ကလော၊ ၁၉ ဒီဇင်ဘာ
ရှမ်းပြည်နယ်(တောင်ပိုင်း)တောင်ကြီးခရိုင်၊ ကလောမြို့နယ်တွင် နှစ်စဉ် အစဉ်အလာမပြတ် ကျင်းပ ပြုလုပ်သော (၂၀)ကြိမ်မြောက် မြို့လုံးကျွတ်သံဃာဒါန ဆွမ်းဆန်စိမ်းလောင်းလှူပွဲကို ယနေ့မွန်းလွှဲပိုင်းက မြို့လယ်ဓမ္ဓာရုံ၌ စည်ကားသိုက်မြိုက်စွာ ကျင်းပပြုလုပ်ခဲ့သည်။
အခမ်းအနားတွင် နမောဒဿသုံးကြိမ်ရွတ်ဆိုဘုရားကန်တော့၍ ကလောမြို့ မြို့မပရိယတ္တိ စာသင်တိုက် ဆရာတော် ဘဒ္ဒန္တဦးကုသလ ထံမှ ငါးပါးသီလဆောက်တည်ကြပြီး သံဃာတော်များထံမှ ပရိတ်တရားတော်များ နာယူ၍ လှူဒါန်းမှုအစုစုတို့အတွက် ရေစက်သွန်းချ အမျှပေးဝေခဲ့ကြသည်။
ဆက်လက်၍ တာဝန်ရှိသူများက သံဃာတော်များအား လှူဖွယ်ဝတ္ထုပစ္စည်းများဆက်ကပ်လှူဒါန်းခဲ့ကြသည်။ ထို့နောက် သံဃာတော်များအား စစ်ဦးစီးတက္ကသိုလ်မှ ကျောင်းအုပ်ကြီး ဗိုလ်ချုပ်အောင်အောင်နှင့်ဇနီး၊ အမှတ်(၅၅)ခြေမြန်တပ်မဌာနချုပ်ရှိ တပ်ရင်းတပ်ဖွဲ့များမှ အရာရှိစစ်သည်နှင့်မိသားစုဝင်များ၊ မြို့နယ် အုပ်ချုပ်ရေးမှူး ဦးခင်မင်းနှင့် ဌာနဆိုင်ရာဝန်ထမ်းများ၊ နိုင်ငံရေးပါတီများ၊ လူမှုရေး အသင်းအဖွဲ့များ၊ ရပ်ကွက်/ ကျေးရွာနှင့် ရပ်နှီးရပ်ဝေးမှ စေတနာရှင်အလှူရှင်တို့က ပင့်သံဃာ(၅၆၃)ပါး ၊ သီလရှင်(၈၄)ပါး စုစုပေါင်း(၆၄၇)ပါး တို့ကို ဆန်အိတ် (၃၅၈)အိတ်နှင့် အခြားလှူဖွယ်ပစ္စည်းများ လောင်းလှူခဲ့ကြသည်။
အဆိုပါ ဆွမ်းဆန်စိမ်းလောင်းလှူပူဇော်ပွဲကို မြို့လယ်ဓမ္မာရုံမှ ကုန်သည်လမ်း၊ သိရိမင်္ဂလာလမ်း ၊ ပြည်ထောင်စုလမ်း၊ မြို့မစျေးအရှေ့ဘက်၊ မြို့မစျေးတောင်ဖက်မှ မြို့လယ်ဓမ္မာရုံထိ အပူဇော်ခံလှည့်လည်ခဲ့ကြောင်း သိရသည်။
ကျော်ဝင်း(ပြန်/ဆက်)
