ပွင့်ဖြူ ၁၄ ဖေဖော်ဝါရီ
မကွေးတိုင်းဒေသကြီး ၊ မင်းဘူး(စကု)မြို့နယ် အိုင်းမကျေးရွာအုပ်စု ၊ အိုးပြင်မဲကျေးရွာရှိ မီးဘေးသင့် ပြည်သူများ အဆင်ပြေစွာ နေထိုင်စားသောက်နိုင်ရေးအတွက် ဖေဖော်ဝါရီ ၁၃ ရက်နေ့က ပွင့်ဖြူမြို့နယ် တောင်အင်းကျေးရွာ မေတ္တာရှင် ပရဟိတအသင်းမှ နာယကဆရာတော် ဦးစန္ဒိမာ ဦးဆောင်၍ ပရဟိတ အသင်းသားများက ငွေကျပ် ၁၉ သိန်း တန်ဖိုးရှိ ဆန်နှင့် အိမ်အသုံးအဆောင်ပစ္စည်းများ သွားရောက် ကူညီထောက်ပံ့လှူဒါန်း ပေးခဲ့ကြောင်း သိရသည်။
အဆိုပါ မင်းဘူး(စကု)မြို့နယ် အိုင်းမကျေးရွာအုပ်စု ၊ အိုးပြင်မဲကျေးရွာသည် ဖေဖော်ဝါရီ ၁၂ ရက်နေ့ ညနေ ၅ နာရီ အချိန်ခန့်က တောမီးလောင်မှု ဖြစ်ပွားရာမှ တစ်ဆင့် ကျေးရွာတွင်းရှိ လူနေအိမ်အလုံး ၇၀ ခန့် မီးကူးစက်လောင်ကျွမ်းခဲ့ကာ အိမ်ထောင်စု ၇၆ စု ၊ မီးဘေးသင့်အိမ်ထောင်စု လူဦးရေ ကျား ၁၃၁ ဦး ၊ မ ၁၃၈ ဦး ၊ စုစုပေါင်း ၂၆၉ ဦး မီးဘေးသင့်ခဲ့ရပြီး လွှတ်တော်ကိုယ်စားလှယ်များနှင့် ဌာနဆိုင်ရာ တာဝန်ရှိသူများက ကျေးရွာဘုန်းတော်ကြီးကျောင်းတွင် ယာယီကယ်ဆယ်ရေး စခန်းဖွင့်လှစ်ထားရှိပြီး လိုအပ်သည်များ ကူညီဆောင်ရွက်ပေးထားကြောင်း သိရကာ မြို့နယ်အတွင်းရှိ စေတနာအလှူရှင်များ ၊ ရပ်ဝေးရပ်နီးမှ ပရဟိတလူမှုကူညီရေးအသင်းများကလည်း အိုးပြင်မဲကျေးရွာရှိ မီးဘေးသင့် ပြည်သူများအား နေရေးထိုင်ရေး ၊ စားရေးသောက်ရေး အဆင်ပြေစေရေး လာရောက် ကူညီလှူဒါန်း ပေးလျက်ရှိကြောင်း သိရသည်။
မီးဘေးသင့်ပြည်သူများ အဆင်ပြေစွာ နေထိုင်သွားနိုင်ရေးအတွက် ယမန်နေ့က ပွင့်ဖြူမြို့နယ် တောင်အင်းကျေးရွာ မေတ္တာရှင် ပရဟိတအသင်းမှ နာယကဆရာတော် ဦးစန္ဒိမာ ဦးဆောင်မှုဖြင့် ပရဟိတ အသင်းသားများက အိုးပြင်မဲကျေးရွာရှိ မီးဘေးသင့်အိမ်ထောင်စုများကို တစ်အိမ်လျှင် ငွေကျပ် ၁၅၀ဝ၀ ၊ ဆန် ၃ ပြည် နှင့် အိမ်အသုံးအဆောင်ပစ္စည်းများကို လက်ဝယ်အရောက် ထောက်ပံ့ လှူဒါန်းပေးခဲ့ကြောင်းနှင့် မီးဘေးသင့်အိမ်ထောင်စု(၇၆)စုအတွက် စုစုပေါင်း ငွေကျပ် ၁၉ သိန်း ခန့် ထောက်ပံ့လှူဒါန်းပေးခဲ့ကြောင်း သိရသည်။
ရဲဝင်းနိုင် (ညောင်ဦး)
