ရန်ကင်း ၂၁ ဒီဇင်ဘာ
မြို့နယ်မိခင်နှင့် ကလေးစောင့်ရှောက်ရေးအသင်းမှ ကြီးမှူးကျင်းပသော လူကုန်ကူး၊ လူမှောင်ခို တားဆီးကာကွယ်ရေး အသိပညာပေးဟောပြောပွဲကို ယနေ့နံနက် ၉ နာရီခွဲက ရန်ကုန်အရှေ့ပိုင်းခရိုင်၊ ရန်ကင်း မြို့နယ်၊ အမှတ်(၁၁)ရပ်ကွက်၊ ဘူတာရုံလမ်းရှိ သုခိတာရာမ သီလရှင်ကျောင်း၌ကျင်းပခဲ့သည်။
ဟောပြောပွဲတွင် မြို့နယ်ရဲမှူး စိုးမြင့်ဦးမှ လူကုန်ကူးမှုပေါ်ပေါက်လာရသည့် အကြောင်းရင်းများ၊ လူကုန်ကူးမှုဖြစ်စေသော အဓိကအကြောင်းရင်းများ၊ မြန်မာနိုင်ငံ၏ လူကုန်ကူးမှုဖြစ်စဉ်များ၊ လူကုန်ကူးခံရပါက ဆောင်ရွက်ရန်နည်းလမ်းများ၊ လူကုန်ကူးသူတို့ အသုံးပြုပုံနည်းလမ်းများ၊ လူကုန်ကူးမှု တားဆီးကာကွယ်ရေး ဆိုင်ရာဥပဒေများနှင့် သတိပြုရန်အချက်များကို သီလရှင်ဆရာလေးများအား ရှင်းလင်းဟောပြောခဲ့သည်။
ဆက်လက်၍ မြို့နယ်ပြည်သူ့ကျန်းမာရေးဝန်ထမ်းများ၊ မိခင်နှင့်ကလေးစောင့်ရှောက်ရေးအဖွဲ့ဝင်များမှ သီလရှင် ဆရာလေးများ၏ တစ်ကိုယ်ရည်ကျန်းမာရေး ဆောင်ရွက်ရန်နည်းလမ်းများ၊ လက်စနစ်တကျ ဆေးကြောနည်းတို့ကို လက်တွေ့ သရုပ်ပြ ဆောင်ရွက်ပေးခဲ့ကြောင်း သိရသည်။
လင်းလင်းထွန်း (ပြန်/ဆက်)
