ပြင်သစ်အိုးပင်း အမျိုးသမီးတစ်ဦးချင်းပြိုင်ပွဲ နောက်ဆုံးဗိုလ်လုပွဲအဖြစ် ကမ္ဘာ့အဆင့် (၁) လယ်လာရုစ်တင်းနစ်မယ် ဆာဘယ်လင်ကာနှင့် ကမ္ဘာ့အဆင့်(၂) အမေရိကန်တင်းနစ်မယ် ကိုကိုဂါ့ဖ်တို့ ယှဉ်ပြိုင်ကစားခဲ့ရာ ကိုကိုဂါ့ဖ်က အနိုင်ရရှိကာ ပထမဆုံးအကြိမ် ပြင်သစ်အိုးပင်း ဖလားကို ဆွတ်ခူးနိုင်ခဲ့သည်။
ကိုကိုဂါ့ဖ်သည် ဆာဘယ်လင်ကာကို အကြိတ်အနယ်ယှဉ်ပြိုင်ကစားခဲ့ရပြီး ၆-၇ (၅-၇)၊
၆-၂ ၊ ၆-၄ ရလဒ်ဖြင့် နိုင်ပွဲရရှိကာ ဖလားဆွတ်ခူးကိုင်မြောက်အောင်ပွဲခံနိုင်ခဲ့ခြင်းဖြစ်သည်။ ၎င်းသည် ၂၀၁၅ ခုနှစ်က ဆီရီနာဝီလျံပြီးနောက် ပြင်သစ်အိုးပင်းပြိုင်ပွဲတွင် ဖလားဆွတ်ခူး နိုင်သည့် ပထမဆုံး အမေရိကန်တင်းနစ်မယ်အဖြစ် မှတ်တမ်းဝင်ခဲ့သည်။
ကိုကိုဂါ့ဖ်သည် ပြင်သစ်အိုးပင်းပြိုင်ပွဲတစ်လျှောက်တွင် နာမည်ကြီး တင်းနစ်မယ်များဖြစ်သည့် ဗယ်လန်တိုဗာ ၊ ဘော့ဇ်ကိုဗာ၊ အဲလက်ဇန်ဒရိုဗာ၊ ကီးစ်၊ ဘော့ဆင်တို့ကို အဆင့်ဆင့်အနိုင်ယူ ကျော်ဖြတ်နိုင်ခဲ့သည်။ ထို့ပြင် ဗိုလ်လုပွဲတွင်လည်း နာမည်ကြီး တင်းနစ်မယ် ဆာဘယ်လင်ကာကို ထပ်မံအနိုင်ယူကျော်ဖြတ်ကာ ပြင်သစ်အိုးပင်းဖလားကို ထိုက်ထိုက်တန်တန်ဆွတ်ခူးနိုင်ခဲ့ခြင်း ဖြစ်သည်။
ဆီမီးဖိုင်နယ်တွင် လက်ရှိချန်ပီယံ နာမည်ကြီး ပိုလန် တင်းနစ်မယ် ဆွီယာတက်ခ်ကို အနိုင်ယူကျော်ဖြတ်နိုင်ခဲ့သော ဆာဘယ်လင်ကာသည် ဗိုလ်လုပွဲတွင် ပြိုင်ဘက်ကို ရှုံးနိမ့်ခဲ့သည့် အတွက် ဖလားဆွတ်ခူးခွင့် လွဲချော်ခဲ့သည်။
အောင်ဇော်
