ဒီးမော့ဆို အောက်တိုဘာ ၉
၂၀၁၈-၂၀၁၉ ဘဏ္ဍာရေးနှစ်အတွင်း ကျေးလက်ဒေသဖွံ့ဖြိုးတိုးတက်ရေးဦးစီးဌာနနှင့် ကမ္ဘာ့ဘဏ်တို့ ပူးပေါင်းဆောင်ရွက်သော လူထုဗဟိုပြုစီမံကိန်း စတုတ္ထနှစ်စက်ဝန်းတွင် အကောင်အထည်ဖော် ဆောင်ရွက်ပြီးစီးခဲ့သော ပညာရေးဆိုင်ရာလုပ်ငန်းများအား လွှဲပြောင်းပေးအပ်ခြင်းနှင့် ကျေးရွာဖွံ့ဖြိုးရေးစီမံကိန်း(VDP) အတွက် ကျေးရွာ လေးရွာ ရွေးချယ်နိုင်ရေး ညှိနှိုင်းဆွေးနွေးခြင်းကို ယနေ့ နံနက် ၁၀ နာရီက ကယားပြည်နယ် ဒီးမော့ဆိုမြို့နယ် အထွေထွေအုပ်ချုပ်ရေးဦးစီးဌာနရုံး အစည်းအဝေးခန်းမ၌ ကျင်းပသည်။
လွှဲပြောင်းပေးအပ်ပွဲတွင် မြို့နယ်အုပ်ချုပ်ရေးမှူး ဦးဉာဏ်လှိုင် က အမှာစကား ပြောကြားပြီး မြို့နယ် ကျေးလက်ဒေသဖွံ့ဖြိုးတိုးတက်ရေးဦးစီးဌာန လူထုဗဟိုပြုစီမံကိန်း တာဝန်ခံ ဦးဆော်ရယ် က ၂၀၁၈-၂၀၁၉ ဘဏ္ဍာရေးနှစ်အတွင်း လူထုဗဟိုပြုစီမံကိန်းမှ ဒီးမော့ဆိုမြို့နယ်တွင် ကျေးရွာပေါင်း ၁၁၆ ရွာ၊ လုပ်ငန်းပေါင်း ၁၂၅ ခု အကောင်အထည်ဖော် ဆောင်ရွက်လျက်ရှိရာ ကျေးရွာ ၂၀ တွင် ပညာရေးနှင့် သက်ဆိုင်သော လုပ်ငန်း ၂၂ ခု ပါဝင်သည့်အတွက် ယခုလို သက်ဆိုင်ရာပညာရေးဌာနသို့ ပြန်လည်လွှဲပြောင်း ပေးအပ်ခြင်းဖြစ်ကြောင်း ပြောကြားသည်။
ထို့နောက် မြို့နယ်လူထုဗဟိုပြုစီမံကိန်း တာဝန်ခံ ဦးဆော်ရယ်က စီမံကိန်းမှ အကောင်အထည်ဖော် ဆောင်ရွက်ပြီးစီးခဲ့သော ပညာရေးနှင့် သက်ဆိုင်သော လုပ်ငန်း အချက်အလက်များအား မြို့နယ်ပညာရေးမှူး ရုံးမှတာဝန်ရှိသူတစ်ဦးထံ လွှဲပြောင်း ပေးအပ်သည်။
ဆက်လက်၍ မြို့နယ်ကျေးလက်ဒေသဖွံ့ဖြိုးတိုးတက်ရေးဦးစီးဌာန ဦးစီးမှူး ဦးမျိုးနိုင် က မြို့နယ် အတွင်း တစ်ရွာလျှင် ငွေကျပ် ၁၀ဝ သိန်းဖြင့် ကျေးရွာဖွံ့ဖြိုးရေးစီမံကိန်း(VDP) ကျေးရွာ လေးရွာ ရွေးချယ် ဆောင်ရွက်နိုင်ရေးနှင့် ၂၀၁၉-၂၀၂၀ ဘဏ္ဍာရေးနှစ်အတွင်း ဌာနမှ ဆောင်ရွက်မည့် လုပ်ငန်းများအား ရှင်းလင်း ပြောကြားပြီး တက်ရောက်လာကြသော အမျိုးသား လွှတ်တော်ကိုယ်စားလှယ် ဦးစောစိန်ထွန်းနှင့် တာဝန်ရှိသူများက ကျေးရွာဖွံ့ဖြိုးရေး စီမံကိန်း(VDP)အတွက် ကျေးရွာလေးရွာ ရွေးချယ်ဆောင်ရွက်နိုင်ရေး ဆွေးနွေးကြကြောင်း သိရသည်။
ရီရယ်(ဒီးမော့ဆို)
