ကုသိုလ်ဖြစ်အဖွဲ့အစည်းသို့ ဂျာမနီမိသားစု ယူရို ၁၀ သန်း လှူဒါန်းမည်

နာမည်ကျော် စီးပွားရေးလုပ်ငန်းများတွင် အစုရှယ်ယာများပိုင်ဆိုင်သည့် ချမ်းသာကြွယ်ဝသော ဂျာမနီ နိုင်ငံရှိ မိသားစုတစ်စုသည် အတိတ်ကာလက နာဇီတို့၏ နိုင်လိုမင်းထက်ပြုမူမှုများတွင် ပတ်သက်မှုရှိခဲ့ကြောင်း ဝန်ခံခဲ့သည်။

The Reimann မိသားစုက ကုသိုလ်ဖြစ်အဖွဲ့တစ်ခုသို့ လှူဒါန်းမှုတစ်ခုပြုလုပ်ရန် ကတိပြုခဲ့သည်။ JAB Holding Company တည်ထောင်သူ မိသားစုဝင်နှစ်ဦးက နာဇီခေါင်းဆောင် အဒေါ့ဟစ်တလာကို ထောက်ခံသူများဖြစ်ကြောင်း ပြောကြားခဲ့သည်ဟု ဂျာမနီသတင်းစာ Bild က မတ်လ ၂၄ ရက်တွင် ရေးသားဖော်ပြခဲ့သည်။ အဆိုပါပုဂ္ဂိုလ် နှစ်ဦးသည် ၎င်းတို့ပိုင် စက်ရုံများတွင် အရှေ့ဥရောပမှ နိုင်ငံသားများနှင့် ပြင်သစ်အကျဉ်းသားများကို အဓမ္မခိုင်းစေသည့် လုပ်သားများအဖြစ် အသုံးပြုခဲ့သည်ဟုဆိုသည်။

၎င်းတို့ မိသားစု၏ ရင်းနှီးမြှပ်နှံမှုကုမ္ပဏီမှာ Krispy Kreme Doughnuts နှင့် အခြားကုမ္ပဏီများတွင် အ စုရှယ်ယာများ ပိုင်ဆိုင်မှုကြောင့် ထင်ရှားကျော်ကြားသည်။ လှူဒါန်းမည့် သတင်းမှာ မှန်ကန်ကြောင်း ကုမ္ပဏီ၏ အကြီးအကဲတစ်ဦးဖြစ်သူ ပီတာဟတ်က မီဒီယာများသို့ ပြောကြားသည်။ ကုသိုလ်ဖြစ်အဖွဲ့အစည်းများသို့ ယူရို ၁၀ သန်းနှင်ညီမျှသည့် အမေရိကန်ဒေါ်လာ ၁၁ ဒသမ ၃ သန်း လှူဒါန်းမည့် အစီအစဉ်တစ်ရပ်ကို အဆိုပါမိသားစုက ထုတ်ဖော်ပြောကြားခဲ့သည်။

ဂျာမနီနိုင်ငံတွင် Volkswagen နှင့် Siemens ကဲ့သို့သော ဒုတိယကမ္ဘာစစ်အတွင်း နာဇီတို့နှင့် ပူးပေါင်း ဆောင်ရွက်ခဲ့သည့် ကုမ္ပဏီများက အစိုးရနှင့်အတူတည်ထောင်ထားသည့် ရန်ပုံငွေတစ်ရပ်ဖြင့် ဂျူးလူမျိုးများကို လျော်ကြေးငွေများပေးခဲ့သည်။

ကိုးကား-အန်အိတ်ချ်ကေ
ဘာသာပြန်-မေဇော်ထက်