Keto Diet လို့ခေါ်တဲ့ အဆီချနည်းကို အခုဆို မသိတဲ့သူ နည်းပါတယ်။ ကီတို စားသောက်နည်း ဆိုတာ ကာဗိုဟိုက်ဒရိတ်ကို လျှော့ပြီး ပရိုတင်းနဲ့ အဆီဓာတ်တွေကနေ ကယ်လိုရီ ပိုရယူတာ ဖြစ်ပါတယ်။
ပိန်ချင်တဲ့သူတွေ အတွက်တော့ ကီတိုနည်းက တခြားအစားလျှော့နည်းတွေထက် ပထမ ၃လ ကနေ ၆ လအတွင်း ပိုထိရောက်တယ်လို့ ဆိုကြပါတယ်။ ခန္ဓာကိုယ်က ခွန်အားအဖြစ် ပြောင်းလဲအသုံးပြုရာမှာ ကာဗိုဟိုက်ဒရိတ်တွေထက် အဆီကို အသုံးပြုနိုင်ဖို့ ကယ်လိုရီ ပိုလောင်ကျွမ်းစေလို့ပဲ ဖြစ်ပါတယ်။
ဒါပေမယ့် ငွေကုန်ခံပြီးသာ လုပ်ရတယ်။ ကိုယ့်အတွက် သိပ်မထိရောက်ဘူး၊ ဝိတ်လည်း ကျမလာဘူးလို့ ခံစားရရင် ကိုယ့်အခြေအနေ ကိုယ်ဒီအချက်တွေနဲ့ တိုက်ကြည့်လိုက်ပါဦး…
(၁) ketosis အဆင့် ရောက်ဖို့ အရေးကြီးတယ်။
ပုံမှန်ဆို ခန္ဓာကိုယ်က ကာဗိုဟိုက်ဒရိတ် တွေကို ဂလူးကို့စ် အဖြစ် ဖြိုခွဲလိုက်ပြီး ခွန်အားအဖြစ် အသုံးပြုပါတယ်။ ခန္ဓာကိုယ်ထဲမှာ ကာဗိုဟိုက်ဒရိတ် အလုံအလောက် မရှိတဲ့အခါ ketosis ဆိုတဲ့ အဆင့်ကို ရောက်လာပါတယ်။
Ketosis ဖြစ်နေတဲ့ အတွင်းမှာ ခန္ဓာကိုယ်က အဆီလောင်ကျွမ်းမှုမှာ ပိုလုပ်ဆောင်နိုင်လာပြီး ဂလူးကို့စ် အစား အဆီတွေကိုပဲ ခွန်အားအဖြစ် ပြောင်းလဲအသုံးပြုလာပါတယ်။
ကီတို စားသောက်နည်းမှာ အရေးပါတဲ့ ketosis အဆင့်ကို မရောက်သေးတာက ကာဗိုဟိုက်ဒရိတ် စားသုံးတာ များနေလို့ ဖြစ်နိုင်ပါတယ်။ ကီတိုနည်းနဲ့ စားသုံးနေသူ တစ်ယောက်ရဲ့ ကယ်လိုရီ စားသုံးမှု မှာ ကာဗိုဟိုက်ဒရိတ် က ၅-၁၀ ရာခိုင်နှုန်းပဲ ပါဝင်သင့်ပါတယ်။
(၂) ပရိုတင်းဓာတ် စားသုံးမှု မများပါစေနဲ့။
ကာဗိုဟိုက်ဒရိတ် နည်းတဲ့ စားသောက်ပုံမှာ အသားဓာတ် ပမာဏ အတန်အသင့်ပါဝင်လို့ ရပါတယ်။ ဒါပေမယ့် လူတွေထင်တာက ကာဗိုဟိုက်ဒရိတ် လျှော့ပြီး အသားဓာတ် ပိုစားရတဲ့နည်းလို့ မှားသိထားကြပါတယ်။
ဒီလို စားမယ်ဆို ခန္ဓာကိုယ်က ပိုလျှံနေတဲ့ အသားဓာတ်တွေကို အမိုင်နိုအက်စစ် အဖြစ် ဖြိုခွဲပြီး သကြားဓာတ်အဖြစ် ပြန်ပြောင်းလိုက်မှာ ဖြစ်လို့ ketosis ဖြစ်လာစေမှာ မဟုတ်ပါဘူးနော်။
(၃) အများကြီး မစားပါနဲ့။
ကီတိုနည်းနဲ့ဆို အဆီများတာတွေ စားလို့ရတယ်ဆိုပြီး ဝက်ဆီဖတ် ၊ ထောပတ်၊ ချိစ် စတဲ့ အဆီများတာတွေကို စားသင့်တဲ့ အတိုင်းအတာထက် ပိုစားမိတဲ့အခါ ရလဒ်မကောင်းတာ ဖြစ်တတ်ပါတယ်။
(၄) မစားခင် ကယ်လိုရီ တွက်ပါ။
ကိုယ့်ခန္ဓာကိုယ်က လောင်ကျွမ်းနိုင်တာထက် ကယ်လိုရီ ပိုစားမိနေတဲ့ လူတစ်ယောက်က ဝိတ်ကျဖို့ မလွယ်ပါဘူး။ ဒီလို စားမယ်ဆို ketosis ဖြစ်နေရင်တောင် ဝိတ်တက်လာနိုင်ပါတယ်။ အဆီများတဲ့ အစားအသောက်တွေက ကာဗိုအစားအစာတွေထက် ကယ်လိုရီ ပါဝင်မှု ပိုများနေနိုင်တဲ့အတွက် စားတဲ့အခါ ကယ်လိုရီ တွက်ပြီး စားတာ ကောင်းပါတယ်။
(၅) အယ်ကိုဟော မသောက်ပါနဲ့။
ဝိုင် နဲ့ ဘီယာ အပါအဝင် အယ်လ်ကိုဟော သောက်သုံးမှု အများစုမှာ ကာဗိုပါဝင်မှု များပါတယ်။ ကီတိုနည်းမှာ အယ်လ်ကိုဟော တွေကို ခွင့်ပြုမထားပါဘူး။
(၆) လှုပ်ရှားမှု ရှိပါစေ။
ကိုယ်လက်လှုပ်ရှားမှုနဲ့ လေ့ကျင့်ခန်းတွေက လူ့ကျန်းမာရေးအတွက် အရေးပါပါတယ်။ Diet Plan ဝင်နေတယ် ဆိုပြီး လေ့ကျင့်ခန်းမလုပ်၊ မလှုပ်ရှားဘဲ အဆီကျဖို့ အေးဆေး ထိုင်စောင့်နေလို့ မရပါဘူး။ အဆီများတာတွေ စားနေတဲ့သူမှာ ကယ်လိုရီကို လောင်ကျွမ်းအောင်နဲ့ ကိုယ်လိုချင်တဲ့ အလေးချိန်ကို ရောက်နိုင်ဖို့ လှုပ်ရှားမှုလေး လုပ်ဖို့ လိုပါတယ်။
(၇) စိတ်ဖိစီးမှု ဖြေလျှော့ပါ။
စိတ်ဖိစီးချိန်မှာ ဟော်မုန်းပမာဏတွေ ပြောင်းလဲစေပြီး ဝိတ်တက်တာ ဒါမှမဟုတ် အဆီချနည်း မထိရောက်တာတွေ ဖြစ်စေနိုင်ပါတယ်။ စိတ်ဖိစီးတာများတဲ့ နေထိုင်မှုပုံစံကြောင့် ကီတိုနည်းပဲ လုပ်လုပ် ဘာနည်းပဲ လုပ်လုပ် ဝိတ်ကျဖို့ နှောင့်နှေးစေပါတယ်။
သတိထားဖို့
အဆီများတာတွေ လှိမ့်စားတိုင်း ကီတို မဟုတ်ပါဘူးနော်။ အချိုးအဆ မှန်မှန်နဲ့ စားသင့်ပါတယ်။ Keto Diet ကလည်း တင်းကျပ်တဲ့ စားသောက်ပုံ နည်းလမ်း တစ်ခုပါပဲ။ စားသောက်နည်းကိုတော့ ကိုယ့်ရဲ့ အာဟာရပညာရှင်နဲ့ သေချာဆွေးနွေးပြီး ညွှန်ကြားချက်အတိုင်း လိုက်နာဖို့ အရေးကြီးပါတယ်။
ရေးသားသူ Yun Sandi Nan Mon
ဆေးပညာပိုင်းဆိုင်ရာတည်းဖြတ်သူ Dr. Thurein Hlaing Win
“ယခုဆောင်းပါးကို Myanmar Digital News ၏ မိတ်ဖက်ဖြစ်သည့် ကျန်းမာရေးနှင့် ဆေးပညာဝက်ဘ်ဆိုဒ် Hello ဆရာဝန် https://hellosayarwon.com မှ ကူးယူဖော်ပြခြင်းဖြစ်ပါသည်”
