ချင်းရွှေဟော် ၂၄ မတ်
COVID-19 ရောဂါ ကြိုတင်ကာကွယ်ရေးလုပ်ငန်းများကို တစ်နိုင်ငံလုံး အမျိုးသားတာဝန် တစ်ရပ်အနေဖြင့် ဆောင်ရွက်လျက်ရှိရာ ယနေ့ နံနက် ၉ နာရီက ချင်းရွှေဟော်မြို့အုပ်ချုပ်ရေးမှူးနှင့် ဌာနဆိုင်များပူးပေါင်း၍ ချင်းရွှေဟော် မြန်မာ-တရုတ် နယ်စပ်ဂိတ်၌ ဝင်ထွက်သွားလာသည့် ပြည်သူများအား လက်ဆေးနိုင်ရေးအတွက် လက်ဆေးကန်၊ ဆပ်ပြာရည်ဘူးများ၊ Hand Gel များကို စနစ်တကျ ထားရှိပေးခြင်း၊ လက်ကို စနစ်တကျ ဆေးကြောနိုင်ရေး အသိပညာပေးဆွေးနွေးခြင်း၊ ပိုစတာများကပ်ထားခြင်းနှင့် ချင်းရွှေဟော်မြို့တွင်း၌ ရောဂါကြိုတင် ကာကွယ်ရေး အသိပညာပေး လက်ကမ်းစာစောင်များ ဖြန့်ဝေခြင်းလုပ်ငန်းများကို အရှိန်အဟုန်မြှင့် ဆောင်ရွက်လျက်ရှိကြောင်း သိရသည်။
ထိုသို့ ဆောင်ရွက်ရာတွင် ကိုရိုနာဗိုင်းရပ်စ် (COVID-19)ရောဂါ ကြိုတင်ကာကွယ်ရေးအတွက် ရောဂါကူးစက်မှု မရှိစေရန် အဖျားတိုင်းတာခြင်း၊ နှခေါင်းစည်းများ အခမဲ့ဖြန့်ဝေခြင်း၊ ရောဂါကြိုတင်ကာကွယ်ရေး ဟောပြောပွဲများ၊ မော်တော်ယာဉ်များအား ပိုးသတ်ဆေးဖြန်းခြင်းနှင့် ကျန်းမာရေး စစ်ဆေးခြင်းလုပ်ငန်းများကို ဇန်နဝါရီ ၂၇ ရက်မှ စတင်ပြီး ယခုအချိန်အထိ အရှိန်အဟုန်မြှင့် ဆောင်ရွက်လျက်ရှိကြောင်း သိရသည်။
ဇင်ဇင်(ပြန်/ဆက်)
