ကရင်ပြည်နယ်ဝန်ကြီးချုပ် ဒေါ်နန်းခင်ထွေးမြင့် ကျိုက်ဒုံမြို့ ဒေသခံပြည်သူများနှင့်တွေ့ဆုံ၍ အသက်(၈၅) နှစ်နှင့်အထက် ဘိုးဘွားများ၊ ကိုယ်ဝန်ဆောင်မိခင်များနှင့် အသက်(၂)နှစ်အောက် ကလေးငယ်များအား ထောက်ပံငွေပေးအပ်

ဘားအံ ၁၃ ဇန်နဝါရီ

ကရင်ပြည်နယ်အစိုးရအဖွဲ့၊ ပြည်နယ်ဝန်ကြီးချုပ် ဒေါ်နန်းခင်ထွေးမြင့်၊ အစိုးရအဖွဲ့ဝင် ဝန်ကြီးများနှင့် ဌာနဆိုင်ရာ တာဝန်ရှိသူများသည် ဇန်နဝါရီလ ၁၂ ရက်နေ့ နံနက် ၁၁ နာရီခန့်က ကြာအင်းဆိပ်ကြီး မြို့နယ်၊ ကျိုက်ဒုံမြို့ မိတန်သမဂ္ဂ ဘုန်းတော်ကြီးကျောင်း၌ ကျိုက်ဒုံမြို့ ဒေသခံပြည်သူများနှင့် တွေ့ဆုံ၍ ကျိုက်ဒုံမြို့ရှိ အသက်(၈၅)နှစ်နှင့်အထက် သက်ကြီး အဘိုး/အဘွားများ၊ကိုယ်ဝန်ဆောင်မိခင်များနှင့် အသက်(၂)နှစ်အောက် ကလေးများအား ထောက်ပံ့ငွေများ ပေးအပ်ခဲ့သည်။

ရှေးဦးစွာ ပြည်နယ်ဝန်ကြီးချုပ်က အမှာစကားပြောကြားပြီး တက်ရောက်လာသော ဒေသခံပြည်သူ များက ပညာရေး၊ ကျန်းမာရေး၊ လမ်းပန်းဆက်သွယ်ရေး အစရှိသည့် ဒေသ၏လိုအပ်ချက်များအား တင်ပြဆွေးနွေးရာ ပြည်နယ်ဝန်ကြီးချုပ်က သက်ဆိုင်ရာ ဌာနဆိုင်ရာတာဝန်ရှိသူများနှင့် ပေါင်းစပ်ညှိနှိုင်း ဆောင်ရွက်ပေးခဲ့သည်။

ထို့နောက် ပြည်နယ်ဝန်ကြီးချုပ်နှင့်အစိုးရအဖွဲ့ဝင်ဝန်ကြီးများသည် ကျိုက်ဒုံမြို့ရှိ အသက်(၈၅)နှစ်နှင့် အထက် ဘိုးဘွား (၃၂)ဦးအတွက် ၂၀၁၉-၂၀၂၀ ဘဏ္ဍာရေးနှစ် ပထမ(၃)လပတ် လူမှုရေးပင်စင် ငွေကျပ် ၉၆၀ဝ၀ဝ ၊ ကိုယ်ဝန်ဆောင်မိခင် ၅၉၄ ဦးနှင့် အသက်(၂)နှစ်အောက်ကလေး ၅၉၂ ဦး စုစုပေါင်း ၁၁၈၆ ဦးအတွက် ထောက်ပံ့ငွေ ငွေကျပ် ၅၂၉၃၅၀ဝ၀ စုစုပေါင်း ငွေကျပ် ၅၃၈၉၅၀ဝ၀ ကို ထောက်ပံ့ ပေးအပ်ခဲ့ပြီး ကိုယ်ဝန်ဆောင်မိခင်နှင့် အသက်(၂)နှစ် အောက်ကလေးများအား အာဟာရနို့မှုန့်နှင့် မုန့်များ လှူဒါန်းပေးအပ်ခဲ့သည်။

စောမျိုးမင်းသိန်း(ပြန်/ဆက်)