ဦးအောင်နိုင်ဦး (GAD)
နိဒါန်း
နိုင်ငံတော်အနေဖြင့် ဆီထွက်သီးနှံကဏ္ဍဖွံ့ဖြိုး တိုးတက်စေရန်နှင့် စားသုံးဆီဖူလုံစေရန် ရည်ရွယ်၍ စားသုံးဆီ ဖူလုံရေးအတွက် ဆီထွက်သီးနှံများ တိုးချဲ့စိုက်ပျိုးရေးကော်မတီကို ၂၂-၄-၂၀၂၂ ရက်စွဲပါ အမိန့်ကြော်ငြာစာအမှတ်၊ (၁/၂၀၂၂)ဖြင့် “ဆီထွက် သီးနှံ တိုးချဲ့စိုက်ပျိုးရေး စီမံကိန်းလုပ်ငန်း အကောင်အထည်ဖော်မှု ကြီးကြပ်ရေးကော်မတီ” အား ဖွဲ့စည်းတာဝန်ပေးအပ်ခဲ့ပါသည်။ ပြည်တွင်းစားသုံးဆီဖူလုံရေးနှင့် ပြည်ပသို့ စားသုံးဆီတင်ပို့ ရောင်းချနိုင်ရေးအတွက် ဘဏ္ဍာနှစ်အလိုက် နေကြာနှင့် ဆီထွက်သီးနှံများ တိုးချဲ့စိုက်ပျိုးရန်၊ ဆီစက်လုပ်ငန်းများ ဖွံ့ဖြိုးလာရန်တွန်းအားပေး ဆောင်ရွက်လျက်ရှိပြီး တောင်သူများ၏ လိုအပ်ချက်၊ ပုဂ္ဂလိကပိုင်း၏ လိုအပ်ချက်များ ဖြည့်ဆည်းပေးနိုင် ရေး စီမံဆောင်ရွက်လျက်ရှိပါသည်။ ၂၀၂၂ - ၂၀၂၃ ဘဏ္ဍာနှစ် ဆီထွက်သီးနှံများ တိုးချဲ့စိုက်ပျိုးရေး တွင် နေကြာသီးနှံကို ဧက ၁ ဒသမ ၅ သန်းအထိ တိုးချဲ့စိုက်ပျိုးရေးအတွက် တိုင်းဒေသကြီးနှင့် ပြည်နယ်များတွင် သက်ဆိုင်ရာ အစိုးရအဖွဲ့များ၊ စိုက်ပျိုးရေးပညာရှင်များ၊ စီးပွားရေးလုပ်ငန်းရှင်များ၊ ဒေသခံတောင်သူကြီးများ၊ အရပ်ဘက်အဖွဲ့အစည်း များက အားသွန်ခွန်စိုက်ဝိုင်းဝန်းကြိုးပမ်း အကောင် အထည်ဖော်ဆောင်ရွက်လျက်ရှိပါသည်။
နေကြာ
နေကြာသည် ရွှေအိုရောင်အဆင်းရှိ၍ ရုက္ခဗေဒ အခေါ် Helianthus Anthus L ဖြစ်ပြီး အင်္ဂလိပ် အခေါ် Sunflower ဖြစ်သည်။ Helianthus သည် Greek စကားလုံး Helios (နေ)၊ Anthos (ပန်း) နှင့် Latin ဘာသာ annuus မှ annual (နှစ်ပတ်လည်) ဟူ၍ဖြစ်သည်။ နေကြာပန်းကို ကမ္ဘာ့နိုင်ငံများ၌ အမြတ်တနိုးတန်ဖိုးထားကြသည်။ တချို့နိုင်ငံများ၌ national flower အဖြစ်လည်းကောင်း၊ state flower အဖြစ်လည်းကောင်း သတ်မှတ်၍ထားရှိသည် ကိုလည်း လေ့လာတွေ့ရှိရပါသည်။ ဘီစီ ၂၆၀၀ အစော ပိုင်းတွင် မက္ကဆီကိုနိုင်ငံ Tabasco တွင် စတင်စိုက်ပျိုးခဲ့သည်။ စပိန် စူးစမ်းရှာဖွေသူများသည် နေကြာပန်းကိုတွေ့ရှိပြီး ယင်းမျိုးစေ့များကို ဥရောပသို့ သယ်ဆောင်ကာ မိတ်ဆက်ပေးခဲ့သည်။ အစပိုင်းတွင် အလှဆင်အပင်အဖြစ် စိုက်ပျိုးခဲ့ပြီးနောက်ပိုင်းတွင် အစားအသောက်နှင့် ဆေးဘက်ဆိုင်ရာ ရည်ရွယ်ချက်များဖြင့် စိုက်ပျိုးခဲ့သည်။ မြန်မာနိုင်ငံတွင် ဆီစားနေကြာကို ၁၉၇၆ - ၁၉၇၇ ခုနှစ်ခန့်မှစ၍ စိုက်ပျိုးခဲ့ကြပါသည်။
နေကြာဆီ
နေကြာစေ့မှာ ၄၅ ရာခိုင်နှုန်းမှ ၅၄ ရာခိုင်နှုန်း အဆီပါဝင်မှုရှိသည့် ဆီထွက်သီးနှံတစ်မျိုးဖြစ်ပြီး ရွှေရောင်အဆင်း၊ ကြည်လင်သော အနံ့အရသာနှင့် နေကြာဆီမှာ လူကြိုက်များသည့် စားသုံးဆီတစ်မျိုး လည်းဖြစ်ပါသည်။ နေကြာဆီသည် အခန်းအပူချိန်တွင် အရည်ဖြစ်သည်။ သန့်စင်ထားသော နေကြာဆီ သည်ကြည်လင်ပြီး ပယင်းရောင်ရှိသည်။ နေကြာစေ့များမှ ထုတ်လုပ်သော နေကြာဆီသည် စားသောက် ကုန်များ၊ အလှကုန်များ၊ ဆေးဝါးနှင့် လူသုံးကုန် ပစ္စည်းထုတ်လုပ်ရာတွင် အသုံးပြုကြသည်။ နေကြာဆီတွင် အဓိကအားဖြင့် linoleic acid ၊ polyunsaturated fat နှင့် oleic acid ၊ mono-unsaturated fat ဓာတ်တို့ များစွာပါဝင်သည်။ ကမ္ဘာ့နေကြာဆီ ထုတ်လုပ်မှုသည် တန်ချိန် ၁၈ သန်း ရှိပြီး ယူကရိန်းနှင့် ရုရှားတို့ကဦးဆောင်ကာ ကမ္ဘာ့ စုစုပေါင်း၏ ၅၃ ရာခိုင်နှုန်းဖြင့် ထိပ်တန်းထုတ်လုပ် သူများအဖြစ် ပါဝင်ခဲ့သည်။ ၂၀၂၂ ခုနှစ်တွင် ရုရှား- ယူကရိန်း အကျပ်အတည်းကြောင့် ကမ္ဘာ့နေကြာဆီ ထုတ်လုပ်မှု ၅၀ ရာခိုင်နှုန်းကျော် ကျဆင်းသွားကာ နေကြာဆီပြတ်လပ်မှု ဖြစ်ပွားခဲ့ပါသည်။ နေကြာဆီ အား အပူချိန်နိမ့်သောနေရာတွင် ထားရှိခြင်းသည် ညစ်ညမ်းမှုနှင့် အာဟာရဓာတ်များ ဆုံးရှုံးခြင်းတို့ကို လျှော့ချနိုင်သည်။ နက်မှောင်သောဖန်ဖြင့် ပြုလုပ် ထားသည့် ပုလင်းများ၊ ခရမ်းလွန်ရောင်ခြည်ကို ကာကွယ်ထားသော ပလတ်စတစ်ဖြင့် ပြုလုပ်ထားသည့် ပုလင်းများတွင် သိမ်းဆည်းထားနိုင်သည်။
နေကြာဆီ၏ အကျိုးကျေးဇူးများ
နေကြာဆီ (Helianthus annuus) သည် နေကြာ စေ့များမှ ထုတ်ယူထားသော triglyceride (ဖက်တီး အက်စစ်မော်လီကျူးသုံးခုတွဲထားသည့် မော်လီကျူး အစုအဝေး) ဖြစ်သည်။ ဗီတာမင် E အလွန် ကြွယ်ဝ သည်။ နေကြာစေ့ ၁၀၀ ဂရမ်ခန့်တွင် ဖောလစ် အက်ဆစ် ၂၂၇ ဂရမ် ပါဝင်သည်။ ဆယ်လီနီယမ်ဓာတ်၊ မဂ္ဂနီဆီယမ် စသည့်ဓာတ်သတ္တုပစ္စည်းများ ပါဝင် သည်။ ကျန်းမာရေးအတွက် သင့်လျော်သည့် စားသုံး ဆီတစ်ခုဖြစ်သည်။ မှိုတက်နိုင်ခြင်း နည်းပါသည်။ မြေပဲဆီကဲ့သို့ အာဖလာတောက်ဆင် (မှိုဆိပ်) အတွက် စိုးရိမ်ရန်မရှိပါ။ မျိုးစေ့၊ စိုက်ပျိုးသည့် ဒေသ၊ ရာသီဥတု၊ ရိတ်သိမ်းချိန်နဲ့ ဆီထုတ်မှုနည်း စနစ်တွေပေါ်မူတည်ပြီး နေကြာဆီမှာ ပါဝင်သော ဖက်တီးအက်စစ်အမျိုးအစား ပြောင်းလဲမှုရှိပါသည်။ နေကြာဆီ အမျိုးအစားများကို linoleic acid ပါဝင် မှုအရ High - linoleic၊ Mid-oleic၊ High oleic၊ High oleic / high stearic ဟု လေးမျိုးခွဲခြားနိုင်ပါ သည်။ နှလုံးအားကောင်းခြင်း၊ အရေပြားစနစ် အားကောင်းခြင်း၊ အသားအရည်လှပစေခြင်း၊ ဆံကေသာ ကောင်းမွန်စေခြင်း၊ အဆစ်အမျက် ရောင်ရမ်းခြင်းကို ကာကွယ်ခြင်း၊ ပန်းနာရင်ကျပ်ရောဂါသက်သာစေခြင်း၊ ကင်ဆာရောဂါကို ကာကွယ်ပေးခြင်း၊ ကိုယ်ခံအားစနစ်ကို ကောင်းမွန်စေခြင်း၊ အစာချေစနစ်ကို အားကောင်းစေခြင်း၊ ကိုယ်အလေးချိန် လျှော့ချပေးနိုင်ခြင်း၊ စိတ်ဖိစီးမှုကို လျှော့ချပေးပြီး စိတ်ကျရောဂါကို ကာကွယ်နိုင်ခြင်း စသည့် အကျိုးကျေးဇူးများကို ရှိနိုင်ပါသည်။
နေကြာဆီအထွက်တိုးစေရန် ဆောင်ရွက်ရမည့် အချက်များ
စိုက်ပျိုးရေးလုပ်ငန်းတွင် မျိုး၊ မြေ၊ ရေ၊ နည်းသည် လုပ်ငန်းအောင်မြင်မှုအတွက် အခရာပင် ဖြစ်သည်။ နေကြာသီးနှံကို သီးသန့်၊ သီးထပ်နှင့် သီးညှပ်အဖြစ် စိုက်ပျိုးလေ့ရှိကြပါသည်။ သီးသန့် စိုက်ပျိုးခြင်းသည် နေကြာသီးနှံကို တစ်နှစ်လျှင် တစ်ရာသီသာ စိုက်ပျိုးနိုင်သော ဒေသများတွင် သီးသန့်စိုက်ပျိုးခြင်းဖြစ်သည်။ သီးထပ်စိုက်ပျိုးခြင်းသည် စပါးပြီး သီးထပ်စိုက်ပျိုးခြင်း၊ သက်လျင်၊ သက်လတ်စပါးမျိုးများ ရိတ်သိမ်းအပြီး မြေအစို ဓာတ်မခြောက်မီ ထယ်ထိုးထွန်ယက်၍ စိုက်ပျိုးခြင်းနှင့် စပါးရိတ်သိမ်းပြီး တစ်ပြိုင်နက်ကျင်းတူးစိုက်ပျိုး ခြင်းဖြစ်ပါသည်။ (ထယ်ရေးထွန်ရေး ပြုလုပ်ရန် မလိုဘဲ စိုက်ပျိုးခြင်းဖြစ်ပါသည်။) ယာသီးနှံ (မိုးမြေ ပဲ၊ နှမ်းလျင်၊ သက်လျင် ပဲတီစိမ်း၊ ပြောင်းဖူး) တို့ ရိတ်သိမ်းပြီးနောက် သီးထပ် စိုက်ပျိုးကြခြင်းဖြစ်ပါ သည်။ သီးညှပ်စိုက်ပျိုးခြင်းသည် သီးညှပ်စိုက်ပျိုးမည်ဆိုပါက နေကြာကို ဂျုံ၊ ပဲတီစိမ်း၊ ကြံ၊ ပဲစင်းငုံတို့ တန်းကြားတွင် ညှပ်၍စိုက်ပျိုးလေ့ရှိပါသည်။ ဂျုံ လေးတန်း နေကြာတစ်တန်းတွင် စိုက်ပျိုးနိုင်ပါသည်။ ပဲတီစိမ်းနှင့် သီးညှပ်စိုက်ပျိုးမည်ဆိုပါက ပဲတီစိမ်း လေးတန်း နေကြာတစ်တန်းတွင် စိုက်ပျိုးရပါမည်။ ကြံနှင့် သီးညှပ်စိုက်ပျိုးမည်ဆိုပါက ကြံပင်နှစ်တန်းကြားတွင် နေကြာတစ်တန်း စိုက်ပျိုးရပါမည်။ ပဲစင်းငုံနှင့် သီးညှပ်စိုက်ပျိုးမည်ဆိုပါက ပဲစင်းငုံ နှစ်တန်းကြားတွင် နေကြာတစ်တန်း စိုက်ပျိုးရပါမည်။ သီးညှပ်စိုက်ပျိုးရာတွင် နေကြာကို တစ်ပင်နှင့် တစ်ပင် တစ်ပေအကွာ စိုက်ပျိုးရပါမည်။ သီးထပ်စိုက်ပျိုးခြင်းသာမက ကုလားပဲကဲ့သို့ သီးနှံများနှင့်လည်း နေကြာကိုရော၍ သီးရောအဖြစ်လည်း စိုက်ပျိုးနိုင်ပါသည်။ နေကြာသည် သီးသန့်၊ သီးညှပ်စိုက်နိုင်ပြီး လယ်မြေတွင် စပါးရိတ်သိမ်း အပြီးဖြစ်စေ၊ ယာမြေတွင် မိုးသီးနှံရိတ်သိမ်းအပြီး ဖြစ်စေ၊ ကိုင်းကျွန်းမြေများတွင် လည်းစိုက်ပျိုးနိုင်ပါသည်။ မြန်မာနိုင်ငံ၌ ရေဆင်းစပ် မျိုး-(၁)၊ ဆင်း ရွှေကြာ - (၂) အထွက်ကောင်းမျိုး (OPV) နေကြာမျိုး နှစ်မျိုးကို စိုက်ပျိုးသင့်သည့် နေကြာများအဖြစ် သုတေသနပြု ဖော်ထုတ်ထားရှိပါသည်။
ရေဆင်းစပ်မျိုးနေကြာ - (၁)
ရေဆင်းစပ်မျိုးနေကြာ- (၁) သည် ပြည်တွင်းတွင် မျိုးကူးစပ်မွေးမြူ၍ ပထမဆုံး စီးပွားဖြစ် ထုတ်လုပ်သော စပ်မျိုးနေကြာမျိုးဖြစ်ပြီး သက်တမ်း ရက် ၈၀ မှ ၈၅ ရက်ရှိသော မျိုးဖြစ်သည်။ အပင်ပေါက် ရာခိုင်နှုန်းမြင့်မားပြီး အပင်သန်စွမ်းကောင်း မွန်သည်။ အပင်အမြင့်မှာ ၄ - ၄. ၅ ပေရှိပြီး ယိုင်လဲမှုဒဏ်ကို ခံနိုင်ရည်ရှိသည်။ နေကြာတွင် ကျရောက်တတ်သော နေကြာရွက်ခြောက်ရောဂါ ဒဏ်ကို အသင့်အတင့်ခံနိုင်ရည်ရှိသည်။ အပွင့် အရွယ်အစားကြီးမား၍ အချင်း ၅ - ၉ လက်မ ရှိသည်။ တစ်ပွင့်ပါ အောင်စေ့ ၅၀၀ မှ ၉၀၀ ရှိသည်။ အစေ့အရွယ်အစားကြီးမား၍ အစေ့ ၁၀၀၀ အလေးချိန် ၄၅ ဂရမ်မှ ၅၀ ရှိသည်။ ဆီပါဝင်မှုများ၍ ၄၈ - ၅၁ ရာခိုင်နှုန်းပါဝင်သည်။ တစ်ဧကအထွက် ၅၅ တင်းမှ တင်း ၆၀ ထွက်နိုင်သောမျိုးဖြစ်သည်။
ဆင်းရွှေကြာ - (၂) အထွက်ကောင်းမျိုး (OPV)
ဆင်းရွှေကြာ - (၂) မျိုးသည် စပ်မျိုးမဟုတ်သော အထွက်ကောင်းမျိုးဖြစ်သည်။ သက်တမ်း ၈၀ မှ ၈၅ ရက်ဖြင့် ရိတ်သိမ်းနိုင်သည်။ အပင်အမြင့်မှာ ၄ - ၄.၅ ပေ ရှိသည်။ အပွင့်အချင်း ၅ - ၈ လက်မ ရှိသည်။ အစေ့ ၁၀၀၀ အလေးချိန် ၅၆ ဂရမ် ရှိသည်။ အစေ့ ၁၀၀၀ အလေးချိန် ၄၂ မှ ၄၅ ဂရမ် ရှိသည်။ ဆီထွက်ရာခိုင်နှုန်း ၄၅ - ၄၈ ရာခိုင်နှုန်းရှိသည်။ တစ်ဧကအထွက် ၂၅ တင်းမှ တင်း ၃၀ ထွက်နိုင် သောမျိုးဖြစ်ပြီး ဒေသမရွေး စိုက်ပျိုးဖြစ်ထွန်းကြောင်း သိရပါသည်။ ထူးခြားသည်မှာ ယိုင်လဲမှု ဒဏ်ခံနိုင်ပြီး ရွက်ခြောက်ရောဂါဒဏ် ခံနိုင်ရည်ရှိ ကြောင်း သိရပါသည်။
စိုက်ပျိုးချိန်
အကောင်းဆုံးစိုက်ပျိုးချိန်မှာ စက်တင်ဘာလ နှင့် အောက်တိုဘာလဖြစ်သော်လည်း မြေအစို ဓာတ်လုံလောက်စွာရှိပါက စပါးအပြီးစိုက်ပျိုးရာတွင် နိုဝင်ဘာနှင့် ဒီဇင်ဘာလအထိ စိုက်ပျိုးနိုင်ပါသည်။
မြေအမျိုးအစား
မြေဆီလွှာထက်သန်သည့် သဲနုန်းမြေ အမျိုးအစားမှ မြေစေးမြေအမျိုးအစားအထိ စိုက်ပျိုးနိုင်သည်။ မြေချဉ်ငန်ဓာတ် pH တန်ဖိုး ၆ ဒသမ ၀ မှ ၇ ဒသမ ၅ သည် အသင့်လျော်ဆုံးဖြစ်သည်။ ခြောက်သွေ့သည့် ဒေသတွင် မြေစေးမြေအမျိုးအစားကဲ့သို့ ရေထိန်းထားနိုင်သည့် မြေတွင် စိုက်ပျိုးနိုင်ပါသည်။
မျိုးစေ့နှုန်းထား
တစ်ဧကလျှင် မျိုးစေ့လေးပြည်မှ ငါးပြည် စိုက်ပျိုးနိုင်သည်။ အတန်းအကွာအဝေးမှာ နှစ်ပေနှင့် ပင်ကြားအကွာအဝေး ကိုးလက်မဖြစ်သည်။ တစ်ကျင်းလျှင် မျိုးစေ့ နှစ်စေ့မှ သုံးစေ့နှုန်း စိုက်သင့်သည်။ အပင်သက်တမ်း ၁၅ ရက်သားအတွင်း တစ်ကျင်းလျှင် တစ်ပင်ချန်၍ အပြီးသားခွဲရန်ဖြစ်ပါသည်။
မြေသြဇာကျွေးခြင်း
နေကြာပင်သည်ကြီးမားသော အမြစ်အုံရှိသဖြင့် ရေနှင့် အစာအာဟာရဓာတ်ကို များစွာစားသုံးနိုင်သော အပင်မျိုး ဖြစ်သည်။ အပင်ကြီးထွားဖြစ်ထွန်းရေး၊ အပွင့်အရွယ်အစား ကြီးမားစေရေး၊ အစေ့အဆန် အောင်မြင်စေရေးတို့အတွက် အရေးကြီးသည်မှာ မြေတွင်းမှ အာဟာရပြည့်စုံစွာ ရရှိရေးဖြစ်သည်။ သို့ဖြစ်၍ နေကြာစိုက်ပျိုးရာတွင် သဘာဝမြေသြဇာ နှင့် ဓာတ်မြေသြဇာများကို ထည့်သွင်းပေးရန် လိုပါသည်။ မြေမပြုပြင်မီတစ်ဧကလျှင် နွားချေး၊ ကြက်ချေး သို့မဟုတ် သဘာဝမြေဆွေးများကို လှည်းငါးစီးမှ ၁၀ စီးထည့်ပေးသင့်ပါသည်။ တစ်ဧက လျှင် ယူရီးယားဓာတ်မြေသြဇာ ၁၁၂ ပေါင်၊ တီစူပါ မြေသြဇာ ၅၆ ပေါင်နှင့် ပိုတက်ရှ်ဓာတ်မြေသြဇာ ၅၆ ပေါင်ကို မြေပြုပြင်ချိန်တွင် ထည့်ပေးရပါမည်။ ထို့ပြင် အဖူးဝင်ချိန်တွင် ယူရီးယားဓာတ်မြေသြဇာ တစ်ဧကလျှင် ၅၆ ပေါင်နှုန်းထပ်မံထည့်ပေးရန် လိုအပ်ပါသည်။
အပင်ပြုစုမှု နည်းစနစ်
စိုက်ပျိုးမည့်လယ်ယာမြေကို ထယ်ရေးနက်နက်၊ ထွန်ရေးညက်ညက်ဖြင့် ပြုပြင်ရပါသည်။ အပင်သက်တမ်း ၁၅ ရက်သားအတွင်း တစ်ကျင်း တစ်ပင် ချန်ပြီး အပြီးသားခွဲခြင်း ဆောင်ရွက်ရပါသည်။ အပင်ငယ်စဉ် ပေါင်းမြက်ကင်းစင်အောင် ပြုလုပ်ပေးရပါသည်။ ပိုးနှင့် ရောဂါကျရောက်ပါက သင့်လျော်သည့်ဆေးဖြင့် အချိန်မီ ကာကွယ်ခြင်းကို ဆောင်ရွက်မည်ဖြစ်ပါသည်။ အပင်ယိုင်လဲမှု မဖြစ်စေရန် အဖူးဝင်ချိန်တွင် ပေါင်တင်ခြင်း ပြုလုပ်ရပါသည်။ ရေလိုအပ်ပါကအဖူး ၇၅ ရာခိုင်နှုန်း ဝင်ချိန်နှင့် ပန်း ၇၅ ရာခိုင်နှုန်းပွင့်ချိန်တွင် ရေ တစ်ကြိမ်စီ သွင်းပေးရပါသည်။ အလေအလွင့်နည်း အောင် အချိန်မီ ရိတ်သိမ်းခြင်း၊ စနစ်တကျ မျိုးစေ့ခြွေခြင်း၊ ခြောက်သွေ့အောင် နေလှန်းပေးခြင်းများ ပြုလုပ်ဆောင်ရွက်ရပါသည်။
နိဂုံး
မြန်မာနိုင်ငံ၌ နှမ်း၊ မြေပဲနှင့် နေကြာတို့သည် အဓိက ဆီထွက်သီးနှံများဖြစ်ရာ နေကြာသည် နိုင်ငံတစ်ဝန်းလုံး နေရာမရွေး စိုက်ပျိုးအောင်မြင်နိုင်သည့် သီးနှံဖြစ်ပါသည်။ ယခင်ကတည်းက ပြည်နယ်/ တိုင်းဒေသကြီးများ၌ ဆီထွက်သီးနှံနေကြာ စိုက်ပျိုးကာ ဖြစ်ထွန်းအောင်မြင်ခဲ့ပြီး ဒေသခံ တောင်သူကြီးများ၏ လူမှုစီးပွားဘဝ တိုးတက် မြင့်မားခဲ့သည်ကိုလည်း တွေ့ရှိနိုင်ပါသည်။ ပြည်တွင်းစားသုံးဆီ ဖူလုံရေးနေကြာသီးနှံကို သီးထပ်၊ သီညှပ်စိုက်ပျိုး ထုတ်လုပ်ကြရန် လိုအပ်လျက်ရှိပါသည်။ နိုင်ငံတော်စားရေရိက္ခာ ပေါများရေးသည် အမျိုးသားရေး ပန်းတိုင်တစ်ရပ်ဖြစ်သည့်အတွက် အလေးအနက်ထားကာ ဆီထွက်သီးနှံ နေကြာစိုက်ပျိုး ထုတ်လုပ်မှု တိုးတက်မြင့်မားရေး တစ်နိုင်ငံလုံး အတိုင်းအတာဖြင့် စုပေါင်း၍ ကျယ်ကျယ်ပြန့်ပြန့် ဆောင်ရွက်ကြရမည် ဖြစ်ပါသည်။ ၂၀၂၃ ခုနှစ် ဒုတိယရာသီ ဆီထွက်သီးနှံ စိုက်ပျိုးပြီးချိန်တွင် နိုင်ငံ၏ ဆီဖူလုံမှု အပြည့်အဝရရှိပြီး ပြည်ပမှစားသုံး ဆီတင်သွင်းမှုကို လျှော့ချနိုင် မည်ဖြစ်ပါသည်။ ထို့ပြင် နိုင်ငံတကာ၏ စားသုံးဆီ လိုအပ်ချက်ကို ဖြည့်ဆည်းဆောင်ရွက်ပေးနိုင်လာမည်ဖြစ်သည်။ ပြည်တွင်းစားသုံးဆီ ဖူလုံမှုရှိပြီး ပြည်ပသို့တင်ပို့ ရောင်းချနိုင်သည့်အခါ နိုင်ငံ၏ ကုန်ထုတ်လုပ်မှု မြင့်မားလာပြီး စိုက်ပျိုးထုတ်လုပ်သူ တောင်သူများ၏ ဝင်ငွေတိုးတက်ရရှိလာမည် ဖြစ်ပါသည်။ ကျေးလက်ဒေသနေ ပြည်သူများ၏ လူမှုစီးပွားဘဝ တိုးတက်လာမှသာ တိုင်းပြည်ဖွံ့ဖြိုး တိုးတက်မှု မြန်ဆန်လာမည်ဖြစ်သည့်အတွက် ဆီထွက်သီးနှံ နေကြာအထွက်တိုးရေး ပြည်သူပြည်သား အားလုံး အလေးထား ဝိုင်းဝန်း၍ အမျိုးသားရေးပန်တိုင်တစ်ရပ်အနေဖြင့် ပူးပေါင်းပါဝင်ဆောင်ရွက် နိုင်ကြပါရန် နှိုးဆော်တိုက်တွန်း လိုက်ရပါသည်။ ။
ကိုးကား
www.moali.gov.mm
http://www.myanmarseedportal.gov.mm/mm
https://www.sciencedirect.com/topics/immunology-and-microbi-ology / helianthus - annuus
https://en.wikipedia.org/wiki/Sunflower_oil#Composition
