြိုးရန်အတွက် ဖွံ့ဖြိုးရေးမိတ်ဖက် အဖွဲ့များနှင့် ပူးပေါင်းဆောင်ရွက်လျက်ရှိပြီး ကျေးလက်ဒေသလမ်းပန်း ဆက်သွယ် ရေး ချောမွေ့စေရန်အတွက် ကျေးလက်လမ်းဖွံ့ဖြိုးရေးမဟာဗျူဟာကို (၂၀၁၇-၂၀၃၀) ရည်မှန်းချက် ထားရှိကာဆောင်ရွက်လျက်ရှိကြောင်း၊   ကျေးလက်ဒေသ၌ ကျန်းမာရေး ၊ ပညာရေးနှင့် လူမှုဘဝ ဖွံ့ဖြိုးတိုးတက်စေရန်အတွက် ဂျာမန်ဖွံ့ဖြိုးရေးဘဏ်မှ ရှမ်းပြည်နယ်(တောင်ပိုင်း)၌ ၂၀၁၄ ခုနှစ်မှ စတင်၍ ကျေးလက်လမ်းဖွံ့ဖြိုးရေးစီမံကိန်းအဆင့် (၁ ၊ ၂ ၊ ၃ ၊ ၄ ) ၊ ကျေးလက်လမ်းများ ပြန်လည် ထူထောင်ရေးစီမံကိန်းနှင့် ကျေးလက်ကုန်ထုတ်လမ်းများဖွံ့ဖြိုးတိုးတက်ရေး စီမံကိန်းများအတွက် ထောက်ပံ့ငွေပေါင်းယူရို ၄၃ ဒသမ ၉ သန်းပေးအပ်ပြီးဖြစ်ပါကြောင်း ဂျာမန်ဖွံ့ဖြိုးရေး၏ ကျေးလက်ဖွံ့ဖြိုးရေး စီမံကိန်းအတွက် အထောက်အပံ့ ယူရို (၈)သန်းကို ယခုလက်မှတ်ရေးထိုးသွားမည် ဖြစ်ကြောင်း ပြောကြားသည်။  

ထို့နောက် ဂျာမန်ဖွံ့ဖြိုးရေးဘဏ် မှ Country Director Mr.Curstom က စီမံကိန်းနှင့် ပတ်သက်၍ ရှင်းလင်းပြောကြားပြီး ကျေးလက်လမ်းဖွံ့ဖြိုးရေးစီမံကိန်းအဆင့် - ၅ အတွက် ထောက်ပံ့ခြင်းဆိုင်ရာသဘောတူညီချက်နှင့် သီးခြားသဘောတူညီချက်များအား ကျေးလက်လမ်း ဖွံ့ဖြိုးရေးဦးစီးဌာန  ညွှန်ကြားရေးမှူးချုပ် ဦးခင်သက်နှင့် ဂျာမန်ဖွံ့ဖြိုးရေးဘဏ်မှ Country Director Mr.Curstomတို့က လက်မှတ်ရေးထိုးလဲလှယ်ကြသည်။

(သတင်းစဉ်)