ကျိုင်းတုံ ၈ ဇန်နဝါရီ
ရှမ်းပြည်နယ်(အရှေ့ပိုင်း)၊ ကျိုင်းတုံမြို့နယ် စည်ပင်သာယာရေးကော်မတီနှင့် ရွှေရွက်မိသားစု ကုမ္ပဏီတို့ ပူးပေါင်းဆောင်ရွက်မှုဖြင့် မြို့တွင်းလမ်း(၃)လမ်း ပြီးမြောက်ခြင်း အထိမ်းအမှတ်နှင့် ဂုဏ်ပြုမှတ်တမ်းလွှာပေးအပ်ခြင်း အခမ်းအနားကို ဇန်နဝါရီ ၇ ရက် နံနက် ၉ နာရီခွဲက ကျိုင်းတုံမြို့၊ အမှတ်(၂)ရပ်ကွက်၊ ရွှေရွက်မိသားစုကုမ္ပဏီလီမိတက်၌ ကျင်းပသည်။
ရှေးဦးစွာ ခရိုင်အုပ်ချုပ်ရေးမှူး ဦးဝင်းမင်းသိန်းက အမှာစကားပြောကြားပြီး မြို့နယ်စည်ပင် သာယာရေးကော်မတီအဖွဲ့ဝင် ဦးစိုင်းလုံခမ်းက လုပ်ငန်းဆောင်ရွက်ခဲ့မှုများနှင့် ပက်သက်၍ ရှင်းလင်း ပြောကြားသည်။
ထို့နောက် ရွှေရွက်မိသားစုကုမ္ပဏီမှ အလှူရှင် ဦးစိုင်းရွက်က အများပြည်သူများ၊ ကျောင်းသား၊ ကျောင်းသူများ သွားလာရလွယ်ကူစေရန် မြို့တွင်းလမ်း(၃)လမ်းအတွက် အလှူငွေ ထည့်ဝင်လှူဒါန်းရခြင်း ဖြစ်ကြောင်း ရှင်းလင်းပြောကြားပြီး ပြည်နယ်ဒုတိယအုပ်ချုပ်ရေးမှူး ဦးရဲနိုင်က အလှူရှင် ဦးစိုင်းရွက်အား ဂုဏ်ပြုမှတ်တမ်းလွှာပေးအပ်သည်။
အဆိုပါမြို့တွင်းလမ်းတွင် မြို့ပတ်ကွန်ကရစ်လမ်းခင်းခြင်း အရှည် ပေ ၃၀၀၀၊ အကျယ် ၂၀ ပေ၊ အထက(၁)လမ်း ကွန်ကရစ်လမ်းခင်းခြင်း အရှည်ပေ ၆၀၀၊ အကျယ် ၁၅ ပေနှင့် ကျိုင်းကာရွာအဝင်လမ်း ကတ္တရာထပ်ပိုးလွှာခင်းခြင်း အရှည်ပေ ၁၄၀၀၊ အကျယ် ၁၈ ပေတို့ဖြစ်ပြီး မြို့နယ်စည်ပင်သာယာရေးကော်မတီ ထည့်ဝင်ငွေကျပ် ၁၀၂၃ ဒသမ ၄ သိန်းနှင့် ရွှေရွက်မိသားစုကုမ္ပဏီ ထည့်ဝင် အလှူငွေကျပ် ၁၁၁၁ ဒသမ ၅ သိန်း၊ စုစုပေါင်း ငွေကျပ် ၂၁၃၄ ဒသမ ၉ သိန်း အကုန်ကျခံ ဆောင်ရွက်ခဲ့ခြင်းဖြစ်ကြောင်း သိရသည်။
အောင်ဇင်မြင့်(ပြန်/ဆက်)
