ရန်ကုန် ဇွန် ၁၀
ထိုင်းနိုင်ငံသို့ မြန်မာနိုင်ငံဘက်မှ ကွမ်းသီးများကို ကော့သောင်းမှတစ်ဆင့် ရနောင်းသို့ တင်ပို့မှုရှိနေကြောင်း မြိတ်မြို့နယ်ရှိ ကွမ်းသီးရောင်းဝယ်ရေး အကျိုးတော်ဆောင်များထံမှ သိရသည်။
လက်ရှိ အနေအထားတွင် ဘုတ်ပြင်းမြို့ဘက်မှထွက်သော ကွမ်းသီးများကိုလည်း ကော့သောင်းမှ တစ်ဆင့် ထိုင်းနိုင်ငံဘက် ပေးပို့နေကြောင်း သိရသည်။
" လက်ရှိမှာက ဘုတ်ပြင်းဘက်က ကွမ်းသီး တော်တော်များမျာ ကော့သောင်းကနေ ပြန်ဆင်းနေတယ်။ ကွမ်းသီးက ခါတိုင်းဆို ဒီကနေ ရန်ကုန်၊ ရန်ကုန်ကနေမှတစ်ခါ အိတ်စ်ပို့ ပို့တယ်။ ခါတိုင်းမထွက်တဲ့ ကွမ်းသီးတောင် ဒီနှစ်တော့ (ထိုင်းဘက်) ထွက်တယ်။ ကော့သောင်းကနေ ရနောင်းပြန်ဝင်တယ်ပေါ့၊ အခုနှစ်မှာ အိတ်စ်ပို့က ကွမ်းသီးဆိုအခြမ်းများတယ်” ဟု မြိတ်မြို့နယ်ရှိ ကွမ်းသီးကုန်သည် တစ်ဦးက ရှင်းပြသည်။
လက်ရှိ ကော့သောင်း- ရနောင်းလမ်းကြောင်းမှတစ်ဆင့် ထိုင်းနိုင်ငံသို့ ရေထွက်ကုန် ပစ္စည်းများပို့နေပြီး ထိုင်းနိုင်ငံဘက်မှ လူသုံးကုန် ပစ္စည်းများနှင့် စားသောက်ကုန်များ ပြန်လည် တင်သွင်းနေကြောင်းလည်း သိရသည်။
"ရေထွက်ပစ္စည်း အဓိကအများဆုံးပို့တာက ထိုင်းကိုပေါ့။ အဓိက သူတို့ကအသုံးများတယ်၊။ အစားများတယ်ပေါ့။ ကော့သောင်း - ရနောင်းကနေပို့တာပေါ့။ နောက်လှေတွေ ဘာတွေမှာ သုံးတဲ့ ပစ္စည်းတွေ၊ လူသုံးကုန် ပစ္စည်းလည်း ထိုင်းဘက်ကဝင်တာပေါ့။ စားသောက်ကုန်တွေလည်း ဒီလမ်းကြောင်းကနေ ဝင်တာရှိပါတယ်” ဟု ကော့သောင်းမြို့နယ်ရှိ ရေထွက်ပစ္စည်း ရောင်းဝယ်ရေး လုပ်ငန်းရှင်တစ်ဦးက ဆိုသည်။
Thit Taw
