ကျောက်ဖြူ  ၂၅   ဇန်နဝါရီ 

ရက္ခပူရသာသနာလင်္ကာရအသင်း(ခွဲ)မှ ဦးဆောင်၍ လင်္ကရစာမေးပွဲဖြေဆိုရန် ရန်ကုန်မြို့မှ စစ်တွေမြို့သို့သွားရောက်မည့် စာဖြေသံဃာတော် အပါး(၄၈၀)ကျော်တို့သည် ကျောက်ဖြူမြို့တွင် ခေတ္တရပ်နားစဉ် ကျောက်ဖြူမြို့ရှိစေတနာရှင်များက ယနေ့၊နံနက် ၁၁ နာရီခွဲအချိန်တွင် မုန့်တီဆွမ်းနှင့် နေ့လည်ဆွမ်းများ ဆက်ကပ်လှူဒါန်းခဲ့ကြသည်။

အဆိုပါ စာဖြေရန်သွားရောက်သော သံဃာအပါး(၄၈၀)ကျော်တို့သည် ရန်ကုန်မြို့မှ Express (၁၂)စီးဖြင့် ကျောက်ဖြူမြို့သို့ ရောက်ရှိလာပြီး နဂါးကျောက်တိုက်၊ ယပ်လှဲကျောင်းတိုက်တို့မှ စတင်ကာ ဦးဥတ္တမလမ်းမှ နာရီစဉ်ကွင်း သာသနာ့ဗိမာန်သို့ကြွချီရာလမ်း တစ်လျှောက် လမ်းဘေးဝဲယာတို့တွင် စေတနာရှင် မြို့သူ/မြို့သားများက ဆွမ်း၊ လှူဖွယ်ပစ္စည်းများဖြင့် ဆက်ကပ်ခဲ့ကြကာ သံဃာတော်များသည်  သာသနာ့ဗိမာန်နှင့် နာရီစဉ်ကွင်းယာယီမဏ္ဍပ်တွင် နေ့ဆွမ်းသုံးဆောင်ခဲ့ကြသည်။

၎င်းစာဖြေသံဃာတော်များသည် မွန်းလွဲပိုင်းတွင် ကျောက်ဖြူမြို့၊ ငလပွေ့ဆိပ်ကမ်းမှ ကစ္ဆပနဒီနှင့် ရွှေပြည်တန် အမြန်ရေယာဉ်များဖြင့် စစ်တွေမြို့သို့ ဆက်လက်ကြွချီခဲ့ကြောင်း သိရသည်။

ဖြိုးဝေလင်း(ပြန်/ဆက်)