မိုးညှင်း ၂၂ မေ
ကချင်ပြည်နယ် မိုးညှင်းခရိုင် မိုးညှင်းမြို့နယ်တွင် သျှမ်းနီစာပေသင်ကြားမည့် ဆရာ ဆရာမ မွမ်းမံ သင်တန်းဆင်းပွဲကို ယမန်နေ့ မွန်းလွဲ ၁ နာရီတွင် အရှေ့ကျောင်းပရိယတ္တိစာသင်တိုက်၌ ကျင်းပသည်။
မိုးညှင်းမြို့နယ် အတွင်းရှိ အခြေခံပညာကျောင်းများ၌ သျှမ်းနီစာပေသင်ကြားနေသည့် ဆရာ ဆရာမ ၆၀ ကျော်အား သင်ကြားမှု အရည်အသွေးများ ပိုမိုကောင်းမွန်လာစေရေး ရည်ရွယ်ဖွင့်လှစ်ခဲ့သည့် အဆိုပါမွမ်းမံ သင်တန်းဆင်းပွဲတွင် ပြည်နယ်လွှတ်တော်ကိုယ်စားလှယ် ဦးတင်အေးက အမှာစကား ပြောကြားပြီး ခရိုင်သျှမ်းနီစာပေနှင့် ယဉ်ကျေးမှုကော်မတီဥက္ကဋ္ဌ ဦးချစ်ငွေက သင်တန်းဖွင့်လှစ်ရခြင်း ရည်ရွယ်ချက်များကို ရှင်းလင်းပြောကြား၍ သင်တန်းဆင်း လက်မှတ်များ ပေးအပ်ခဲ့ကြသည်။
အလားတူ အင်းတော်ကြီးမြို့နှင့် ပတ်ဝန်းကျင်ကျေးရွာများရှိ အခြေခံပညာကျောင်းများတွင် သျှမ်းနီစာပေ သင်ကြားပေးနေသည့် ဆရာ ဆရာမ ၉၀ ကျော်ဖြင့် ယခုလ ၇ ရက်နေ့တွင် မွမ်းမံ သင်တန်းဆင်းပွဲ ကျင်းပခဲ့ပြီးဖြစ်သည်။
မိုးညှင်းခရိုင်အတွင်း ၂၀၁၈-၂၀၁၉ ပညာသင်နှစ်တွင် သျှမ်းနီစာပေသင်ကြားသည့် ဆရာ/ဆရာမပေါင်း ၃၁၅ ဦးရှိရာ နေ့စားလပေး ၄၈ ဦးရှိပြီး ကျန်ဆရာ/ဆရာမများကို ထောက်ပံ့ငွေ ၃၀ဝ၀ဝ ထောက်ပံ့ပေးကြောင်း ခရိုင်ပညာရေးမှူးရုံးမှ သိရသည်။
ကျော်ကျော်ထွေး (မိုးညှင်း)
