မိုင်းခတ်မြို့နယ် တောင်သူများအား EM ဘိုကာရှီမြေဆွေးပြုလုပ်နည်း အသိပညာပေးဆွေးနွေး

မိုင်းခတ်၊ ၂၈ ဒီဇင်ဘာ

ရှမ်းပြည်နယ်(အရှေ့ပိုင်း) မိုင်းခတ်မြို့နယ် တောင်သူများအား EM ဘိုကာရှီမြေဆွေးပြုလုပ်နည်း အသိပညာပေးဆွေးနွေးပွဲကို ဒီဇင်ဘာ ၂၇ ရက် နံနက်ပိုင်းက စွတ်ပလောင်းကျေးရွာအနီးရှိ မြို့နယ်အားကစားရုံ၌ ကိုဗစ်-၁၉ လမ်းညွှန်ချက်များနှင့်အညီ ပြုလုပ်ခဲ့သည်။

ရှေးဦးစွာ ကျိုင်းတုံခရိုင် စိုက်ပျိုးရေးဦးစီးဌာနမှ ခရိုင်ဦးစီးမှူး ဒေါ်အင်ကြင်းခိုင်က စိုက်ပျိုးရေးလုပ်ငန်းများနှင့် စပ်လျဉ်း၍ အဖွင့်အမှာပြောကြားခဲ့ပြီး ဌာနအသီးသီးရှိ တာဝန်ရှိသူများက EM ဘိုကာရှီမြေဆွေး ပြုလုပ်သုံးစွဲခြင်းကြောင့် လယ်ယာမြေများ၏ မြေဆီသြဇာဓာတ်နှင့် မြေဆီလွှာဖွဲ့စည်းမှုများကို ရေရှည်အသုံးပြုနိုင်ရေးအတွက် ထိန်းသိမ်းထားနိုင်ခြင်းနှင့် တိုးတက်အောင်ပြုပြင် ဆောင်ရွက်ပေးနိုင်ခြင်း၊ ဓာတ်မြေသြဇာလိုအပ်ချက်ကို အတတ်နိုင်ဆုံးမှီခိုသုံးစွဲရမှု လျော့နည်းလာခြင်း၊ မြေသားတည်ဆောက်မှုကောင်းခြင်း၊ ရေနှင့် အာဟာရဓာတ်ကို ကောင်းမွန်စွာထိန်းထားနိုင်ခြင်း၊ ပေါင်းစေ့အပင်ပေါက်မြန်စေပြီး ပေါင်းနှိမ်နှင်းရာတွင် လွယ်ကူစေခြင်း၊ သီးနှံပင်များ၏ ပင်ကြွင်းပင်ကျန်များဖြင့် သဘာ၀မြေသြဇာ ပြုလုပ်ခြင်းကြောင့် ကုန်ကျစရိတ် သက်သာခြင်း၊ သဘာ၀ဖြင့် ပြုလုပ်ထားသော မြေသြဇာဖြစ်သောကြောင့် လူသားများ အစားအစာ ဘေးအန္တရာယ်ကင်းရှင်းစေနိုင်ခြင်း စသည့်အကျိုးကျေးဇူးများကို အသိပညာပေးဆွေးနွေးခဲ့သည်။

ထို့နောက် စိုက်ပျိုးရေးဦးစီးဌာနမှ တာဝန်ရှိသူများက တောင်သူများသိလိုသည့် မေးမြန်းဆွေးနွေးမှုများကို ပြန်လည်ဖြေကြားပေးခဲ့ပြီး စိုက်ပျိုးရေးဆိုင်ရာ အသိပညာပေးလက်ကမ်းစာစောင်များ ဖြန့်ဝေပေးခဲ့ကြောင်း သိရသည်။

မိုးဒေ(ပြန်/ဆက်)