မင်းခေါင်

ဒီနှစ်ဝါဆိုမှာ အောက်ပြည် အောက်ရွာအဖို့ မိုးကောင်းနေတယ်လို့ပဲ ဆိုရပါမယ်။ မိုးမရွာတဲ့ရက်က ခပ်နည်းနည်းရယ်။ တစ်ခါတစ်ရံ မိုးကတဖွဲဖွဲ၊ တစ်ခါတလေ မိုးက သဲသဲမဲမဲ။ တစ်လောကလုံးကလည်း ညှို့မှိုင်းအုံ့ဆိုင်းနေပြန်တော့ ဒီလရာသီကို ရှေးစာဆိုများက “ဂနိုင်စိုစို၊ လဝါဆို၊ လွမ်းဖွယ့်ရာသီကို”ရယ်လို့ တင်စား စပ်ဆိုခဲ့ကြပါတယ်။

လွန်ခဲ့တဲ့ ၇၅ နှစ်က ဒီလ ဒီရာသီမှာပဲ အမျိုးသားခေါင်းဆောင်ကြီး ဗိုလ်ချုပ်အောင်ဆန်း အမှူးပြုတဲ့ အာဇာနည်ခေါင်းဆောင်ကြီးများ ကျဆုံးခဲ့ပြန်တော့ ဝါဆိုလ(ဇူလိုင်)ဟာ မြန်မာ ပြည်သူတို့အဖို့ အမှန်တကယ် လွမ်းဖွယ့်ကောင်းတဲ့လတစ်လလည်း ဖြစ်ခဲ့ပါတယ်။

ဂျပန်နိုင်ငံဝန်ကြီးချုပ်ဟောင်း ရှင်ဇိုအာဘေး

တိုက်တိုက်ဆိုင်ဆိုင် ပြီးခဲ့တဲ့ ဝါဆိုလဆန်း ၁၁ ရက်(ဇူလိုင် ၈ ရက်)နံနက်မှာ ဂျပန်နိုင်ငံဝန်ကြီးချုပ်ဟောင်း ရှင်ဇိုအာဘေးဟာ နာရာမြို့မှာကျင်းပတဲ့ နိုင်ငံ ရေးအခမ်းအနားတစ်ခုမှာ တက်ရောက်မိန့်ခွန်းပြောကြားနေစဉ် မသမာသူတစ်ဦးရဲ့ လက်လုပ်သေနတ်နဲ့ အနီးကပ်လုပ်ကြံပစ်ခတ်မှုကြောင့် ညနေပိုင်းမှာ ကွယ်လွန်အနိစ္စရောက်ခဲ့ရပြန်ပါတယ်။

ကမ္ဘာမှာ လုံခြုံမှုအရှိဆုံးနိုင်ငံများအနက် တစ်နိုင်ငံဖြစ်ရုံမက သေနတ်ကိုင်ဆောင်မှုကို တင်းတင်းကျပ်ကျပ် ထိန်းချုပ်ထားတဲ့ ဂျပန်နိုင်ငံမှာ အခုလို ဝန်ကြီးချုပ်ဟောင်း ရှင်ဇိုအာဘေး လုပ်ကြံခံရလို့ ကွယ်လွန်သွားတဲ့သတင်းက တစ်ကမ္ဘာလုံးကို တုန်လှုပ်သွားစေခဲ့ပါတယ်။ ဂျပန်ဝန်ကြီးချုပ် ဖူမီယိုကီရှီဒါကတော့ “ခွင့်လွှတ်လို့မရတဲ့ ကြမ်းကြုတ်မှုတစ်ခု”လို့ ဆိုပါတယ်။

ရှင်ဇိုအာဘေးကို လုပ်ကြံသူက နာရာမြို့ခံတစ်ဦးဖြစ်တဲ့ အသက် (၄၁) နှစ် ဝန်းကျင်ရှိ တက်ဆုယာယာမာဂါမီ ဆိုသူဖြစ်ပြီး နိုင်ငံရေးရပ်တည်ချက်ကြောင့် မဟုတ်ဘဲ မိသားစုစီးပွားရေးပြဿနာ အပေါ်အခြေခံပြီး ပေါ်ပေါက်လာတဲ့ မုန်းတီးမှုကြောင့် လုပ်ကြံသတ်ဖြတ်ဖို့ ဆုံးဖြတ်ခဲ့တာဖြစ်တယ်လို့ဆိုပါတယ်။

လူမည်းခေါင်းဆောင်တစ်ဦး

ဒေါက်တာမာတင်လူသာကင်းကို အမှတ်ရစရာပါ။ မုန်းတီးမှုကြောင့် လုပ်ကြံသတ်ဖြတ်ခြင်း ခံလိုက်ရရှာတဲ့ သားကောင်တွေထဲမှာ ဒေါက်တာမာတင် လူသာကင်းတစ်ယောက်လည်း ပါဝင် ခဲ့ပါတယ်။ ဒေါက်တာမာတင်လူသာကင်းဟာ လူဖြူလူမည်း မခွဲခြားရေး၊ နိုင်ငံသားတို့အခွင့်အရေးညီမျှရေးနဲ့ လူတိုင်းတန်းတူရည်တူအခွင့်အလမ်း ရရှိရေးအတွက် ရှေ့ဆောင်ရှေ့ရွက်ပြုခဲ့သူ လူမည်းခေါင်းဆောင်တစ်ဦးဖြစ်ပါတယ်။

သူဟာ လူဖြူ လူမည်းမခွဲခြားရေးအတွက် အမေရိကန်ပြည်ထောင်စုတစ်ခွင် လှည့်လည်ဟောပြောစည်းရုံးခဲ့သူဖြစ်တဲ့အတွက် လူမည်းတို့အတွက် အားကိုးအားထားပြုစရာ ခေါင်းဆောင်တစ်ဦးဖြစ်ခဲ့ပေမယ့် အစွန်းရောက် လူဖြူအချို့အတွက်ကတော့ ဒေါက်တာ မာတင်လူသာကင်းဟာ မုန်းတီးစရာ လူတစ်ဦးဖြစ်နေခဲ့ပါတယ်။

အဲဒီအမုန်းတရားကြောင့်ပဲ မာတင်လူသာကင်းဟာ ၁၉၆၆ ခုနှစ် ဧပြီလ ၄ ရက်နေ့မှာ တင်နက်ဆီပြည်နယ် မင်းဖစ္စမြို့မှာကျင်းပတဲ့ ကျန်းမာရေးဌာန လုပ်သားတွေရဲ့သပိတ်ကို ထောက်ခံ ချီတက်ဆန္ဒပြပွဲကို စည်းရုံးဟောပြောဖို့လာရင်း သူခေတ္တတည်းခိုရာ ဟိုတယ် တစ်ခုမှာနားနေစဉ် မျက်နှာချင်းဆိုင် တည်းခိုရိပ်သာကနေ အစွန်းရောက် သမားတစ်ဦးရဲ့ အဝေးကြည့်တယ်လီ စကုတ်ပါ ရိုင်ဖယ်သေနတ်နဲ့ လုပ်ကြံပစ်ခတ်မှုကြောင့် သေဆုံးခဲ့ရရှာပါတယ်။

ဒေါက်တာမာတင်လူသာကင်းကို လုပ်ကြံသတ်ဖြတ်သူကတော့ အသက် (၃၈) နှစ်အရွယ်ရှိ ဂျိမ်းစ်အားလ်ရေးဆိုသူ လူဖြူတစ်ဦးဖြစ်ပါတယ်။ ရေးရဲ့အဆိုအရကတော့ သူဟာ မွေးလာကတည်းက လူမည်းတွေကို မုန်းတီးတယ်လို့ဆိုတယ်။ ဒီကြားထဲမှာ သူ့မိဘတွေရဲ့ မြေနဲ့အိမ်ကို လူမည်းမိသားစုက ဝယ်ယူသွားတဲ့အခါ သူ့ရဲ့လူမည်းမုန်းတီးစိတ်က ပိုပြီး ကြီးမားပြင်းထန်လာခဲ့တယ်လို့ သိရတယ်။

ကမ္ဘာ့သမိုင်းဝင်လုပ်ကြံမှုကြီးတွေကို လေ့လာကြည့်ရင် နိုင်ငံ့ခေါင်းဆောင် အချို့နဲ့ ထင်ရှားကျော်ကြားသူအချို့ဟာ တစ်ခါတစ်ရံ အကြောင်းပြချက် မည်မည်ရရပြစရာမရှိဘဲ လုပ်ကြံသတ်ဖြတ်ခြင်း ခံလိုက်ရတဲ့ဖြစ်စဉ်တွေလည်းရှိခဲ့တယ်။

 ရော့ခ်အဆိုတော် ဂျွန်လင်နွန်

ကမ္ဘာကျော် ရော့ခ်အဆိုတော် ဂျွန်လင်နွန်ဆိုရင် ၁၉၈၀ ပြည့်နှစ် ဒီဇင်ဘာလ ၈ ရက် ညပိုင်းမှာ အထီးကျန်သမား သူရူးတစ်ယောက်ကအကြောင်း တစ်စုံတစ်ရာ မရှိပါဘဲလျက် သေနတ်နဲ့ ပစ်သတ်ခြင်းကို ခံခဲ့ရရှာတယ်။ သူ့ကို ချစ်ခင်လေးစားကြတဲ့ တစ်ကမ္ဘာလုံးက သန်းပေါင်းများစွာသော လူအများဟာ မယုံကြည်နိုင်အောင် ဖြစ်သွားခဲ့ကြတယ်။ အမေရိကန်ပြည်သူတွေကတော့ လင်နွန်သေဆုံးရခြင်းအပေါ် အကြီးအကျယ် ဝမ်းနည်းကြေကွဲခဲ့ကြရုံမက ထင်ရှားတဲ့ပုဂ္ဂိုလ်တစ်ဦးကို လုပ်ကြံသတ်ဖြတ်ခြင်းဟာ တစ်နိုင်ငံလုံး၊ တစ်မျိုးသားလုံးရဲ့ ဂုဏ်သိက္ခာကိုကင်းမဲ့ စေတာမဟုတ်၊ လူမျိုးတစ်မျိုးလုံးကို အရှက်ရစေတဲ့လုပ်ရပ်၊ စိတ်ထိခိုက်စရာကောင်းလှတဲ့ လုပ်ရပ်လို့လည်း မြင်ခဲ့ကြတယ်။

ဂျွန်လင်နွန်ကို သေနတ်ပစ်ခတ် သတ်ဖြတ်ခဲ့သူကတော့ ဂျော်ဂျီယာ ပြည်နယ်သား အသက် (၂၅) နှစ်အရွယ် မတ်စ်ချက်မင်းဆိုသူဖြစ်တယ်။ သူ့ကို တရားရုံးမှာစစ်ဆေးတဲ့အခါ လင်နွန်ကို သူဘာကြောင့်သတ်သလဲ၊ ဘာတွေကို မကျေနပ်လို့လဲဆိုတဲ့ သဲလွန်စအထောက် အထားနဲ့ပတ်သက်ပြီး နည်းနည်းမျှ ဖော်ပြခြင်းမပြုခဲ့ဘူး။ ဒါ့အပြင် သူ့လုပ်ရပ်အတွက် ဝမ်းနည်းကြေကွဲခြင်း၊ နောင်တရခြင်းတို့ကိုလည်း မဖော်ပြခဲ့ဘူး။

အမေရိကန်ပြည်ထောင်စုရဲ့  ၃၅ ဦးမြောက်သမ္မတ

ဂျွန်လင်နွန်နည်းတူ ၁၉၆၃ ခုနှစ် နိုဝင်ဘာလ ၂၂ ရက်က အမေရိကန် ပြည်ထောင်စု တက္ကဆက်ပြည်နယ် ဒါးလက်စ်မြို့မှာ သေနတ်နဲ့ ချောင်းမြောင်းလုပ်ကြံ သတ်ဖြတ်ခြင်းခံခဲ့ရရှာတဲ့ အမေရိကန်ပြည်ထောင်စုရဲ့ ၃၅ ဦး မြောက်သမ္မတ ဂျွန်အက်ဖ်ကနေဒီ လုပ်ကြံမှုကြီးဟာလည်း “ဂျွန်အက်ဖ်ကနေဒီကို ဘယ်သူသတ်သလဲ၊ ဘာကြောင့်သတ်တာလဲ”ဆိုတဲ့ မေးခွန်းအတွက် အဖြေမရခဲ့ပါဘူး။

သံသယတရားခံ လီးဟာဗေးအော့စ်ဝဲလ်ကို အချုပ်ကနေ ဒါးလက်စ်ကောင်တီခရိုင် ထောင်လွှဲပြောင်းစဉ်မှာပဲ ဂျက်ရူဘီက ခြောက်လုံးပြူးသေနတ်နဲ့ အနီးကပ် ပစ်ခတ်သတ်ဖြတ်လိုက်တဲ့အတွက် လုပ်ကြံမှုဖြစ်စဉ်ဟာ ပိုပြီးရှုပ်ထွေးသွားခဲ့ပါတယ်။ ဂျက်ရူဘီကတော့ “ကျွန်တော်ဂျက်ကီအတွက် လက်စားချေတာ”လို့ ဆိုခဲ့ပေမယ့် အော့စ်ဝဲလ်ကို သတ်သူ ဂျက်ရူဘီဆိုတာ ဘယ်သူလဲ၊ ဘာရည်ရွယ်ချက်နဲ့သတ်တာလဲ၊ ကနေဒီလုပ်ကြံမှုဟာ အဖွဲ့နဲ့ လျှို့ဝှက်လုပ်ကြံခြင်းလား၊ လုပ်ကြံမှုရဲ့ နောက်ကွယ်မှာ မာဖီးယားဂိုဏ်းရှိနေသလား၊ ကျူးဘားလူမျိုးတွေများ ပါနေသလား၊ နောက်ကွယ်မှာ စီအိုင်အေကော မပါပေဘူးလား စသဖြင့် ယခုတိုင် မေးခွန်းပေါင်းများစွာရှိနေဆဲပါ။

အိန္ဒိယရဲ့ဝိညာဉ်

အိန္ဒိယစာရေးဆရာတွေက “အိန္ဒိယရဲ့ဝိညာဉ်”လို့ တင်စားခေါ်ဝေါ်ရေးသားခဲ့တဲ့ မဟတ္တမဂန္ဓီနဲ့ဝန်ကြီးချုပ် အင်ဒီရာဂန္ဒီတို့ကတော့ လူမျိုးရေး၊ ဘာသာရေး အစွဲအလမ်းတွေကို အခြေခံတဲ့လုပ်ကြံမှုတွေကြောင့် အသက်ပေးခဲ့ရရှာပါတယ်။

အကြမ်းမဖက်ရေး အဟိံသဝါဒကို လက်ခံထားတဲ့ ဂန္ဓီကြီးဟာ ၁၉၄၈ ခုနှစ် နှစ်ဦးမှာ နိုင်ငံသားအချင်းချင်းကြား ဖြစ်ပွားလာတဲ့ ပဋိပက္ခတွေနဲ့အကြမ်းဖက်မှုတွေ ရပ်ဆိုင်းသွားစေရေးအတွက် အစာငတ်ခံပြီးကြိုးပမ်းခဲ့ရာမှာ ဘာသာရေးအစွန်းရောက် စစ်သွေးကြွ ဟိန္ဒူအချို့ရဲ့ ဆန့်ကျင်မုန်းတီးမှုတွေကို ခံခဲ့ရပါတယ်။

၁၉၄၈ ခုနှစ် ဇန်နဝါရီလ ၃၀ ရက်နေ့ ညနေမှာတော့ ဂန္ဓီကြီးဟာ သူ့တူမလေးတစ်ဦးနဲ့ ဘုရားဝတ်ပြုဖို့ အသွားမှာ ဆီးကြိုနေတဲ့လူအုပ်ကြားထဲက နာသူရမ်ဗွီရုဆီးဆိုသူ အစွန်းရောက် ဟိန္ဒူလူရွယ်တစ်ဦးရဲ့ ပစ္စတိုနဲ့သုံးချက် အနီးကပ်ပစ်ခတ်လုပ်ကြံ သတ်ဖြတ်ခြင်းကို ခံခဲ့ရရှာပါတယ်။

နောက်ပိုင်းမှာ သက်ဆိုင်ရာက ဂန္ဓီကြီးကိုလုပ်ကြံမှုဟာ သူတစ်ဦးတည်း မဟုတ်ဘဲ ဟိန္ဒူအစွန်းရောက်အဖွဲ့ရဲ့ လျှို့ဝှက်ကြံစည်မှုဖြစ်ကြောင်း ဖော်ထုတ်လာနိုင်ခဲ့ပါတယ်။ အစွန်းရောက် စစ်သွေးကြွ ဟိန္ဒူအုပ်စုဝင်တွေက ဂန္ဓီကြီးဟာ သူတို့ရဲ့ဘာသာအယူဝါဒနဲ့ ယုံကြည်မှုတွေကို ဆန့်ကျင်နေပြီလို့ စွပ်စွဲခဲ့ကြရုံမက သူတို့ရဲ့အကြမ်းဖက်ဝါဒဟာလည်း ဂန္ဓီကြီးရှိနေသမျှကာလပတ်လုံး ကျင့်သုံးလို့ရနိုင်မှာမဟုတ်ဘူးလို့ ယုံကြည်လာတဲ့အတွက် သူတို့ရင်ဆိုင်နေရတဲ့ ပြဿနာရဲ့အဖြေဟာ ဂန္ဓီကြီးကိုသုတ်သင်ရှင်းလင်း ပစ်မှဖြစ်မယ်လို့ တွေးခေါ်လာကြပြီး လုပ်ကြံခဲ့ခြင်းဖြစ်ပါတယ်။ 

 အိန္ဒိယရဲ့ရတနာ

အိန္ဒိယစာရေးဆရာတွေက “အိန္ဒိယရဲ့ရတနာ”လို့ တင်စားခေါ်ဝေါ်ရေးသားခဲ့တဲ့ အိန္ဒိယနိုင်ငံရဲ့ ပထမဆုံးသော ဝန်ကြီးချုပ် ဂျဝါဟလာနေရူးရဲ့ သမီးဖြစ်သူ ဝန်ကြီးချုပ် အင်ဒီရာဂန္ဒီကတော့ ဘာသာရေးအရ အငြင်းပွားမှုတွေဖြစ်ပေါ်နေတဲ့ ရွှေကျောင်းတော်ကြီးကို ခံတပ်သဖွယ် စီးနင်းသိမ်းပိုက်ထားတဲ့ ဆစ်ခ်အစွန်းရောက်စစ်သွေးကြွတွေကို စစ်ရေးအရ အရေးယူဆောင်ရွက်ခဲ့မှုအပေါ် မကျေနပ်တဲ့ ဆစ်ခ်လူမျိုးအစွန်းရောက် သက်တော်စောင့်တို့ရဲ့ လက်စားချေ လုပ်ကြံမှုကြောင့် အသက်ပေးခဲ့ရခြင်းဖြစ်ပါတယ်။

ရွှေကျောင်းတော်ကြီးကို စစ်ရေးအရ ဝင်ရောက်တိုက်ခိုက်သိမ်းပိုက်တဲ့ ကိစ္စနဲ့ပတ်သက်ပြီး ဆစ်ခ်လူမျိုးဘာသာရေး အစွန်းရောက်တွေရဲ့ မကျေနပ်မှုနဲ့ လက်စားချေမယ့် အကြံအစည်တို့ကို ရိပ်မိကြတဲ့တာဝန်ရှိသူတွေနဲ့ အစိုးရအဖွဲ့က အင်ဒီရာဂန္ဒီရဲ့ ကိုယ်ရံတော် တပ်ဖွဲ့က ဆစ်ခ်လူမျိုးတွေကိုဖြစ်နိုင်ရင် အားလုံးကိုဖယ်ရှား လူစားထိုးလဲလှယ်ဖို့ အကြံပြုခဲ့ကြပေမယ့် အင်ဒီရာဂန္ဒီက လုံးဝလက်မခံဘဲ ပယ်ချခဲ့ပါတယ်။

အင်ဒီရာဟာ မိမိရဲ့အသက် အန္တရာယ်အပေါ် ခြိမ်းခြောက်မှုတွေ တစ်နေ့တခြား ပိုပြီးကြီးမားလာတာကို သူကိုယ်တိုင်လည်း မသိတာမဟုတ်ပါဘူး သိပါတယ်။ လုပ်ကြံခံရမှုမဖြစ်ခင် တစ်ရက်အလို ၁၉၈၄ ခုနှစ် အောက်တို ဘာလ ၃၀ ရက်နေ့မှာ အင်ဒီရာက “ဒီနေ့တော့ ကျွန်မအသက်ရှင်နေတုန်းပဲ။ မနက်ဖြန်ကျရင်တော့ ဒီနေရာမှာ ကျွန်မ ရှိချင်မှရှိမယ်။ ဒါပေမဲ့ ကျွန်မရဲ့ခန္ဓာကိုယ်ထဲက သွေးတစ်စက်ချင်းစီဟာ အိန္ဒိယတစ်နိုင်ငံလုံးအပေါ် ကျနေမှာပါ” လို့ ပြောခဲ့ပါတယ်။

နောက်တစ်နေ့ အောက်တိုဘာ ၃၁ ရက်မှာတော့ အင်ဒီရာဂန္ဒီဟာ သူ့နေအိမ်ကနေ ရုံးခန်းဆီသို့သွားရာ လူသွားလမ်းလေးပေါ်အတိုင်း လျှောက်လာစဉ်မှာ မလှမ်းမကမ်းသစ်ပင်ရိပ်အောက် မှာလုံခြုံရေးအစောင့်တာဝန်ယူထားသူ ဘီယန်ဆင်းနဲ့ ဆတ်တဝမ့်ဆင်းတို့ နှစ်ဦးက သေနတ်နဲ့ အနီးကပ်ပစ်ခတ် လုပ်ကြံမှုကြောင့် အသက်ဆုံးရှုံးခဲ့ရရှာပါတယ်။

နိုင်ငံရေးအရ လုပ်ကြံသတ်ဖြတ်မှုတွေက အများစုဖြစ်

သို့သော်လည်း ကမ္ဘာ့သမိုင်းဝင် လုပ်ကြံမှုကြီးတွေကို လေ့လာကြည့်ရင်း နိုင်ငံရေးအရ လုပ်ကြံသတ်ဖြတ်မှုတွေက အများစုဖြစ်ကြောင်း တွေ့မြင်ရပါလိမ့်မယ်။ မြန်မာပြည်မှာ လွန်ခဲ့တဲ့ ၇၅ နှစ်က လုပ်ကြံခံခဲ့ရတဲ့ အမျိုးသားခေါင်းဆောင်ကြီး ဗိုလ်ချုပ်အောင်ဆန်းနဲ့ အာဇာနည် ခေါင်းဆောင်ကြီးတွေရဲ့ ကျဆုံးမှုဖြစ်စဉ်ဟာလည်း နိုင်ငံရေးအရ လုပ်ကြံသတ်ဖြတ်ခံရခြင်းပဲ ဖြစ်ပါတယ်။

အာဇာနည်ခေါင်းဆောင်ကြီးတွေကို လုပ်ကြံမှုဖြစ်စဉ်နဲ့ပတ်သက်ပြီး ဦးဆောင်သူ ဂဠုန်ဦးစောနဲ့အပေါင်းပါတွေကိုလုပ်ကြံသူ တရားခံများအဖြစ်၊ နိုင်ငံတော်လုပ်ကြံမှုကြီး မဖြစ်ပွားမီ ဗြိတိသျှစစ်တပ်က လက်နက်တွေကို ခိုးထုတ်ဖြန့်ဖြူးပေးခဲ့သူ ဗြိတိသျှ စစ်ဗိုလ်တွေဖြစ်ကြတဲ့ မေဂျာယန်းနဲ့ ကပ္ပတိန်ဗီဗြင်တို့ရဲ့ နောက်ကွယ်က ပါဝင်ပတ်သက်မှုတွေသာ လူသိများခဲ့ပေမယ့် အဲဒီအချိန်က တကယ့်အရေးကြီး တဲ့ပုဂ္ဂိုလ်တစ်ဦးကတော့ မြန်မာပြည်ကနေ စုံးစုံးမြုပ်ပျောက်ကွယ်သွားခဲ့တယ်လို့ သမိုင်းမှတ်တမ်းတွေအရ သိရပါတယ်။

ထိုပုဂ္ဂိုလ်ကတော့ ဗြိတိသျှကောင်စီ ကိုယ်စားလှယ်ဖြစ်သူ မစ္စတာဘင်ဂလေ ဆိုသူဖြစ်ပြီး သူဟာ ဂဠုန်ဦးစောတို့ အဖမ်းခံရပြီးနောက် ၄၈ နာရီအချိန်အတွင်း မြန်မာနိုင်ငံမှ ဗြိတိန်နိုင်ငံသို့ တစ်ချိုးတည်းလစ်ထွက်သွားခဲ့တယ်လို့ဆိုပါတယ်။

ဝမ်းနည်းကြေကွဲမဆုံး ရှိနေကြဆဲ

အာဇာနည်ခေါင်းဆောင်ကြီးတွေလုပ်ကြံခံခဲ့ရတာ ယခုနှစ်ဆို ၇၅ နှစ်ပြည့်ခဲ့ပြီ။ အချိန်ကာလအရ ကြာညောင်းခဲ့ပြီထင်ရပေမယ့် မြန်မာပြည်သူတွေအဖို့ကတော့ ယခုလို “ဂနိုင်စိုစို၊ လဝါဆို၊ လွမ်းဖွယ့်ရာသီကို” ရောက်တိုင်းသတိတရ ဝမ်းနည်းကြေကွဲမဆုံး ရှိနေကြဆဲပါပဲ။ 

ဒီနှစ် ၂၀၂၂ ခုနှစ် (၇၅)နှစ်မြောက် အာဇာနည်နေ့ အခါသမယမှာတော့ အမျိုးသားခေါင်းဆောင်ကြီး ဗိုလ်ချုပ်အောင်ဆန်းအမှူးပြုတဲ့ အာဇာနည် ခေါင်းဆောင်ကြီးတွေအပြင် မနေ့တစ်နေ့က မသမာသူတစ်ဦးရဲ့လုပ်ကြံမှုကြောင့် ကွယ်လွန်အနိစ္စရောက်သွားရှာတဲ့ ဂျပန်ဝန်ကြီးချုပ်ဟောင်း ရှင်ဇိုအာဘေးအပါအဝင် လုပ်ကြံမှုတွေကြောင့် အသက်ဆုံးရှုံးခဲ့ကြရတဲ့ လင်ကွန်း၊ ဂျွန်အက်ဖ်ကနေဒီ၊ ရောဘတ် ကနေဒီ၊ မဟတ္တမဂန္ဓီ၊ အင်ဒီရာဂန္ဒီ၊ ရာဂျစ်ဂန္ဒီ၊ အီတလီဝန်ကြီးချုပ်ဟောင်း ခရစ်ယာန် ဒီမိုကရက်တစ်ပါတီ ခေါင်းဆောင် အယ်လ်ဒိုမိုရို စတဲ့နိုင်ငံ့ ခေါင်းဆောင်တွေကို နှမြောတသ သတိတရဖြစ်ရတယ်။

တကယ်တော့ နိုင်ငံရေးကို အကြောင်းပြုပြီး လုပ်ကြံသတ်ဖြတ်တဲ့ လုပ်နည်းလုပ်ဟန်တွေဟာ လွန်ခဲ့တဲ့ နှစ်ပေါင်း နှစ်ထောင် ရှေးရောမ၊ ခေါမ ခေတ်ကတည်းက အခြေတည်လာခဲ့ခြင်း ပဲဖြစ်ပါတယ်။ သို့ပေမယ့်လည်း ရာစုတွေအလီလီပြောင်းပြီး ယနေ့ခေတ်ယဉ်ကျေးတဲ့ လူ့ဘောင်အသိုင်းအဝိုင်း ရောက်သည့်တိုင် မသမာသူတွေ၊ အစွန်းရောက်သမားတွေက ဆက်လက် အသုံးပြုနေကြဆဲပါ။ ဒါကို အသိဉာဏ်တိုးတက် မြင့်မားလာပြီဖြစ်တဲ့ ယဉ်ကျေးတဲ့လူ့ဘောင် အသိုက်အဝန်းတစ်ရပ်လုံးက အတိတ်သမိုင်းသင်ခန်း စာတွေအရ ဆန့်ကျင်တားဆီး ကာကွယ်သွားကြရမှာဖြစ်ပါတယ်။ ။ 

ကိုးကား-မောင်ထွန်းသူ၏ နိုင်ငံတကာ လုပ်ကြံမှုကြီးများ။