ကမမောင်း ၂ မေ
ကရင်ပြည်နယ်၊ ဖာပွန်ခရိုင်၊ ကမမောင်းမြို့၊ အမှတ်(၂)ရပ်ကွက်၊ အုန်းတောစုအပိုင် အိမ်ခြေ(၆၅၀)စုနှင့် ဘုန်းတော်ကြီးကျောင်း နှစ်ကျောင်းတို့အတွက် အုန်းတောစုနေ စေတနာရှင် ဦးတင်စိုး(ခ)ဦးဖိုးစိုး နှင့် ဒေါ်နီလာသန်းမိသားစုတို့က မိဘ၊ ဆရာသမားတို့အား အမှူးထားပြီး ဆန်၊ ဆီ၊ ဆား၊ ကြက်သွန်၊ ဆားတို့ကို ဧပြီလ(၂၈)ရက်နေ့မှ မေလ(၂)ရက်နေ့အထိ အုပ်စုအပိုင်လိုက်ခွဲ၍ ရပ်ကွက်ဆယ်အိမ်မှူး၊ ရာအိမ်မှူးတို့နှင့် ပူးပေါင်းပြီး အိမ်တိုင်ရာရောက် သွားရောက်လှူဒါန်းပေးခဲ့သည်။
စေတနာရှင် ဦးတင်စိုး(ခ)ဦးဖိုးစိုးမိသားစုမှ အိမ်ထောင်စုတစ်စုလျှင် ဆန်(၆)ပြည်၊ ကြက်သွန်နီ (၅၀)ကျပ်သား၊ ဆား (၂၅) ကျပ်သား၊ ဆီ(၅၀)ကျပ်သား၊ ဘုန်းကြီးကျောင်း(၁) ကျောင်းလျှင် ဆန်(၁၈)ပြည်ဝင် အိတ်(၁၅)လုံး၊ စားဆီ(၅)ပိဿာ ပုံး(၁)ပုံး၊ ကြက်သွန်နီ (၁၀)ပိဿာ စုစုပေါင်းငွေကျပ် သိန်း(၆၀)တန်ဖိုးရှိ အခြေခံစား သောက်ကုန်များကို လှူဒါန်းပေးခဲ့သည်။
အလှူရှင် ဦးတင်စိုး(ခ)ဦးဖိုးစိုးက "ဒီနှစ် မဟာသင်္ကြန်မကျမီ တရားပွဲနှင့် စုပေါင်းရဟန်းခံ၊ ရှင်ပြု အလှူမင်္ဂလာပွဲပြုလုပ်ရန်ရည်ရွယ်၍ မိမိတို့မိသားစုက ငွေကြေးများစုဆောင်း ခဲ့ပါကြောင်း၊ ကိုဗစ်-၁၉ ကူးစက်မြန်ဗိုင်းရပ်စ် ရောဂါအန္တရာယ်ကြိုတင်ကာကွယ်ရေး အနေဖြင့် လူစုလူဝေးဖြစ်စေမည့် အလှူပွဲများ မပြုလုပ်ရန် နိုင်ငံတော်အစိုးရက လမ်းညွှန်ချက်များ ထုတ်ပြန်ထားသည့်အတွက် အလှူမင်္ဂလာပွဲကို မလုပ်ဖြစ်တော့ကြောင်း၊ အလှူမင်္ဂလာပွဲ မပြုလုပ်ရပေမယ့်လည်း ကိုဗစ်-၁၉ ဗိုင်းရပ်စ်ရောဂါကြောင့် မိမိတို့ အုန်းတောအပိုင်စုမှ အိမ်ထောင်စုများမှာ အလုပ်အကိုင်နည်းပါးပြီး စားဝတ်နေရေး ကြပ်တည်းနေသည်ကို သိရှိရသည့်အတွက် အလှူမင်္ဂလာပွဲပြုလုပ် ရန်ရည်စူးပြီး စုဆောင်းထားသော ငွေများကို စားသောက်ရေးခက်ခဲနေကြသော အိမ်ထောင်စုများအတွက် ခွဲဝေလှူဒါန်းပေးရခြင်းဖြစ်ပါကြောင်း၊ ယခုလို အလှူပြုလုပ်ရသည့်အတွက် မိမိတို့မိသားစု အနေဖြင့်ဝမ်းသာပီတိအမှန်တကယ် ရရှိခဲ့ကြကြောင်း ရှင်းပြခဲ့သည်။
လင်းသန့်(ပြန်/ဆက်)
