ဝန်းသို ၁၃ ဇန်နဝါရီ
စစ်ကိုင်းတိုင်းဒေသကြီး၊ ဝန်းသိုမြို့နယ် စားသုံးသူရေးရာဦးစီးဌာနနှင့် မီးသတ်ဦးစီးဌာနတို့ ပူးပေါင်း၍ ယမန်နေ့ မွန်းလွဲပိုင်းက စော်ဘွားကြီးရပ်ကွက်ရှိ အိမ်ဈေးဆိုင်များနှင့် မီးရထားဘူတာ ပတ်ဝန်းကျင်ရှိ ကုန်စုံဆိုင်ခန်းများတွင် မီးဘေးကြိုတင်ကာကွယ်ရေး ဆောင်ရွက်ထားရှိမှု အခြေအနေနှင့် ရက်လွန် စားသောက်ကုန်များ၊ တားမြစ်စားသောက်ကုန်များ ရောင်းချမှုရှိ မရှိတို့ကို ကွင်းဆင်းစစ်ဆေးခဲ့ကြောင်း သိရသည်။
ထိုသို့ စစ်ဆေးရာတွင် မြို့နယ်စားသုံးသူရေးရာဦးစီးဌာနမှ တာဝန်ခံ ဒေါ်အမာကြည်က ကုန်စုံဆိုင် များတွင် စားသုံးရန်မသင့်သည့် အမှတ်တံဆိပ်နှင့် အစားအသောက် အမျိုးအစားများ၊ သက်တမ်းလွန်၊ မှိုတက် အစားအသောက်များ ရောင်းချမှုရှိ/မရှိကို စစ်ဆေးပြီး စားသုံးသူကာကွယ်ပေးရေးဉပဒေ၊ ကုန်အညွှန်း အမှတ်အသားဖော်ပြခြင်းနှင့် စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်များနှင့်အညီ ဖော်ပြရမည့်အချက်များကို သိရှိနားလည်စေရန် အသိပညာပေး စာရွက်များကိုလည်း ဖြန့်ဝေပေးခဲ့သည်။
ဆက်လက်၍ မြို့နယ်မီးတပ်ဦးစီးဌာနမှ တပ်ကြပ်ကြီး ဦ:ကျော်ဇေယျနှင့် သန္ဓေတပ်ဖွဲ့ဝင်များက ဈေးဆိုင်များတွင် အရေးပေါ် မီးသတ်ဆေးဗူးများထားရှိမှု ရှိ/မရှိနှင့် မီးချိတ်၊ မီးကပ်၊ မီးသဲများ ကြိုတင်စီမံဆောင်ရွက်ထားရှိမှု ရှိ/မရှိကို စစ်ဆေးခဲ့ကြောင်း သိရသည်။
ကျော်မြိုင်(ပြန်/ဆက်)
