သီပေါ ၆ အောက်တိုဘာ
ရှမ်းပြည်နယ်(မြောက်ပိုင်း) သီပေါမြို့နယ် မိုင်းလင်းကျေးရွာမှ မီးလောင်သွားသော ရွာဦး ဘုန်းတော်ကြီးကျောင်း ဆရာတော်နှင့် သံဃာတော်များအား နယ်စည်းမခြားပရဟိတ(သီပေါ)နှင့် မြို့နယ်ကြက်ခြေနီအသင်း မြတ်မွန်စေတနာလူမှုကူညီရေးအသင်း၊ လူမှုရေးအသင်းအဖွဲ့များက သင်္ကန်း၊ အိပ်ရာခင်း၊ ခေါင်းအုံး၊ စောင်နှင့် ဆန်၊ ဆီ၊ ဆေး၊ ဆား၊ ငါးခြောက် စားသောက်စရာများ၊ စာရေးကိရိယာများ၊ အလှူငွေများကို ယနေ့နံနက် (၁၀)နာရီက ကျေးရွာအရောက် သွားရောက် လှူဒါန်းကြသည်။
ထိုသို့လှူဒါန်းရာတွင် နယ်စည်းမခြား ပရဟိတခေါင်းတောင် ဦးမျိုးလွင်က စားသောက်စရာ များနှင့် ငွေကျပ် တစ်သိန်းငါးသောင်းကိုလည်းကောင်း၊ မြို့နယ်ကြက်ခြေနီအသင်း ဉက္ကဋ္ဌ ဦးစိုင်းဇော်ဝင်းက ငွေကျပ် ရှစ်သိန်းကျော်နှင့် ဟင်းချက်စရာများကိုလည်းကောင်း မိုင်းလင်း ကျောင်းထိုင် ဆရာတော်ထံ ပေးအပ်လှူဒါန်းခဲ့ကြသည်။
ထို့နောက် ကြက်ခြေနီအသင်းဝင်များ၊ နယ်စည်းမခြား ပရဟိတနှင့် လူမှုရေးအသင်းများက မိုင်းလင်းရွာဦးဘုန်းတော်ကြီးကျောင်း မီးလောင်ပြင်ကို စုပေါင်းသန့်ရှင်းရေး ပြုလုပ်ခဲ့ကြကြောင်း သိရသည်။
စိုင်း(သီပေါ)
