မြိတ် ၂၂ ဧပြီ
မြိတ်မြို့တွင် (COVID-19) ကာကွယ်ရေးအတွက် ညမထွက်ရအမိန့် ထုတ်ပြန်ချက်အား လိုက်နာရန် ပျက်ကွက်သူ (၁၂)ဦးအား ယနေ့တွင် တည်ဆဲဉပဒေဖြင့် အရေးယူဆောင်ရွက်ခဲ့ကြောင်း မြို့နယ် Covid-19 ထိန်းချုပ်ရေးနှင့် အရေးပေါ်တုံ့ပြန်ရေးကော်မတီမှ သိရသည်။
(COVID-19) ရောဂါသည် အများပြည်သူတို့၏ ကျန်းမာရေး၊ လူမှုရေး၊ စီးပွားရေးများကို ထိခိုက်စေသည့်အပြင် အသက်အန္တရာယ်သေဆုံးသည်အထိ ဖြစ်ပွားလာနိုင်သဖြင့် မြိတ်မြို့နယ်၌ သတ်မှတ်နယ်နိမိတ်အတွင်း နေအိမ်ပြင်ပသို့ ထွက်ခွာသွားလာခြင်း၊ စုဝေးခြင်းများကို နေ့စဉ် ည ၁၀ နာရီမှ နံနက် ၄ နာရီအတွင်း မပြုလုပ်ကြရန် အမိန့်များထုတ်ပြန် ကြေညာထားရှိသည်။
မြိတ်မြို့နယ်၌ အများပြည်သူအကျိုးအတွက် ညမထွက်ရအမိန့် ထုတ်ပြန်ထားရှိ၍ ညစဉ် တာဝန်ရှိသူများက လှည့်ကင်းများ ဆောင်ရွက်လျက်ရှိကြပြီး စစ်ဆေးရေးဂိတ်(၅)ခု ဖွင့်လှစ်ကာ စိစစ်ဆောင်ရွက်လျက်ရှိကြောင်း၊ ကလွင်ကျေးရွာအုပ်ချုပ်ရေးမှူးရုံးအရှေ့ ရှမ်းချောင်းလမ်းမ စစ်ဆေးရေးဂိတ်တွင် ထုတ်ပြန်ထားသော ညမထွက်ရအမိန့်အား လိုက်နာရန်ပျက်ကွက်သူ (၁၂)ဦးကို စိစစ်တွေ့ရှိရ၍ တည်ဆဲဉပဒေဖြင့် အရေးယူဆောင်ရွက်ခဲ့ခြင်း ဖြစ်ကြောင်း သိရသည်။
ခိုင်ထူး (မြိတ် ပြန်/ဆက်)
