မိုးမိတ် ၃ ဧပြီ
ရှမ်းပြည်နယ်(မြောက်ပိုင်း) မိုးမိတ်ခရိုင် မိုးမိတ်မြို့နယ် စည်ပင်သာယာဈေး၌ ကိုဗစ်-၁၉ ရောဂါနှင့် ပတ်သက်၍ တုံ့ပြန်ဆောင်ရွက်လျက်ရှိရာကာလအတွင်း ဆန်၊ ဆီ၊ ဆား အပါအဝင် အခြေခံစား သောက်ကုန်များ ဈေးနှုန်းတည်ငြိမ်စွာ ရောင်းချနိုင်ရေးအတွက် ဧပြီ ၃ ရက် နံနက်ပိုင်းတွင် ကွင်းဆင်း ကြပ်မတ်စစ်ဆေး ဆောင်ရွက်ခဲ့သည်။
Coronavirus Disease 2019 (ကိုဗစ်-၁၉) ကာကွယ်၊ ထိန်းချုပ်၊ ကုသရေး ခရိုင်နှင့်မြို့နယ် အဆင့် လုပ်ငန်းကော်မတီ၏ ဦးဆောင်မှုဖြင့် ဒုမြို့နယ်အုပ်ချုပ်ရေးမှူး ဦးညီဇော် မြို့နယ် စည်ပင် သာယာရေးဦးစီးမှူး ဦးတင်ရှိန်နှင့် စည်ပင်သာယာရေး ကော်မတီအဖွဲ့ဝင်များသည် စည်ပင်သာယာဈေး အတွင်းရောင်းချလျက်ရှိသော ကုန်စုံဆိုင်များမှ ဆန်၊ ဆီ၊ ဆား အပါအဝင် အခြေခံစားသောက်ကုန်များ ဈေးနှုန်းတည်ငြိမ်စွာ ရောင်းချနိုင်ရေးနှင့် ဈေးနှုန်းများ မတန်တဆ တက်၍ ရောင်းချခြင်းများ မပြုလုပ်ကြရန်အတွက် မေတ္တာရပ်ခံခဲ့ကြကြောင်း သိရသည်။
“ကျွန်မတို့ဆိုင်ကတော့ ဆား၊ဆီ အပါအဝင် အခြေခံစားသောက်ကုန်များကို ရောင်းချလျက်ရှိပါတယ်၊ ကြက်သွန်ဈေးနှုန်းကတော့ အရင်ကထက် ဈေးကျပါတယ်။ ကြက်ဉကတော့ ၅ ကျပ် တက်ပါတယ် ကျန်တဲ့စားကုန်များတော့ ပုံမှန်ဈေးနှုန်းအတိုင်းပဲ ရောင်းချလျက်ရှိပြီး ဈေးနှုန်း မတန်တဆတက်၍ ရောင်းချခြင်းမရှိပါဘူး”ဟုဈေးသည် ကုန်စုံရောင်းချသူ ဒေါ်မိကာက ပြောကြားသည်။
မိုးမိတ်မြို့နယ် စည်ပင်သာယာဈေးတွင် ဒေသ ဆန် (ပထမတန်း)တစ်ပြည်လျှင် ၁၄၀၀ကျပ် ၊ ပဲဆီ တစ်ပိဿာ ၃၀၀၀ ကျပ် ၊ ပဲဆီသန့် တစ်ပိဿာ ၈၀၀၀ ကျပ် ၊ စားအုန်းဆီ တစ်ပိဿာ ၂၃၀၀ ကျပ် နှင့် ဆား တစ်ပိဿာ ၆၀၀ ကျပ်တို့ဖြင့် နေ့စဉ်ရောင်းချလျက်ရှိပြီး Hand Sanitizer တွေကဈေးတက်ပြီး Mask တွေကတော့ ဆိုင်တိုင်းလိုလို ပြတ်လပ်နေပါတယ် ” ဟု ဈေးခေါင်း ဦးဝင်းမောင်ကပြောသည်။
မိုးမိတ်သား(စည်သူဌေး)