မြို့သစ် ၂၂ ဇန်နဝါရီ
မကွေးခရိုင် မြို့သစ်မြို့နယ် ကျန်းမာရေးဦးစီးဌာနအနေဖြင့် မြို့သစ်မြို့ပေါ်ရပ်ကွက်နှင့် ကျေးရွာ အုပ်စုများမှ အသက်(၆၀)နှစ် နှင့် အသက်(၆၀)ကျော် အဘိုးအဘွားများအား အပတ်စဉ် ဗုဒ္ဓဟူးနေ့ ရောက်တိုင်း အဘိုးအဘွားများ၏ ကျန်းမာရေးနှင့် ပတ်သက်သည်များကို စမ်းသပ်စစ်ဆေး ကုသ ပေးလျက်ရှိသည်။
မြို့ပေါ်ရှိ ရပ်ကွက်နှင့်ကျေးရွာမှ အသက်(၆၀)ကျော် အဘိုးအဘွားများ၏ ကျန်းမာရေးအတွက် တိုင်းကျန်းမာရေး ဦးစီးဌာန၏ စီမံချက်ဖြင့် နှစ်စဉ်နှစ်တိုင်း ကျန်းမာရေး ဆေးကုသမှုများကို မြို့နယ် ကျန်းမာရေးဦးစီးဌာန မြို့နယ်ဆေးရုံအုပ်ကြီး ဒေါက်တာသန့်ဇော်မြင့် ၊ လက်ထောက် ဆရာဝန်နှင့် တာဝန်ကျ ဆရာ/ဆရာမများ ပူးပေါင်းကာ ကုသမှုပေးခြင်းဖြစ်သည်။
ဆေးကုသရာတွင်လည်း ဗုဒ္ဓဟူးနေ့ နံနက်(၈)နာရီမှ (၁၁)နာရီအထိ အဘိုးအဘွားများအား ဆေးကုသဆောင်တွင် သီးသန့်ကျန်းမာရေး စောင့်ရှောက်မှုလုပ်ငန်းများဖြစ်သည့် သွေးပေါင်ချိန်ခြင်း၊ အဖျားတိုင်းတာခြင်း ၊ ဆီးချိုသွေးချိုလူနာရှင်များကို သွေးစစ်ဆေးခြင်းနှင့် အခြားကူးစက်နိုင်သည့် ရောဂါများ မဖြစ်ပွားစေရန်အတွက် ကြိုတင်ကာကွယ်ခြင်းများကို တာဝန်ကျဆရာဝန်နှင့် ဆရာ/ဆရာမများက တာဝန်ကျသည့်နေ့အလိုက် ဆေးကုသဆောင်ရွက်ပေးလျက်ရှိကြောင်း သိရသည်။
ဇော်ဇော်(မြို့သစ်)
