မိုင်းဖြတ် ၂၂ မတ်
ရှမ်းပြည်နယ်( အရှေ့ပိုင်း )၊ မိုင်းဖြတ်မြို့နယ်တွင် မြို့နယ်ဘေးအန္တရာယ်စီမံခန့်မှုဆိုင်ရာဦးစီးဌာန၊ မြို့နယ်ဦးစီးမှူး ဦးရာဇာဝင်းထွန်းနှင့် ဝန်ထမ်းများသည် သောက်သုံးရေ အခက်အခဲရှိနေသော ကျေးရွာများသို့ ပေးလှူလျက်ရှိရာ ယနေ့နံနက် ၁၀နာရီခွဲက ဝမ်နောင်ကျေးရွာတွင် လည်းကောင်း၊ မွန်းလွဲပိုင်းတွင် ပါဆန်းကျေးရွာတွင်လည်းကောင်း ဂါလံ (၁၂၀ဝ)ဆံ့ မီးသတ်ယာဉ်ဖြင့် သောက်သုံးရေများကို တစ်ရွာလျှင် တစ်စီးနှုန်းဖြင့် သွားရောက်လှူဒါန်းပေးခဲ့ကြောင်း သိရသည်။
အဆိုပါ ရေလှူဒါန်းရာသို့ ပြည်နယ်လွှတ်တော်ကိုယ်စားလှယ် ဦးစိုင်းကျောက်နှင့် တာဝန်ရှိဌာနဆိုင်ရာများက လိုက်ပါကူညီဆောင်ရွက်ပေးကြပြီး ပါဆန်းကျေးရွာတွင် လွှတ်တော်ခွင့်ပြု ရန်ပုံငွေ ကျပ် ၁၀ သိန်းနှင့် ကျေးလက်ပြည်သူများ၏ လုပ်အားဖြင့် ကျေးလက်ရေပေးရေးအတွက် အလျား ပေ ၂၀၊ အနံ ၁၂ ပေ၊ အမြင့် ၁၂ ပေရှိ တိုးချဲ့ရေလှောင်ကန်အား စုပေါင်းလုပ်အားပေးရာသို့ ကြည့်ရှုအားပေးခဲ့ကြောင်း သိရသည်။
ရှောလမွန်( မိုင်းဖြတ်)
