အင်းတော် ၁၈ မတ်
စစ်ကိုင်းတိုင်းဒေသကြီး ကသာခရိုင် အင်းတော်မြို့နယ်၊ လက်ပံကုန်းကျေးရွာ ဆရာပွဲဗုံလုပ်ငန်းမှ လှူဒါန်းသော ကမ္ဘာ့အကြီးဆုံးစည်တော်ကြီး အဓိကဒုန္ဒုဘစည်တော်ကြီးအား မတ် ၁၇ ရက် နံနက် ၉နာရီတွင် စစ်ကိုင်းမြို့၊ ကောင်းမှုတော်စေတီတော်တွင်ထားရှိရန် အင်းတော်မြို့ အင်းမြသာယာအားကစားကွင်းမှ စတင်ပင့်ဆောင် သယ်ယူခဲ့ကြောင်းသိရသည်။
အဆိုပါ စည်တော်ကြီးအား ပင့်ဆောင်သယ်ယူရာတွင် စစ်ကိုင်းတိုင်းဒေသကြီးလွှတ်တော် ဒုတိယဥက္ကဌ ဦးဘိုသန်းညွန့် တိုင်းဒေသကြီးခရီးသွားလုပ်ငန်းဖွံဖြိုးတိုးတက်ရေးအဖွဲ့မှ တိုင်းစည်တော်ပင့်ဆောင်ရေး ကော်မတီဝင် ဦးသန်းဌေး၊ စည်တော်အလှူ့ရှင် ဦးကျော်ညွန့်မိသားစု၊ ကသာခရိုင်၊စစ်ကိုင်းခရိုင်တို့မှ စီမံခန့်ခွဲမှုကော်မတီဝင်များ၊ မခေါက်ဗျော၊ မိုးဇာဗျော၊ ဝတ်ရွတ်အသင်းများဖြင့် ပင့်ဆောင်သယ်ယူခဲ့ကြကြောင်းသိရသည်။
လမ်းခရီးတွင် ကောလင်းမြို့၌ မတ် ၁၇ ရက် နေ့တွင် ညအိပ်ရပ်နားပြီး သီတဂူတရားပွဲကျင်းပခြင်း၊ ရွှေဘိုမြို့၌ မတ် ၁၈ ရက်နေ့တွင် ညအိပ်ရပ်နားပြီး သီတဂူတရားပွဲကျင်းပခြင်းများပြုလုပ်သွားပြီး မတ် ၁၉ ရက်နေ့ ညနေတွင် စစ်ကိုင်းမြို့၊ ကောင်မှုတော်စေတီတော်ကြီးတွင် စည်တော်ထားရှိပူဇော်သွားမည်ဖြစ်ကြောင်းသိရသည်။
စည်တော်ကြီးကို ကသာခရိုင်၊ အင်းတော်မြို့မှ နှစ်ပေါင်း(၁၅၀)ကျော် သက်တမ်းရှိ ကုက္ကိုသားဖြင့် ထွင်းထုထားပြီး စည်တော်ကြီးမျက်နှာဝ ၅ ပေ ၄ လက်မ၊ အရှည် ၁၀ ပေ ၈ လက်မ၊ လုံးဝန်းပတ် ၁၇ ပေ ၈ လက်မ၊ အလေးချိန် ခန့်မှန်း (ဝ.၂၅)တန်၊ စည်တော်ကြီးဘေး တစ်ဖက်တစ်ချပ်တွင် ပုဂံခေတ်လက်ရာ (၁၀၈)ကွက်သော ဗုဒ္ဓခြေတော်ရာ စက်လက္ခဏာအား နတ်မင်းကြီး (၂)ပါးမှ ပူဇော်နေဟန် ထွင်းထုထားကာ စည်တော်ကြီးအတွင်းပိုင်း၌ ဘုရားအနေကဇာတင် သမ္ဗုဒ္ဓေဂါထာတော်၊ ဓါရာဏပရိတ်၊ ပဋ္ဌာန်း (၂၄)ပစ္စည်းနှင့် ရှင်သီဝလိဂါထာတော်၊ ဘားမဲ့ဆရာတော်၏ ဘုရား(၄)ဆူအင်း၊ ကြီးလေးကြီးအင်း၊ ၁၀၈ ကွက်ဂါထာတော်များဖြင့် ထွင်းထုပူဇော်ထားကြောင်း သိရသည်။
ကိုမင်း(အင်းတော်)
