မိုးကောင်း ၂၁ ဒီဇင်ဘာ
ဗုဒ္ဓဘာသာဝင် ရှမ်းနီလူမျိုးများ၏ ပထမဦးဆုံးပေါ်သည့် စပါးမှရသည့်ဆွမ်းကို သံဃာတော်များအား အထွဋ်အမြတ်ထား၍ အတိုင်းမသိ နိဗ္ဗာန်ကိုမျှော်မှန်းကာ ဒါနပြုကပ်လှူပူဇော်သည့် ရှမ်းနီနှင့် ရှမ်းမျိုးနွယ်စုများ နှစ်သစ်ကူးကောက်ဦးဆွမ်း ကပ်လှူပွဲတော်ကို စတုတ္ထအကြိမ်မြောက်အဖြစ် ယနေ့နံနက်(၈)နာရီခွဲတွင် ရွှေပြည်ကျောင်းတိုက်၌ ကျင်းပသည်။
ဆွမ်းကပ်လှူပွဲတော်ကို ဆရာတော် ၂ ပါးနှင့် ပွဲဖြစ်မြောက်ရေးဥက္ကဋ္ဌ ဦးကျော်အေးတို့က ဖဲကြိုးဖြတ်ဖွင့်လှစ်ပြီး နယကဆရာတော်များ အမှူးပြုသည့် မိုးကောင်းမြိုနယ်ကျောင်းတိုက်များမှ ဆရာတော် အပါး(၈၀)တို့အား နှစ်သစ်ကောက်ဦးဆွမ်း ကပ်လှူခဲ့ကြသည်။
“ကောက်ဦးဆွမ်းဆိုတာ စပါးပေါ်တဲ့အချိန်ဖြစ်တဲ့ နတ်တော်ပြာသိုလဆိုရင် တောင်သူတွေက မိမိတို့စိုက်တဲ့ စပါးတွေပေါ်ပြီလေ။ အရင်ဆုံးပေါ်တဲ့စပါးကို ကြိတ်ပြီးရတဲ့ဆန်နဲ့ ဦးဆုံးနှစ်သစ်မှာ ကပ်တဲ့အတွက်ကြောင့် ကောက်ဦးဆွမ်း နှစ်ဦးဆွမ်းကပ်လှူတဲ့ အလေ့အထပွဲလေးတစ်ခုပါ။ အခုဆိုရင် စတုတ္ထအကြိမ်မြောက်ပေါ့”ဟု ပွဲဖြစ်မြောက်ရေးကော်မတီမှ ဦးစိုင်းဉာဏ်ထွန်းက ပြောသည်။
ရိုးရာဖျော်ဖြေကပြမှုကို ဆက်လက်ကျင်းပရာ နတ်ကြီးကုန်း၊ နောင်ကိုင်တော်၊ ရုံးဟောင်း၊ ကျွန်းတော၊ ကြာအင်း၊ ကညှင်မြိုင်၊ အုန်းဘောင်၊ ပင်းဘောနှင့် သိုက်ဝါးကုန်းကျေးရွာတို့မှ ရှမ်းနီလူမျိုး တိုင်းရင်းသားရိုးရာ အကအဖွဲ့များက ဧည့်ခံဖျော်ဖြေ ကပြကြကြောင်း သိရသည်။
သန်းလွင်ဦး(ပြန်/ဆက်)
