တောင်တွင်းကြီး ၂၁ မေ
မကွေးတိုင်းဒေသကြီး တောင်တွင်းကြီးမြို့နယ် ချောင်းနက်ကျေးရွာ ကွင်းအမှတ်(၂၇၂၉) ချောင်းနက်အရှေ့ကွင်းရှိ လယ်ဧက (၁၅၀)အား အကျိုးပြုမည့် မလိုမြောင်းအား စက်ယန္တရားများ အသုံးပြု၍ မေ ၁၆ ရက်မှစတင်ကာ ကိုယ်ထူကိုယ်ထ တူးဖော်လျက်ရှိကြောင်း သိရသည်။
"အခုတူးဖော်နေတဲ့ မလိုမြောင်းက အရှည်ပေ ၇၀ဝ၀ ကျော်၊ အကျယ် ၆ ပေ၊ အနက် ၃ ပေ ရှိပါတယ်၊ ရေမြောင်းတူးဖော်ပြီးရင် တောင်သူ ၆၅ ဦးရဲ့ လယ်ဧက ၁၅၀ ကို အကျိုးပြုမှာပါ။ မြောင်းရေသောက်ရတဲ့ တောင်သူတွေအနေနဲ့ စိုက်ပျိုးမြေများ အောင်ရေရမယ်။ မိုးသီးနှံဖြစ်တဲ့ နှမ်းတို့၊ ပြောင်းတို့လည်း ရေနစ်တဲ့ဘေးက လွတ်ကင်းမှာ ဖြစ်ပါတယ်"ဟု ကျေးရွာအုပ်ချုပ်ရေးမှူး ဦးအုန်းကြိုင်က ပြောသည်။
အဆိုပါရေမြောင်း တိမ်ကောနေခြင်းကြောင့် ရေလျှံမှုများ ဖြစ်ပေါ်နေပြီး မိုးသီးနှံမှာ နှစ်စဉ် နှစ်တိုင်း ဧက ၁၅၀ ခန့် ပျက်ဆီးဆုံးရှုံးနေသည့်အတွက် တောင်သူများစုပေါင်းပြီး တစ်ဧကလျှင် တစ်သောင်းနှုန်းကောက်ခံကာ ကိုယ်ထူကိုယ်ထ တူးဖော်နေခြင်းဖြစ်ကြောင်း သိရသည်။
အေးမိုးမိုးမြင့်(ပြန်/ဆက်)
