မြစ်ကြီးနား  ၁၀  ဖေဖော်ဝါရီ

ကချင်ပြည်နယ် မြစ်ကြီးနားမြို့၌ ပထမဆုံးအကြိမ်အဖြစ် "ဆောင်းနှောင်း" အမည်ဖြင့် ပန်းချီပြပွဲကို ဖေဖော်ဝါရီ ၅ ရက်မှ ၁၂ ရက်နေ့အထိ စီတာပူရပ်ကွက်၊ နောင်ရာ လမ်းသွယ်(၁)ရှိ Bungshi Art Gallery တွင် ကျင်းပလျက်ရှိကြောင်း သိရသည်။

 ပန်းချီပြပွဲကျင်းပရခြင်းနှင့် ပတ်သက်၍ ပြပွဲစီစဉ်သူ ပန်းချီဆရာ ဦးအင်ခွန်ဘရမ်က " ပန်းချီပြပွဲတွေကို မြန်မာပြည်အောက်ပိုင်းမှာ မကြာခဏကျင်းပပြုလုပ်လေ့ရှိပေမယ့် မြစ်ကြီးနားမှာတော့ ဒီပြပွဲဟာ ပထမဆုံးအကြိမ်ပါ၊ ကချင်ပြည်နယ်အတွင်းမှာရှိတဲ့ပြည်သူတွေ ပန်းချီရဲ့အနှစ်သာရတွေကို သိရှိခံစား နိုင်ဖို့ ပန်းချီပညာရဲ့ ဗဟုသုတတွေ ရရှိစေဖို့ ရည်ရွယ်ပြီးဖွင့်လှစ်ရတာပါ " ဟု ပြောသည်။

 အဆိုပါပန်းချီပြပွဲတွင် ပန်းချီပညာရှင်၊ ဝါသနာရှင်လူငယ် ၁ဝ ဦးမှ ပါဝင်ရေးဆွဲထားသည့် ပန်းချီကားချပ်ပေါင်း ၆၀ ကျော်ကို ခင်းကျင်းပြသထားရှိကာ ပန်းချီပြပွဲသို့ လာရောက် ကြည့်ရှုသူများ အနေဖြင့် ပန်းချီကားချပ်များတွင်ပါဝင်သည့် အကြောင်းအရာများကို သိရှိလိုပါက ပန်းချီဆရာများမှ ကိုယ်တိုင်ရှင်းပြပေးသွားမည်ဖြစ်ပြီး ပန်းချီကားများကိုလည်း ရောင်းချပေးသွားမည်ဖြစ်သည်။

 ပန်းချီပြပွဲတွင် ခင်းကျင်းပြသထားသည့် ပန်းချီအမျိုးအစားများမှာ အခရိုင်းလစ်၊ (ရေဆေးပန်းချီ)၊ ခဲပန်းချီ အမျိုးအစားများဖြစ်ပြီး မည်သူမဆို နေ့စဉ်နံနက် ၉ နာရီမှ ညနေ ၅ နာရီအထိ အခမဲ့ ဝင်ရောက်ကြည့်ရှုလေ့လာနိုင်ကြောင်း သိရသည်။

ဝင်းနိုင်(ကချင်မြေ)